Yoane 5

Erĩlamya omundu oko kitsinga

1Enyũma wʼemyatsi eyĩ, habya ebiro bikulu byʼAbayũda, neryo Yesu mwahetukira eYerũsalema. 2Kandi eYerũsalema hakũhĩ nʼolũkyo lwʼEsyombũlĩ, hali ekitsinga ekiwite ebitalikirire bitanu. Ekitsinga ekyo kikahulawa mo Betesaĩda. 3Omo bitalikirire ebĩ habya endeko yʼabakonĩ, esyondĩmatĩme, nʼebirema, nʼabũmĩre, [ibakalindirira erĩtabũkala lyʼamagetsi. 4Kusangwa omũlaĩka wʼomukama iniakandagala igumi-guma omo kitsinga eripanza amagetsi. Neryo Oyũkatsũka eriya omo magetsi amabĩtabũkala, inialamĩbwa oko ndwala eyo alwe akwĩre.] 5Neryo omundu muguma abyaho, inialwere oko myaka makũmĩ asatu nʼomunani. 6Neryo Yesu mwamulangira iniagotsereho, kandi mwaminya omundu oyo kwʼabirilwala biro bingi. Neryo mwamũbũlya ati, Wanzĩre erilama kwehĩ? 7Omũkonĩ oyo mwamũsũbĩrya ati, Mukama, singwite omundu wʼerĩnyĩhĩra omo kitsinga omugulu amagetsi akatabũkala; nĩkwa omugulu ngalenga eriyamo, ogundi mundu akanyitanga. 8Neryo Yesu mwamubwira ati, Hangana, uheke engyingo yawe, uyigendere.

9Neryo-neryo omundu oyo mwalama. Neryo mwaheka engyingo yiwe, mwayigendera. Nĩkwa ekiro ekyo kyabya ekiro kyʼeSabato. 10Neryo Abayũda mobabwira oyo walamĩbawa bati, Mũnabwĩre ni Sabato, kandi Emigambo ĩkakũganaya eriheka engyingo yawe. 11Nĩkwa mwasũbĩryabo ati, Oyũlyanyĩlamaya yuliambwira ati, Uheke engyingo yawe, uyigendere. 12Nabo mobamũbũlya bati, Omundu oyo yondi oyukakubwira ati, Uheke engyingo yawe uyigendere kwehĩ? 13Nĩkwa oyo walamĩbawa mwataminya nga nindi, kusangwa Yesu iniamabĩlũaho omugulu endeko yabyaho.

14Enyũma wʼaho, Yesu mwamweya omo Hekalũ, mwamubwira ati, Lebaya, wabirilama. Suswekola ekibi, Ukasyabya ko mwatsi akalĩre kwʼaho. 15Neryo omundu oyo mwalũaho, mwayabwira Abayũda kwʼali ini Yesu oyo wamũlamaya. 16Busana nʼomwatsi oyũ Abayũda mobatsũka erĩendererya Yesu, kusangwa abya akakola emyatsi eyĩ oko kiro kyʼeSabato.

17Nĩkwa Yesu mwasũbĩryabo ati, Tata wage akakola emigulu yosĩ, ĩngye nage ngakola. 18Busana nʼomwatsi oyũ Abayũda mobasonda-sonda erĩmwĩta kwilaba; kusangwa ambu abya akaketa omugambo wʼeSabato, kandi kusangwa abya akahula Nyamuhanga mo Tata wuwe, ĩnĩakayĩrĩngĩrĩranaya na Nyamuhanga.

Ehamũlĩy ʼOmugala

19Neryo Yesu mwasũbĩryabo ati, Kwenene, kwenene ngabũga nenyũ nyiti, Omugala sialikola kindu ĩyowene, nĩkwa akakola ebyo akalangira Tata wuwe akakola; kusangwa ebyosĩ Ĩse akakola, byo Mugala akakola atya nibya. 20Kusangwa Ĩse anzĩre Mugala, kandi akamũkangaya emyatsi yosĩ eyo akakola. Kandi emĩbĩrĩ minene ũkwʼeyĩ asyamũkangyayo, imwatoka erisweka. 21Kusangwa ngoko Tata akalũbũkaya abaholĩ nʼerihabo engebe, litya Omugala akaha engebe ukwʼabo anzĩre erihayo. 22Kandi Tata sialitswera omundu nʼomuguma. Nĩkwa abiriha Omugala ehamũlĩ yʼeritswera lyosĩ. 23Neryo abosĩ batoke erĩsĩkya Omugala, ngoko bakasĩkaya Tata. Oyũtesĩkaya Omugala, sĩalĩsĩkaya Tata oyo wamutuma.

24Kwenene, kwenene ngababwira, oyũkowa ebĩnywa byage, nʼerĩkĩrĩrya oyo wanyituma, awite engebe yʼerikota. Kandi siendisyatswerwa, nĩkwa abĩrĩlũa omo luholo, abiringira omo ngebe. 25Kwenene, kwenene, ngababwira, endambĩ ikasa, na lino ineho, omugulu abaholĩ basyowa omulenge wʼomugala wa Nyamuhanga, nʼabo abakowa basyabyaho. 26Kusangwa ngoko Tata ni mwenye engebe, litya abiriha Omugala eribya Omwenye engebe. 27Kandi abiriha Omugala ehamũlĩ yʼeritswera esyombanza, kusangwa iye ni Mugala wʼOmundu. 28Simusweke busana nʼekĩ; kusangwa endambĩ ikasa, oko mugulu oyo, abosĩ abali omo masinda basyowa omulenge wuwe. 29Basyalũa omo masinda wabo; abakola emĩbĩrĩ mibuya basyalũbũka oko ngebe, nʼabakola ebibi basyalũbũka oko lubanza lwʼeritswerwa.

Erĩtũlago lya Yesu

30Sinditoka erikola kindu omwʼiyihana lyage; ngatswera ngoko Nyamuhanga akambwira, nʼeritswera lyage ritunganene; kusangwa sindisonda erikola ebyo nyanzĩre, nĩkwa erianza lyʼoyo wanyituma.

31Namatũla omwatsi wage ĩngyowene, erĩtũlago lyage si kwenene. 32Hali gundi oyũkatũlago busana nage; kandi nyĩnasĩ ebyo akabũga busana nage ni kwenene. 33Mwabiritumira Yoane yʼabakwenda, naye abĩrĩtũla omwatsi wʼekwenene. 34Nĩkwa ĩngye Sindi nʼobwaga bwʼerĩtũlago lyʼabandu; nĩkwa ngabũga emyatsi eyĩ, imwatoka erĩlamĩbwa. 35Yoane abya tala eyikaka nʼerĩkolerya, nenyũ mwabya mwanzĩre eritsema katambĩ omo kyakakala kiwe. 36Nĩkwa ĩngye ngwite erĩtũlago lĩnene-kwilaba erya Yoane; kusangwa emĩbĩrĩ eyo Tata abirimba eribugirira, emĩbĩrĩ eyo ngakola ĩkatũlago busana nage, iti Tata abirinyituma. 37Na Tata oyo wanyituma, iye abĩrĩtũla omwatsi busana nage. Inywe Sĩmwetowa omulenge wuwe na kera, kutse erilangira ekĩsosekanĩo kiwe. 38Kandi simuwite ekĩnywa, kusangwa sĩmũlĩkĩrĩraya oyo atuma. 39Mukasoma Amasako, kusangwa mũkaganĩraya muti muwite engebe yʼerikota. Kandi Amasako ayo akatũlago busana nage! 40Nĩkwa sĩmũlĩrĩga erĩmbĩkako imwatoka eribana engebe.

41Sindisonda eripipwa nʼabandu. 42Nĩkwa nyĩbasĩ; simuwite olwanzo lwa Nyamuhanga omo mitima yenyũ. 43Nabĩrĩhĩka omo lĩna lya Tata wage, nenyũ sĩmũlĩtanyĩkokya; ogundi amasa omo lĩna liwe ĩyowene, mwasyamũkokya. 44Mukatoka erĩkĩrĩrya muti, omugulu mukabana erĩsĩkanĩa omuguma oko gundi kwehĩ, isimulisonda-sonda erĩsĩkya erĩkalũa uku Nyamuhanga ĩyowene. 45Sĩmũganĩraye muti nasyabahandikirira embere sya Tata. Musa yo wasyabahandikirira. Ni Musa oyo mũkahĩra kwʼamaha. 46Kusangwa kumbe mwĩkĩrĩraya uku Musa, nga mwanganyĩkĩrĩrye; kusangwa iye mwasaka emyatsi yage. 47Nĩkwa mwamatendĩkĩrĩrya Amasako wuwe, mwasyĩkĩrĩrya ebĩnywa byage byo muti kwehĩ?

Currently Selected:

Yoane 5: KB80

Highlight

Copy