Yoane 11

Oluholo lwa Lazaro

1Neryo omundu oyukahulawa mo Lazaro, oyo wabya ĩkere eBetanĩa, mwalwala. Nĩkwa eBetanĩa kabya kayĩ ka Marĩa na mwali wabo ye Marata. 2Marĩa oyo yo wahakabaya ebisando byʼomukama amagũta awakakumba ndeke, kandi mwasangula ebisando biwe omo nzwiri siwe. Mugala wabo ye Lazaro yo wabya alwere. 3Abali babo abo mobatumira uku Yesu bati, Mukama, lebaya, oyo wanzĩre alwere. 4Nĩkwa omugulu Yesu owa, mwabũga ati, Endwala eyĩ si yʼerĩholya, nĩkwa ni busana nʼeripipa Nyamuhanga, Omugala wa Nyamuhanga abane olukengerwa muyo.

5Nĩkwa Yesu abya anzĩre Marata, na mwali wabo, na Lazaro. 6Neryo abere owa Lazaro kwʼalwere, mwasiba eyo abya yo biro bibiri. 7Neryo enyũma wʼaho Yesu mwabwira abiga buwe ati, Tusube eYũdea kandi. 8Abiga mobamubwira bati, Mũkangĩrĩrya, Abayũda babya bakasonda-sonda erĩkwĩta omo mabwe, nawe ukasubayo kwehĩ? 9Yesu mwasũbĩryabo ati, Omusibo siawite saa ĩkũmĩ nʼĩbĩrĩ kwehĩ? Omundu amalendera omwʼitungi, syalĩtwĩkala kusangwa akalangira ekyakakala kyʼekihugo kino. 10Nĩkwa amalendera omo kiro, akatwĩkala, kusangwa ekyakakala sikiri omwisi wuwe. 11Yesu mwabũga ebĩ, neryo enyũma wʼaho mwabũga ati, Omwĩra wetu abirigotsera; nĩkwa ngayayo ngayamũbũkaya omo tũgotserĩ. 12Abiga mobabwira Yesu bati, Mukama, amabya ayĩreto, asyalama. 13Nĩkwa Yesu abya akahula erihola liwe; nĩkwa mobaganĩrya bati ahula otũgotserĩ twʼomubiri. 14Neryo Yesu mwabwirabo ndeke ati, Lazaro abirihola. 15Nage namatsema busana nenyũ kusangwa sinabyayo, imwatoka erĩkĩrĩrya. Nĩkwa tuye eyo ali. 16Neryo Tomasĩ, oyukahulawa mo Muhasa, mwabwira abiga balĩkyabo ati, Netu tugende, nibya tuyahole haguma naye.

Yesu nĩ ʼlũbũka nʼengebe

17Neryo Yesu abere ahĩkayo, mweya Lazaro iniabiribya omwʼisinda mo biro bini. 18Nĩkwa eBetanĩa yabya hakũhĩ nʼeYerũsalema nga bilometre bisatu. 19Kandi Abayũda bangi babya ĩbabĩrĩhĩka ewa Marata na Marĩa, erĩkĩranĩabo busana na mugala wabo.

20Neryo Marata abere owa ko Yesu akahĩka, mwayahĩndana naye, nĩkwa Marĩa mwasĩgala ĩnĩanĩkere omo nyũmba. 21Neryo Marata mwabũga na Yesu ati, Mukama kumbe wabya hano, mugala wetu nga sialitahola! 22Nĩkwa na lino nyĩnasĩ ekĩndũkĩ wasyabũlya Nyamuhanga, Nyamuhanga asyakuhakyo. 23Yesu mwabũga naye ati, Mugala wenyũ asyalũbũka. 24Marata mwabwira Yesu ati, Nyĩnasĩ kwʼasyalũbũka okwʼĩlũbũka lyʼekiro kyʼenyũma-nyũma. 25Yesu mwamubwira ati, Ingye indi erĩlũbũka, nʼengebe. Oyũkanyĩkĩrĩraya nomo angahola asyabyaho. 26Nʼabosĩ abaliho bamanyĩkĩrĩrya sibendisyahola na kera. Wamĩkĩrĩrya ebyo kwehĩ? 27Naye mwamubwira ati, Ega Mukama! Nabĩrĩkĩrĩrya kʼuli Kristo, Omugala wa Nyamuhanga, oyukasa omo kihugo.

Yesu akalira

28Marata abere abĩbũga atya, mwayabirikira mwali wabo ye Marĩa, iniakamubwira bũbĩso-bĩso ati, Omũkangĩrĩrya ane hano, akakubirikira. 29Marĩa abere abĩowa ekĩ, mwahangana lũba, mwaya aho ali. 30Nĩkwa Yesu ĩsĩalĩahĩka oko mũyĩ oyo, nĩkwa abya aho Marata amwegaya. 31Neryo ababya haguma na Marĩa omo nyũmba bakamũkĩranĩa, omugulu balangira Marĩa akahangana lũba nʼeriya eyĩhya, mobamukwama. Baganĩraya bati akayalirira okwʼisinda.

32Omugulu Marĩa ahĩka aho Yesu ali, nʼerimulolako, mwawa ahisi oko bisando biwe. Neryo mwamubwira ati, Mukama, kumbe wabya hano, mugala wetu nga sialitahola! 33Neryo Yesu abere alangira Marĩa akalira, nʼAbayũda abasa haguma naye bakalira, Yesu mwakwa obũlĩge bo kutsibu omo mutima wuwe, kandi mwakwa engitsi. 34Neryo Yesu mwabũlyabo ati, Mwabirimuta hahi kwehĩ? Nabo mobamubwira bati, Mukama, wase Ũlebaye. 35Yesu mwalira. 36Neryo Abayũda mobabũga bati, Mũlebaye ngoko abya amwanzĩre. 37Nĩkwa abandi ba kubo bati, Oyo walĩbũla ameso wʼendĩmatĩme, Sĩangalekĩre omundu oyũ akatendihola kwehĩ?

Lazaro akalũbũka

38Neryo Yesu mwaswakwa obũlĩge bo kutsibu omo mutima wuwe, neryo mwahĩka okwʼisinda. Nĩkwa yabya mwangalũ nʼerĩbwe ryabya lĩkere kugo. 39Neryo Yesu mwabũga ati, Mũlũsayeho erĩbwe. Marata, mwali wabo oyo wabya aholĩre mwabũga naye ati, Mukama, oko ndambĩ eno alimukumba. Hamatakya biro bini aholĩre. 40Yesu mwamubwira ati, Mondetakubwira nyiti, Wamĩkĩrĩrya, wasyalola oko lukengerwa lwa Nyamuhanga kwehĩ? 41Neryo mobalũsyaho erĩbwe. Neryo Yesu mwasumba ameso wuwe ati, Tata, ngakuha ewasĩngya kusangwa wabya ũkanyowa. 42Kandi nyasĩ kʼũkanyowa ebiro byosĩ, nĩkwa ngabũga busana nʼabandu abimene hano, ibatoka erĩkĩrĩrya ko wanyituma. 43Neryo abere abĩbũga emyatsi eyĩ, mwabirikira nʼomulenge munene ati, Lazaro, huluka! 44Neryo oyo wabya aholĩre mwahuluka inianasenga-sengĩre omo ngimba oko byala nʼoko bisando, nʼobũsũ buwe ĩbũsengĩre omo lukimba. Yesu mwabwirabo ati, Mumusengule, agende.

Embĩta yʼerĩhandĩkĩrĩrya Yesu

(Mt 26.1-5; Mk 14.1-2; Lk 22.1-2)

45Neryo Abayũda bangi abahĩka ewa Marĩa, mobalangira ebyo Yesu akola, neryo mobamwĩkĩrĩrya. 46Nĩkwa abandi ba kubo mobaya ewa Bafarĩsayo, mobabwirabo emyatsi eyo Yesu akola. 47Neryo abahererĩ bakulu nʼAbafarĩsayo mobahĩndanĩa erĩbũgĩro, mobabũga bati, Tuyire tuti kwehĩ? Kusangwa omundu oyũ akakola ebitiko-tiko bingi. 48Twamamuleka tutya, abandu bosĩ basyamwĩkĩrĩrya, nʼAbaroma basyasa ĩbalũsyaho eHekalũ nʼekihanda kyetu kyosĩ. 49Nĩkwa omuguma wa kubo, ye Kayafa, oyo wabya Mũhererĩ Mukulu oko bahererĩ bosĩ oko mwaka oyo, mwabwirabo ati, Sĩmwasĩkĩ nʼahake! 50Kandi sĩmweganĩraya ngoko lyowene busana nenyũ, omundu muguma iniahola busana nʼabandu, ekihanda kyosĩ isikyahera. 51Nĩkwa mwatabũga ebĩ omo hamũlĩ yiwe ĩyowene, nĩkwa kusangwa abya Mũhererĩ Mukulu oko bahererĩ bosĩ oko mwaka oyo, mwaminyerera ati, Yesu akandisyaholera ekihanda kyʼAbayũda. 52Kandi si busana nʼekihanda ekyo kisa, nĩkwa atoke erĩhĩndanĩa haguma omo ndeko nguma abana ba Nyamuhanga abapanza-panzĩre ehosĩ. 53Neryo erĩtsũka oko kiro ekyo, mobaya embĩta yʼerĩĩta Yesu. 54Neryo Yesu mwataswalendera nʼeriminyikala omo katĩkatĩ kʼAbayũda, nĩkwa mwalũa eyo, mwaya omo kihugo ekyabya hakũhĩ nʼembwarara, oko mũyĩ owakahulawa mo Efũraĩmũ, neryo mwĩkalako nʼabiga.

55Neryo Ebiro Bikulu byʼAbayũda byʼErikiruka byabya hakũhĩ, kandi, abandu bangi abalũa okolĩ mobahetukira eYerũsalema embere wʼEbiro Bikulu byʼErikiruka, bati bakwame emitsye yʼerĩyerya. 56Neryo mobasonda-sonda Yesu, kandi omugulu babya bakimana omo Hekalũ, mobakanĩa omo katĩkatĩ kabo bati, Mũtĩkĩ? Muti anemwendiasa oko Biro Bikulu bino kwehĩ? 57Neryo abahererĩ bakulu nʼAbafarĩsayo babya ibabiritegeka bati omundu amaminya ahali Yesu, atũlego, batoke erimutsimba.

Currently Selected:

Yoane 11: KB80

Highlight

Copy