2 Abanya Korĩnto 4

Obuteke bwʼOmũlĩmũ

1Neryo kusangwa Nyamuhanga abirituganyira nʼerituha omũbĩrĩ oyũ, sitweremerawa. 2Nĩkwa tukagana emyatsi eyo bũbĩso-bĩso eyʼesĩsonĩ, isitwalendera omo matebo. Kandi sĩtũlĩhengemaya ekĩnywa kya Nyamuhanga, nĩkwa tũkamĩnyĩkalaya ekyʼekwenene, ĩtũkayĩmĩnyĩsaya busana nʼerĩsĩmwa embere syʼobunyamutima bʼobuli mundu, embere sya Nyamuhanga. 3Kandi Engulu Yowene yetu yamabya ĩbĩsamĩre, ĩkabĩsama busana nʼabandu abakatogota. 4Sĩbalĩkĩrĩraya kusangwa nyamuhanga mubi wʼekihugo kino abĩrĩrĩba ameso wʼobũlengekanĩa bwabo ati sibalangire ekyakakala kyʼEngulu Yowene eyʼolukengerwa lwa Kristo, oyuli kĩsosekanĩo kya Nyamuhanga. 5Kundi sĩtweyĩtũla goko, nĩkwa tũkatũlago ngoko Kristo Yesu ni Mukama, netu tuli bagombe benyũ busana na Yesu. 6Kusangwa Nyamuhanga oyo wabũga ati, Ekyakakala kĩkoleraye omo mwĩrĩmya, ni iye abĩrĩkolerya omo mitima yetu nʼerituha ekyakakala kyʼeriminya olukengerwa lwa Nyamuhanga oluli omo bũsũ bwa Kristo.

7Nĩkwa ĩtwe tuwite obuteke obũ omo mubiri wʼekitaka, neryo obũtokĩ bunene obo bubye bwa Nyamuhanga butsira bwetu. 8Tukagalawa ngendo nyingi, nĩkwa sĩtwebũnĩka; tukatika-tika, nĩkwa sĩtũlĩsĩganĩraya. 9Tũkendererĩbawa, nĩkwa sĩtwesĩganĩbawa ĩtwebene; tũkahũnzawa, nĩkwa sĩtũlĩtogotĩbawa. 10Ebiro byosĩ tuli ngʼabandu abakaheka omo mibiri yabo oluholo lwa Kristo, neryo engebe ya Yesu iyatoka eriminyikala omo mibiri yetu. 11Kusangwa emigulu yosĩ tuli omo bwĩko bwʼoluholo busana na Yesu, neryo engebe ya Yesu iyatoka eriminyikala omo mibiri yetu eyikahola. 12Neryo oluholo luli hakũhĩ netu, nĩkwa engebe ikakola omwisi wenyũ.

13Netu tuwite ekĩrĩmũ kyʼerĩkĩrĩrya, ngoko kĩsakĩre kiti, Monabũga kusangwa monĩkĩrĩrya. Ko litya netu tũkabũga kusangwa twabĩrĩkĩrĩrya; 14kusangwa tũnasĩ ko Nyamuhanga oyo walũbũkaya Omukama Yesu, asyatũlũbũkya haguma na Yesu, nʼerituleta embere siwe haguma nenyũ. 15Kandi emyatsi yosĩ eyĩ ni busana nenyũ, neryo olukogo lwa Nyamuhanga lũkahĩka oko bandu banene. Neryo abandu bangi bahe ewasĩngya nʼeriha olukengerwa uku Nyamuhanga.

Eribyaho busana nʼerĩkĩrĩrya

16Neryo busana nʼemyatsi eyĩ sitweremerawa. Nĩkwa nomo mibiri yetu ikakula, nĩkwa ebĩrĩmũ byetu bikayirawa mo bihya-bihya obuli kiro. 17Kusangwa obũlĩge obũ bwangũhĩre, nĩ bwʼakatambĩ kake, bwasyatuletera olukengerwa lwʼerikota, olũlabĩre olulengo. 18Kusangwa tukakwama emyatsi itelolawako. Situlikwama emyatsi eyikalolawako. Kandi emyatsi eyikalolawako nĩ yʼakatambĩ kake, nĩkwa emyatsi eyitelolawako ni yʼerikota.

Currently Selected:

2 Abanya Korĩnto 4: KB80

Highlight

Copy