Yoane 10

Omũsyo wʼobutsunga bwʼesyombũlĩ

1Kwenene, kwenene ngababwira nyiti, Oyutelaba omo lũkyo lwʼobutsunga bwʼesyombũlĩ, nĩkwa akalaba handi, nĩ mũrahĩ nʼomũnyeyĩ. 2Nĩkwa omundu oyukalaba omo lũkyo nĩ mũlĩsya wʼesyombũlĩ. 3Neryo omũteya wʼolũkyo akamukingulira, nʼesyombũlĩ Sĩkowa omulenge wuwe, kandi akabirikira esyombũlĩ siwe omo mena wasyo, neryo akahũlũkĩraya syʼeyĩhya. 4Neryo amabĩhũlũkya esiwe syosĩ, akagenda embere wasyo, nʼesyombũlĩ sikamukwama kusangwa sĩnasĩ omulenge wuwe. 5Kandi sisyekwama owʼehandi, nĩkwa sikamusaga, kusangwa sĩsĩasĩ omulenge wuwe.

6Yesu mwatwĩrabo omũsyo oyũ, nĩkwa mobataminya nga ni myatsi yahi eyo abũga nabo.

Yesu Omũlĩsya wowene

7Neryo Yesu mwabũga nabo kandi, ati, Kwenene, kwenene ngabũga nenyũ, Ingye indi lũkyo lwʼesyombũlĩ. 8Abosĩ abasa embere syage nĩ barahĩ nʼabanyeyĩ, nĩkwa esyombũlĩ mosĩtowabo. 9Ĩngye indi lũkyo, omundu amingirira ũkwʼĩngye asyalamĩbwa; kandi asyingira nʼerihuluka, nʼeribana ebyʼerirya. 10Omũrahĩ akahĩka busana nʼerĩĩba lisa, nʼerĩĩta, nʼerĩherya. Ingye nasa babane engebe, kandi babane engebe nyingi eyĩtswagĩre.

11Ĩngye indi mũlĩsya wowene. Omũlĩsya wowene akasiga engebe yiwe busana nʼesyombũlĩ. 12Omũhĩngĩ, oyute mũlĩsya isi mwenye esyombũlĩ, akasĩgasyo, iniatibita omugulu akalangira embwa yʼomolĩ ikasa, neryo embwa yʼomolĩ ĩkapũrasyo, nʼeripanzasyo. 13Omũhĩngĩ akatibita kusangwa nĩ mũhĩngĩ, isialitsomana esyombũlĩ. 14Ĩngye indi mũlĩsya wowene. Kandi nyasĩ esyombũlĩ syage, nʼesyombũlĩ syage nasyo Sĩnyasĩ. 15Ngoko Tata anyasĩ, nage nyasĩ Tata; kandi ngasiga engebe yage busana nʼesyombũlĩ. 16Kandi nyiwite esindi mbũlĩ, esite syʼomo butsunga obũ; litolere inaletasyo nibya, nasyo syasyowa omulenge wage; syasyabya ekihangulo kiguma haguma nʼomũlĩsya muguma.

17Busana nʼomwatsi oyũ, Tata wage anyanzĩre kusangwa ngasiga engebe yage inatoka erĩswĩmyayo. 18Sihali mundu oyukanyisagulayo, nĩkwa ngasigayo omo hamũlĩ yage. Nyiwite ehamũlĩ yʼerisigayo, kandi ngwite ehamũlĩ yʼerĩswĩmyayo. Tata wage abirinyihana ati nyikole nyitya.

19Kandi mohaswahuluka erigabana omo katĩkatĩ kʼAbayũda busana nʼebĩnywa ebĩ. 20Abangi ba kubo mobabũga bati, Ali ko mbĩnga! Nĩ mũsĩre! Busana nakĩ mũkamowa kwehĩ! 21Abandi bati, Oyuli kwʼembĩnga sĩalĩbũga atya. Embĩnga yangatoka erĩrĩbũla ameso wʼendĩmatĩme, kwehĩ?

Abayũda bakagana Yesu

22Oko ndambĩ eyo Ebiro Bikulu byʼErihigula mobyabya eYerũsalema. 23Kandi omugulu oyo abya wʼeritsuku, neryo Yesu abya iniakalendera omo Hekalũ omo baraza ya Solomono. 24Neryo Abayũda mobamũtĩmbako bakamũbũlya bati, Esaa yingaha ũkatũganga-gangaya kwehĩ? Wamabya uli Kristo, utubwire ndeke-ndeke. 25Yesu mwasũbĩryabo ati, Mongababwira, nenyũ simwetĩkĩrĩrya. Emĩbĩrĩ eyo ngakola omo lĩna lya Tata wage, ĩkatũlago busana nage. 26Nĩkwa sĩmũlĩkĩrĩraya, kusangwa Simuli mbũlĩ syage. 27Esyombũlĩ syage Sĩkowa omulenge wage; kandi nyasĩsyo, nasyo sikanyikwama. 28Nage ngahasyo engebe yʼerikota, kandi nasyo sisyendisyahera na kera, kandi sihali oyo wangatoka erĩpũrasyo omo byala byage. 29Tata wage oyo wambasyo, ni mukulu oko bosĩ, kandi sihali wangatoka erĩpũrasyo omo byala bya Tata. 30Ĩngye na Tata tuli muguma.

31Abayũda mobaswatola amabwe kandi erimugusa goko. 32Yesu mwabwirabo ati, Nabĩrĩbakangya emĩbĩrĩ mingi yowene eyo Tata amba nyikoleyo; busana nʼomũbĩrĩ wahi mukanyigusa kwʼamabwe kwehĩ? 33Abayũda mobamũsũbĩrya bati, Sĩtwekũswĩraya amabwe busana nʼomũbĩrĩ owene, nĩkwa busana nʼeritsuma Nyamuhanga! Kusangwa uwe mundu buyira, ukayiyira mo Nyamuhanga! 34Yesu mwasũbĩryabo ati, Sĩkĩsakĩre omo Migambo yenyũ kwehĩ, iti, Nyamuhanga mwabũga ati, Muli esyonyamuhanga? 35Tũnasĩ kwʼAmasako sialiketawa, neryo Nyamuhanga abiribirikirabo mo syonyamuhanga abo ekĩnywa kya Nyamuhanga kyahĩkako. 36Nĩkwa ĩngye, Tata abirinyihigula nʼerinyituma omo kihugo. Neryo mukanyahula muti, Ukatsuma, kusangwa nabũga nyiti indi Mugala wa Nyamuhanga kwehĩ? 37Namatindakola emĩbĩrĩ ya Tata wage, sĩmũnyĩkĩrĩraye. 38Nĩkwa namakolayo, nomo mwangabya mũtanyĩkĩrĩrye, mwĩkĩrĩraye emĩbĩrĩ eyo, mutoke eriminya nʼerĩkĩrĩrya ngoko Tata amatikene ũkwʼĩngye, nage nyimatikene na Tata.

39Kandi mobasonda-sonda erimutsimba, nĩkwa mwasunukala omo byala byabo.

40Neryo Yesu mwaya kandi eyisirya wʼeYorodanĩ aho Yoane abatĩsĩraya erĩmbere, neryo mwĩkalayo. 41Kandi abandu bangi mobamũhĩkako, mobabũga bati, Yoane mwatakola ekitiko-tiko, nĩkwa emyatsi yosĩ ahula busana nʼomundu oyũ, yabya ya kwenene. 42Kandi abandu bangi mobamwĩkĩrĩrya eyo.

Currently Selected:

Yoane 10: KB80

Highlight

Copy