Matayo 10

Noolo ilooiteng'eni lenyena pokira tomon o aare

(Mk 3.13-19; Lk 6.12-16)

1Neipot lelo ooiteng'eni lenyena tomon o aare, neisho meitoria nearaa iloiriruani ooiduruk, neishiunye sii mpukunot pooki oo mueyiaritin o nkeyaitin. 2Naa kuna nkarn oo looiteng'eni lenyena pokira tomon o aare; ole dukuya Simon oji Petero, o Andrea olalashe lenye; Yakobo le Sebedayo o Yohana olalashe lenye; 3Filipo, o Bartolomayo; Tomas o Matayo olasotoni le kodi; Yakobo le Alfayo, o Tadayo; 4Simon onyor olosho lenye o Yudas Iskariot laa ninye oishooyie Yesu.

Eitanapa neirriwaa lelo pokira tomon o aare

(Mk 6.7-13; Lk 9.1-6)

5Kulo pokira tomon o aare eirriwayie Yesu neitanap ajoki, “Emipuo nkoitoi oo Loreren, nimijing'ijing'i enkang hoo nabo oo ltung'ana le Samaria 6kake enchom enetii ntare kiminat e nkaji e Siraeli. 7#Lk 10.4-12 Ore ipuopuo, entolikioi entejo ‘Etinyikua enkitoria e shumata.’ 8Enchiunye iloomuei, entopiu ilootuata enchiunye iloota enkeeya oo lbolot, entaarai iloiriruani. Eishooki intae pesho, enchooi sii intae pesho. 9Emishoroo sahabu anaa mpesai too nkimeitani inyi, 10#1 Ilkor 9.14; 1 Tim 5.18 nimishoroo embene te lototo inyi, anaa nkilani maare, anaa namuka, anaa eng'udi, amu eishiaakino olaisiaayiani endaa enye. 11Ore pooki ang sapuk o enkiti nijing'ijing'i, enkilikuanisho tenaa ketii oltung'ani supat atua, nitonini tenebo ninye o metaba anaa nidumunyenye aapuo. 12Na ti nijing'ijing'i enkaji eroroki. 13Naa te neishiaakino intae ina aji, nejing osotua linyi shumata ninye, naa te nemeishiaakino, neshukokino intae osotua linyi. 14#Iat 13.51 Ore pooki ng'ai lemeng'amaa intae, anaa olemening ororei linyi, ore pee ipukuku aaing'uaa ina aji, anaa ina ang, nimpiripiroo enterit natii nkejek inyi. 15#Mat 11.24; Enk 19.24-28 Esipa ajoki intae, keikashieki Sodom o Gomora te ina ang te nkolong enkiguana.

Kelotu osina

(Mk 13.9-13; Lk 21.12-17)

16 # Lk 10.3 “Eng'urai airriwayie intae anaa nkerra atua suyian, enteng'enita anaa lasuriaa, niborrurru anaa nturkuluni. 17#Mk 13.9-11; Lk 12.11-12, 21.12-15 Kake entodol ate too ltung'ana amu keishooyo intae meiguanareki neidong intae ti atua nkajijik enye e ntumo. 18Naa keriki intae dukuya ilbalosini o laiguanak te nkaraki nanu, pee iakuku shakeni te ninche o too Loreren. 19Kake ore ina kata te nerik intae, eming'aeng'ae aajo, ‘Kaa kijo’, amu keishori intae te ina kata enijojo. 20Amu mme intae ooiro, Enkiyang'et e Papa linyi nairo ti atua intae.

21 # Mk 13.12; Lk 21.16 “Naa keishooyo olalashe olikae, metaari metua, neishooyo menye enkerai, nedumakino nkera ntoiuo enye neishooyo ninche metaari metuata. 22#Mat 24.9,13; Mk 13.13; Lk 21.17 Naa keibayu intae iltung'ana pooki, enkaraki enkarna ai, kake ore olong'iri metabaiki enkiting'oto nejeu. 23Naa te nearari intae te na ang, esikaki enkae, amu esipa ajoki intae, miishushu nkang'itie e Siraeli pooki eitu elotu Enkerai e Tung'ani.

24 # Lk 6.40; Yhn 13.16, 15.20 “Melang oloiteng'eni oloiteng'en ninye, nemelang osinka oloitore ninye. 25#Mat 9.34, 12.24; Mk 3.22; Lk 11.15 Eidip oloiteng'eni te netiu anaa oloiteng'en ninye, netiu osinka anaa oloitore ninye. Asa taa etejo olopeny enkaji Beelsebul, kebaa eitulusoo aajo neijia lootii enkaji enye!

Ele entureita

(Lk 12.2-7)

26 # Mk 4.22; Lk 8.17 “Metaa emiure ninche amu, meetae embae naisudoyioki nemeyiolouni. 27Ore enajoki nanu intae te naimin embalunye te wang'an, ore enining'ining'i te nkiok, entolikioi too nchumarot oo nkajijik. 28Emiureyu ilooar osesen nemeidim aatar enkiyang'et, enare ti niureyuyu ilo oidim aidaikie pokira are enkiyang'et o sesen ti atua olbalbal le nkima. 29Ai meinosieki ntiitiini are esenti nabo, kake mesulunye nabo aosh enkop, meyiolo Papa linyi. 30Ore ninche intae, eikenaki o metabaiki lpapit loo lukuny inyi. 31Ore enkaraki e ina emiureishoyu amu, inkashikasha aalang intiitiini kumok.

32“Ore naa pooki laaibalie te dukuya ltung'ana, naa kaibalie sii ninye te dukuya Papa lai otii shumata. 33#2 Tim 2.12 Ore pooki laamiki te dukuya ltung'ana naa kamiki sii nanu ninye te dukuya Papa lai otii shumata.

Olalem eyau Yesu mme osotua

(Lk 12.51-53; 14.26-27)

34“Emidamu nijojo kaewuo ayau osotua enkop; eitu alotu ayau osotua, kake olalem ayawua. 35#Mik 7.6 Aewuo nanu airriki oltung'ani o menye nairriki entito o ng'otonye, nairriki entito o enkaputani. 36Ore lmang'ati lo ltung'ani keaku lelo le nkaji enye.

37“Ore olonyor menye anaa ng'otonye aitalang nanu, anaa olonyor olayioni lenye anaa entito enye pee aaitalang nanu, nemaishiaakino nanu. 38#Mat 16.24; Mk 8.34; Lk 9.23 Ore olemenap osalaba lenye naasuju nemaaishiakino nanu. 39#Mat 16.25; Mk 8.35; Lk 9.24, 17.33; Yhn 12.25 Ore ologolie enkishui enye neiminie, ore oloiminie enkishui enye enkaraki nanu negolie.

Olerrinyore

(Mk 9.41)

40 # Mk 9.37; Lk 9.48, 10.16; Yhn 13.20 “Ore olong'amaa intae, nanu etang'amayie, ore olaang'amaa nanu naa ilo lairriwua etang'amayie. 41Ore olong'amaa oltung'ani supat te nkaraki naa supat, netum olerrinyore lo ltung'ani supat. 42Ore oloitook obo le kulo ooti, enkikompe e nkare nairobi enkaraki naa oloiteng'eni lai, esipa ajok intae, meimin olerrinyore lenye.”

Currently Selected:

Matayo 10: MBS

Highlight

Copy