Matayo 11

Eirriwaka Yohana Olaibatisani lkiliku

(Lk 7.18-35)

1Ore pee eidip Yesu aitanapa ilooiteng'eni lenyena tomon o are, neing'uaa ine nelo aiteng'enisho, nelikioo ororei too nkang'itie naamanita ine.

2Nening Yohana eena te korokoroni nkiasin e Kristo, neirriwaki ilooiteng'eni lenyena nejoki, 3“Ai yie elde olotu ana keetae likae likiaanyu?”

4Newaliki Yesu ajoki, “Enchom entoliki Yohana imbaa nining'itoto o nidolitata. 5#Isa 35.5-6, 61.1 Etodolishote ilmodook, nepuo ilmaiman, neishiunyeki le nkeeya oo lbolot, nening'ishoyu lming'anta, neitopiuni ilootuata, ore ilaisinak, nelikini Ororei Supat le Nkai. 6Nemayiana olemetum olkob te nanu.”

7Ore pee epuo ninche neimaki Yesu Yohana to lorere ajoki, “Ainyoo ishomo intae aadol ti ong'ata? Kolperesi oyuk enkijape? 8Kake aainyo pee impang'a aapuo? Ko ltung'ani oishopito nkilani naapuyiapui ishomo aadol? Ng'ura, ore ilooishop inkilani naapuyiapui nkajijik oo laiguanak etii. 9Kake ainyoo pee impang'a aapuo? Ko loiboni le Nkai ishomo aadol? Ee pae olkitok olang oloiboni le Nkai. 10#Mala 3.1 Amu ninye eimakaki pee etisiraki aajo, ‘Ng'urai airriwaa olkipaaret lai aiturukie te iyie, likintobiraki enkoitoi ino.’ 11Esipa ajoki intae, eitu etumi ae kata too ltung'ana ooiu nkituaak, olkitok olang Yohana Olaibatisani. Kake ore oloti aisul te nkitoria e shumata naa kitok te ninye. 12#Lk 16.16 Ore ebaiki nkolong'i e Yohana Olaibatisani o taata eisimitai te ngolon enkitoria e keper, neisimaa iloogol. 13Amu eibonishote loibonok pooki le Nkai nkitanapat o metabaiki Yohana; 14#Mala 4.5; Mat 17.10-13; Mk 9.11-13 naa te naa iyieuwu ning'amumu ena, ele doi Eliya, olapa olotu. 15Oloata nkiyiaa toning'o.

16“Ainyoo aitanyaanyukie ltung'ana le na kata? Etiu anaa nkera naatoni too neemirishoreki, neipot inkulie nejoki, 17‘Kitooshokitio intae ndulen neitu iranyiranya; nikinchirakita intae neitu nchirishiri.’ 18Amu eewuo Yohana nemedaa, nemeokisho, nejo ltung'ana, ‘Keeta oloirirua.’ 19Ore Enkerai e Tung'ani neewuo nedaa, neokisho, nejo ninche, ‘Eng'ura oltung'ani oulu, olaokoni le naisho naa olchore loo loosotu kodi o laing'okok!’ Kake too nkiasin etokorduaki kulo ti atua ltung'ana, pee eaku ilng'anayio le dukuya le Nkai o lo Lkuoo le Ker.

Eisikong'a Yesu nkang'itie neitu eirridu

(Lk 10.13-15)

20Neiteru aisikong nkang'itie naataasie siaitin enyena e nking'asia, amu eitu eirridu ng'ok enye, 21#Isa 23.1-18; Esek 26.1–28.26; Yoe 3.4-8; Amo 1.9-10; Saka 9.2-4 “Ee kake ayia Korasin, ee kake ayia Betsaida, amu te naa ketaasaki inenking'asia naataasaki ti atua intae, te Tiro o te Sidon anaata erridutua apa moitie, nepika ilkuniyiani o nkuruon. 22Kake ajoki intae, keikashieki Tiro o Sidon te nkolong e nkiguana aaitalang intae. 23#Isa 14.13-15; Enk 19.24-28 Oi iyie Kapernaum aa ijo eikisisi aailepie shumata? Ae kintadouni tabaiki enemeneng'a. Amu ore isiaaitin naataasaki ti atua iyie, te naa ketaasaki apa te Sodom anaata eton eetae ina ang o tene. 24#Mat 10.15; Lk 10.12 Amu esipa ajoki intae, keikashieki enkang e Sodom te nkolong e nkiguana aaitulusoo te iyie.”

Wootu enatii eyeng'iyeng'ata

(Lk 10.21-22)

25Neitoki Yesu ajo te ina kata, “Aaisho iyie enashe, Papa Olaitoriani le shumata o enkop, amu isudorie kuna baa iltung'ana ng'eni niboloki nkera. 26Ee neijia etiu Papa amu ina nikintishipa iyie.

27 # Yhn 3.35, 1.18, 10.15 “Aaishoo Papa pooki toki, nemeetae hoo obo oyiolo ina Kerai leme Papa ake, nemeetae hoo obo oyiolo Papa leme ina Kerai ake o pooki ng'ae ogelu Enkerai aboloki.

28“Wootu enatii intae pooki oonyamal niatata ilolan ooiroshi, pee ayeng'iyeng'ie intae. 29#Yer 6.16 Enteleiki ate enchata ai oo murto, enteng'ena ate te nanu, amu kabor nemawuasa to ltau, naa itumutumu intae enkiyeng'iyeng'ata ti atua nkorroki inyi; 30amu kelelek enchata ai oo murto naa keneneng olola lai.”

Currently Selected:

Matayo 11: MBS

Highlight

Copy