Yoane 4

Yesu nʼomũkalĩ wʼeSamarĩa

1Neryo Omukama abere aminya kwʼAbafarĩsayo babĩrĩowa ko Yesu akayira nʼerĩbatĩsya abiga bangi oko ba Yoane, 2nĩkwa Yesu ĩyũtebatĩsaya, nĩkwa abiga buwe bo babatĩsaya. 3Yesu mwalũa eYũdea mwaswaya eGalĩlaya. 4Kandi kyabya kitolere inialabira oko kihugo kyʼeSamarĩa.

5Neryo Yesu mwahĩka oko mũyĩ wʼeSamarĩa owakahulawa mo Sũkarĩ, hakũhĩ nʼekitaka ekyo Yakobo aha mugala wuwe ye Yosefũ. 6Neryo ekitehero kya Yakobo kyabyaho. Neryo Yesu, ĩnĩalũhĩre busana nʼolugendo luwe mwĩkala atya oko kitehero. Endambĩ yabya hakũhĩ na saa sĩta.

7Omũkalĩ wʼeSamarĩa mwahĩkaho akateha amagetsi. Yesu mwamubwira ati, Umba awʼerĩpũlya. 8Kusangwa abiga ba Yesu babya ibabiriya oko mũyĩ eriyagula ebyalya. 9Omũkalĩ wʼeSamarĩa oyo mwabwira Yesu ati, Uwe uli Mũyũda, nage indi Mũsamarĩa, ũkanyĩbũlaya awʼerĩpũlya uti kwehĩ? Kusangwa Abayũda baponene nʼAbasamarĩa. 10Yesu mwamũsũbĩrya ati, Kumbe wasĩ olũsũnzo lwa Nyamuhanga, nʼoyũkabũga nawe ati, Umba awʼerĩpũlya, kumbe wabĩrĩmũbũlya, naye kumbe abirikuha amagetsi wʼengebe. 11Omũkalĩ mwamubwira ati, Mukama, suwite ekyʼeritehamo, nʼekitehero ni kiri. Neryo ukabana magetsi wʼengebe ayo go hahi kwehĩ? 12Tata-kulu wetu Yakobo, mwatuha, ekitehero ekĩ, naye mwapũlya kukyo nʼabagala buwe, nʼebihangulo biwe, nawe uli mukulu kwilaba tata-kulu wetu ye Yakobo kwehĩ? 13Yesu mwamũsũbĩrya ati, Oyũkapũlaya oko magetsi aya asyaswakwa enyota. 14Nĩkwa oyũkapũlaya amagetsi ago nasyamuha siendisyaswakwa enyota na kera. Nĩkwa amagetsi ago nasyamuka asyabya omwisi wuwe eyĩsoko yʼamagetsi awakakũnũnũka nʼerimuha engebe yʼerikota. 15Omũkalĩ mwabũga ati, Mukama, umbe oko magetsi ayo, neryo sindiendĩsyaswakwa nyota, kutse ndasyaswasa eno nʼeriteha magetsi! 16Yesu mwamubwira ati, Ugende, ubirikire ĩbawe, mwase eno. 17Omũkalĩ oyo mwasũbĩrya ati, Singwite ĩbage. Yesu mwamũsũbĩrya ati, Wamabũga ndeke uti suwite ĩbawe. 18Kusangwa wabiribya nʼabĩbawe batanu, nʼoyo guli naye sĩ ĩbawe. Ekĩ wabĩrĩbũga kwenene. 19Omũkalĩ mwabũga na Yesu ati, Mukama, namalebya kʼuli mũmĩnyererĩ. 20Abotata wetu mobaramya Nyamuhanga oko kitwa ekĩ, nenyũ mũkabũga muti eYerũsalema ho abandu batolere erĩramĩrya Nyamuhanga. 21Yesu mwamubwira ati, Mũkalĩ, ũnyĩkĩrĩraye, omugulu asyasa isimwendisyaswaramya Tata oko kitwa ekĩ, kutse eYerũsalema. 22Ĩnywe mũkaramaya ekyo mũtasĩ; ĩtwe tũkaramaya ekyo twasĩ, kusangwa erilama lĩkalũa oko Bayũda. 23Nĩkwa omugulu akasa, kandi lino ane, abaramya bʼekwenene basyaramya Tata omo kĩrĩmũ nʼekwenene, kusangwa Tata akasondaya abandu abali batya eribya baramya buwe. 24Nyamuhanga nĩ Mũlĩmũ, nʼabakamũramaya litolere ĩbamũramya omo kĩrĩmũ nʼomo kwenene.

25Omũkalĩ mwabũga na Yesu ati, Nyasĩ Masĩya asyasa, Oyukahulawa mo Kristo, ekiro oyo asyasa, asyatubwira emyatsi yosĩ. 26Yesu mwamũsũbĩrya ati, Ĩngye ngabũga nawe, ni iye. 27Oko saa eyo abiga ba Yesu mobasubula, neryo mobasweka kusangwa abya akabũga nʼomũkalĩ oyo. Nĩkwa sihabya oyũkabũga ati, Ukasondakĩ kwehĩ? Kutse, Busana nakĩ ũkabũga naye kwehĩ?

28Neryo omũkalĩ oyo mwasĩga erĩrega liwe, mwaya oko mũyĩ, mwabwira abandu bayo ati, 29Mwase, mũlebaye omundu, oyo wamambwira ebyosĩ nakola. Oyũ si Kristo kwehĩ? 30Nabo mobalũa oko mũyĩ, mobahĩka uku Yesu.

31Omo mugulu oyo abiga mobalemba-lemba Yesu bati, Mũkangĩrĩrya, ulya! 32Nĩkwa Yesu mwabwirabo ati, Ngwite akalyo kʼerirya ako mũtasĩ. 33Kyaleka abiga ĩbabũlanĩa bati, Hali mundu wamuletere akalyo kwehĩ? 34Nĩkwa Yesu mwabwirabo ati, Akalyo kage ni ʼkola erisonda lyʼoyo wanyituma, nʼeribuga omũbĩrĩ ogo amba.

35Sĩmwebũga muti, Hakĩsĩya mikera ĩnĩ erigesa ĩryahĩka, kwehĩ? Lebaya, ngababwira nyiti, Musumbe ameso wenyũ, musamalire amalima erĩre, amahĩka erigeswa. 36Oyukagesa akahamba oluhembo. Kandi akahĩndanaya esyombuto busana nʼengebe yʼerikota, neryo omũbĩbĩ nʼomũgesĩ ibatoka eritsemera haguma. 37Kusangwa erĩbũga erĩ ni kwenene riti, Omundu muguma akabiba, nʼogundi akagesa. 38Ngabatuma eriyagesa aho mutakola; abandi babirikola, nenyũ mwabiriingira omo mĩbĩrĩ yabo.

39Neryo omo mũyĩ oyo, Abanya Samarĩa bangi mobĩkĩrĩrya Yesu busana nʼekĩnywa kyʼomũkalĩ oyo wabũga ati, Amambwira ebyosĩ ebyo nakola. 40Neryo Abanya Samarĩa babere bahĩka uku Yesu, mobamuhatikana bati ĩkale haguma nabo. Neryo Yesu mwĩkalaho biro bibiri.

41Abandi bangi mobĩkĩrĩrya busana ngʼekĩnywa kya Yesu. 42Mobabwira omũkalĩ bati, Lino tũkĩkĩrĩraya, si busana nʼerĩbũga lyawe, nĩkwa kusangwa ĩtwe twabĩrĩowa ĩtwebene-bene, kandi tũnasĩ oyũ, kwenene kwʼali Mũlamya wʼekihugo.

Yesu akalamaya omugala wʼomũtabalĩ

43Neryo enyũma wʼebiro bibiri, Yesu mwalũaho mwaya eGalĩlaya. 44Kusangwa Yesu abya ĩnĩabĩrĩbũga ati, Omũmĩnyererĩ sĩalĩsĩkĩbawa omo kihugo kyʼewabo. 45Neryo omugulu ahĩka eGalĩlaya, Abanya Galĩlaya mobamũkokya kusangwa mobalangira emyatsi yosĩ akola eYerũsalema oko biro bikulu, kusangwa nabo mobaya oko biro bikulu ebyo.

46Neryo Yesu mwaya kandi eKana yʼeGalĩlaya, aho abindulira amagetsi mo bĩnyũ. Nĩkwa eKapernaũma habya omũtabalĩ muguma, nʼomugala wuwe abya alwere. 47Omugulu owa ko Yesu abĩrĩlũa eYũdea nʼeriya eGalĩlaya, omũtabalĩ oyo mwahĩka uku Yesu, nʼerĩmũbũlya ati andagale erĩlamya mugala wuwe, kusangwa abya hakũhĩ nʼerihola. 48Neryo Yesu mwamubwira ati, Ĩnywe mwamatendilangira ebitiko-tiko nʼebyʼeriswekera, sĩmwendĩsyĩkĩrĩrya nʼahake. 49Omũtabalĩ oyo mwabũga na Yesu ati, Mukama, andagalirayo omwana wage ate ahola. 50Yesu mwamubwira ati, Genda, mugala wawe aneho. Omundu oyo mwĩkĩrĩrya ekĩnywa ekyo Yesu amubwira, neryo mwagenda. 51Neryo abagombe buwe mobahĩndana naye akandagala bati, Mugala wawe aneho. 52Naye mwabũlyabo esaa omwana wuwe atsũka erilama. Nabo mobamubwira bati, Mũlĩgolo oko saa sirinda erĩhũhana molyamũlũĩreko. 53Neryo ĩse mwaminya ko yabya oko saa eyo Yesu amubwira ati, Mugala wawe aneho. Neryo omundu oyo mwĩkĩrĩrya nʼenyũmba yiwe yosĩ.

54Ekĩ ni kitiko-tiko kyʼakabiri ekyo Yesu akola abĩlũa eYũdea akaya eGalĩlaya.

Currently Selected:

Yoane 4: KB80

Highlight

Copy