Maliko 14

Ikigaho icha ukumuwulaga Yesu

(Matayo 26:1-5; Luka 22:1-2; Yohane 11:45-53)

1Lino yefyefisige filo fivili hela ukufika ikimunyi ikikomi icha i Pasaka na ikimunyi cha imikate je simihate uwuhahu. Avatambisi avavina na avigisi va indagilo vasakige ikigaho icha ukumwibata Yesu kwa kinyele sambi vamuwulage. 2Neke vatigile, “Tulamwibata ukumwibata pa ikimunyi ikikomi, valonga avanu vatugalukile.”

Yesu ihululisiwa amafuta ku Betaniya

(Matayo 26:6-13; Yohane 12:1-8)

3Yesu ahele ku Betaniya neke peali mukaye ya Simoni umutamwa uwukoma, ateng'eme pawulilo ilya, aasile umung'inetu yeakolye mumawoko gakwe ikisupa icha amafuta amanyakunung'ila wunofu kangi gamagobole molofu, swe akumuhululisa Yesu mumutwe gwakwe. 4Neke avanu avangi avebaho vavifile, vitigila, “Mbi ndawuli akwihesigila amafuta agindawe iga? 5Pakuva amafuta agindawe iga gake gagusiwa ukulutila magobole magana gadatu, neke vapelwe avamikaa!” Neke vamulonge fivi umung'inetu yula.

6Neke Yesu avatigile, “Mumuleke; mbi ndawuli mukumufwahisa? Amije lukani lunofu. 7Pakuva avamikaa mwinawo mbepali, muhwanite ukuvatanga ulusika lulweluvesaga pemuwendite ukuvapigila wunofu. Neke nene si mba na nyenye mbepali. 8Umung'inetu uyu apigite lweawene lumuvaje alupige, agubakite umuvili gwangu amafuta amanofu angelanise nene ulwa ukutagwa kwangu. 9Nachene nene nguvalongela, bahaludalikwaga Ulukani Ulunofu mung'i mbeyili ndita na lulu lweapigite uyu salutambulwa kwa ukumwiwuka.”

Yuda akwidikila ukumupituka Yesu

(Matayo 26:14-16; Luka 22:3-6)

10Swe Yuda Isikalyote, uyumwi va vala vanyichumi na vavili, ahele kwa avatambisi avavina sambi amupituke Yesu kwa avene. 11Avatambisi avavina vavelige vipulika ulo neke vahekelele hilo, vamuhuvise ukumupela amagobole. Swe Yuda ivanga ukusaka ikilega na ulusika ulunofu sambi amupituke Yesu.

Yesu igelanisa ichakulya cha i Pasaka na avanyigendo vakwe

(Matayo 26:17-25; Luka 22:7-14, 21-23; Yohane 13:21-30)

12Ikimunyi cha ukutala cha ikimunyi ikikomi cha imikate je simihate uwuhahu, ipo pepene peyayidumulwa ing'olo ya Pasaka, avanyigendo vakwe vamuwusise vitigila, “Kwiyaga kwewiwenda tukakugelanikise ichakulya cha i Pasaka?”

13Swe Yesu akuvatuma avanyigendo vakwe vavili akuvatigila, “Mubite muboma, na mumo mwitang'ana munu yumwi ategwe ikisilo cha ululenga mumufwatage yuyo, 14mbaka mukaye yeasakwingila, umo mumulongelage umunyakaye ukutigila, ‘Umwigisi itigila: ikaye ya avagenzi ndile i Pasaka na avanyigendo vangu?’ 15Nave avalagila ibwalo ingomi pachanya mbuyape wunofu. Ipo pemugelasage ichakulya.”

16Avanyigendo vavelige vibita muboma, vafikite ndawe Yesu weavalonje. Swe vigelanisa i Pasaka. 17Chavelige kifika ikinyamiyhe, Yesu aasile pamwinga na vanyigendo vakwe vanyichumi na vavili. 18Na peviva pawulilo vilya, Yesu avalonje ukutigila, “Nachene nene nguvalongela, uyumwinga va nyenye amituka.” 19Swe vivanga ukuhuguvala, na ukumuwusa yumwi yumwi, “Napo ye nene?” 20Neke Yesu, avatigile, “Uyumwi va nyenye vanyichumi na vavili, yeilila inonge na nene mukinyandilo. 21Pakuva Umwana va Umunu akwibitilaga ndawe lweandikilwe, neke inalyo umunu yula yeakumupituka Umwana va Umunu! Luke luva ikiba umunu uyo alaleke ukuwoneka!”

Ichakulya cha Umutwa

(Matayo 26:26-30; Luka 22:14-20; 1 Avakolindo 11:23-25)

22Na lwevalisige pala pawulilo, Yesu inwe umukate, swe ifunyilila, swe imegula swe akuvapela itigila, “Mukote ugu gwe muvili gwangu.” 23Neke peinule ikinywelo swe ilumba, swe akuvapela; swe vinywela mbevali kicho. 24Swe akuvatigila, “Iyi ye danda yangu ya ulufingano, yeyikwitika ukwimila awolofu. 25Nachene nguvalongela nyenye sindilagele kangi nywe umuveleko gwa umusabibu mbaka ikimunyi kila chesanywa umupya kuwutwa wa Nguluvi.” 26Neke baho vavelige vakwimba ulwimbo, sweno vihuma vibita kukidunda cha imiseituni.

Yesu ipava ukubihilwa na Petulo

(Matayo 26:31-35; Luka 22:31-34; Yohane 13:36-38)

27Yesu avalonje ukutigila, “Mbemuli nyenye mung'imbila ikilo icha neng'ino, pakuva lwandike: ‘Ndimutova umukwamila ng'olo, nasing'olo sitagalila.’ 28Neke peyesilibwike, sandongola ukubita ku Galilaya.” 29Petulo amutigile, “Nambi mbevali vakumbihila veve nu kukuleka, nene singubihila nda!” 30Nachene ngukulongela, “Ikilo iki, inzogolo wesiyilavika ulwakavili, veve uva ung'anite kadatu.” 31Neke Petulo awile ukwilapa, “Na lumbagile ukufwilasa na veve nambi ndahihyo singukana nda.” Na vanyigendo mbevali valonzile ndahihyo.

Yesu akwifunya pa Getisemane

(Matayo 26:36-46; Luka 22:39-46)

32Swe vavelige vifika apono apitambulwa Getisemane. Yesu avatige avanyigendo vakwe, “Mwikale baha nene pengwifunya.” 33Neke avategule Petulo, Yakobo na Yohane; swe ivanga ukuhuguvala munumbula. 34Swe akuvalongela, “Nene nyuguve hilo munumbula ngwenda fwe, mwikalage baha kono we mwimiho.” 35Swe ibita pawutalo ludodo swe igwa panyi kinyalileme, neke avange ukwifunya ulwa, wone luke luhwane, alemwe ukwingila mu kivalilo cha uluteseko. 36Neke atigile, “Dada vangu, kwa mbesili sasihwana. Nyesekese ikinywelo iki cha uluteseko ulu ulwene salulava ndawe lwendiwenda nene. Ulwa luvelage ndawe lwewiwenda veve.”

37Avelige ipiluka ku vanyigendo vakwe avadatu, avafikite vagonelye tulo. Swe akumuwusa Petulo, “Simoni! Mbi ugonelye? Ulemilwe pakwikala miho nave kivalilo kimwi?” 38Swe akuvalongela, “Mwikalage miho mwifunye sambi mulemwe ukwingila mu kugelwa. Inumbula yiwenda neke umuvili gwina muhwehwe.”

39Ahele kangi kukwifunya ipilukila ing'ani sisila. 40Neke apiluke kangi, avafike vagonelye. Pakuva amiho gawo gegatimbite na tulo valemilwe ukumupitula nambi lukani.

41Avelige akuvasila ulwa wudatu avatigee, “Pemugonelye tulo nu kusuupa? Lino lukwilye! Ulusika yelufikite! Umwana va Umunu ukutawulwa mumawoko ga vanu avanyanzanangifu. 42Muwuke, tubitage. Mulavage yula umunyakumituka yeahegelye.”

Yesu akwibatika

(Matayo 26:47-56; Luka 22:47-53; Yohane 18:3-12)

43Ino Yesu we pealonga, Yuda yula uyumwi va vala avanyichumi na vavili, afikite na ililugu lya avanu vakolye amamage na ifisonzo. Avanu avevatumitwe na avatambisi avavina, na avigisi va indagilo na avavina va avanu. 44Yula Yuda umunyakumupituka Yesu yee avapelye ikilagilo: itigila, “Yula yendimunonela yemwene, yemwibatage na ukumutegula wunofu.”

45Yuda avelige ifika hela, ahele kwa Yesu agolwike, na ukumutigila, “Mwigisi!” Swe akumunonela. 46Swe avanu vakumwibata Yesu, vakumupinga. 47Uyumwi va vala veve vimise na Yesu, ategwe ilimage lyakwe swe akumuputa ilipulikilo umukami va Umutambisi Umuvina. 48Yesu avatigee, “Mbi ndawuli, musile mukolye mamage na ifisonzo mukundibata nene witigila ndimuhiisi? 49Mbepali ndavesige na nyenye mu tembeli ngwigisa, na simwandibatigi. Leke luve sambi Uwandike Uwelu wukwilye.” 50Swe avanyigendo vakwe mbevali vikimbila vakumuleka iyena. 51Ino epwali umunyakilambo uyumwi yeamuminilige Yesu kono weafwite kinyasingo, nayuyo vasakige ukumwibata. 52Neke munyakilambo yula asupatuke akuguleka na gumwenda, swe ikimbila wufuula.

Yesu ihigwa

(Matayo 26:57-68; Luka 22:54-55, 63-71; Yohane 18:13-14, 19-24)

53Swe vakumusindika Yesu kwa umutambisi Umuvina pala pe avatambisi avavina mbevali na avavina va avanu na avigisi va indagilo vevakong'ine. 54Petulo amufwatige Yesu kwa pataali swe akwingila mwidama ilya Umutambisi Umuvina, neke ateng'emale pamwinga na avanyigalu akota umoto. 55Avatambisi avavina mbevali na avavina va pawuhigilo mbevali vasakite uwolelesi wewumusongela Yesu ahigwe ukufwa neke wuve siwawoniki.

56Avanu wolofu vevalonzile uwolelesi wa uwudesi vakumolelela Yesu, neke uwolelesi wawo wuve siwukwiyidikila wisutana pakomi. 57Neke avamwi viime, valonge uwolelesi wa uwudesi vitigila, 58“Twamupulike Umunu uyu itigila, ‘Ndenya itembeli iyasenzilwe na amawoko ga avanu, na mu filo fidatu nzenga iyingi yesinzenge na amawoko.’” 59Neke nabaho uwolelesi wawo wave siwikwiyidikisa nambi.

60Swe Umutambisi Umuvina, akwima pagati, neke amuwuse Yesu, “Siwipitula lukani? Avanu iva vakukolelela kiki veve?” 61Neke Umwene akatwike sili siapitwi lukani. Umutambisi Umuvina amuwusise kangi, “Veve ye wi Kilisito, ve Mwana va Nguluvi umunyandolo?” 62Neke Yesu atigile, “Ena ye nene. Kangi samumuwona Umwana va Umunu ateng'eme kwiwoko ilya kundyo lya umunyaludali mbeluli akusa mumafufu ga kuchanya.” 63Swe ipo Umutambisi Umuvina, ivipa na ukudemulanga umwenda gwakwe gwealafwite na ukutigila, “Tuvapetusaka awolelesi veki kangi? 64Mumupulike lwe iliga Nguluvi! Lino nyenye mwitigila ndawuli?” Mbevali valonje pamwi uyu afwisage hela. 65Swe avanu vivanga ukumufunyila amati vakumudinda kumiho vakumutovanga na ukumutigila, “Tulongele yenani yeakutofile!” Na avanyigalu nawo vamutofile na ifipi.

Petulo akumubihila Yesu

(Matayo 26:69-75; Luka 22:56-62; Yohane 18:15-18, 25-27)

66Petulo lwealateng'eme pala pidama, uyumwi va avakami avang'inetu va umutambisi umuvina aasile. 67Avelige akumuwona Petulo akota umoto, amulafile, swe akumutigila, “Nayuveve uke pamwi na Yesu Umunasaleti.” 68Neke Petulo akane, “Sindiluseli, na singulukagula na lwe wilonga!” Swe Petulo iwuka pala, ibita pivala ulusika lulo inzogolo yavikite. 69Yula umukami umung'inetu avelige akumuwona kangi Petulo, avalonje avanu ave vimite pivala, “Umunu uyu nave muyawe va vavala.” 70Petulo akanite kangi. Pambele ludodo, avevimite pala vamutige Petulo, “Nachene veve wimuyavo, pakuva nayuveve wi Mugalilaya.”

71Neke Petulo avange ukwifingulisa akwilapa, “Nene sindimuseli uyu yemwilonga ing'ani sakwe” 72Swe ipo inzogolo yivika lwa kavili. Neke Petulo iwuke lwealamulonje Yesu ukutigila, “We inzogolo siyilavika lwa kavili, uva umbihye kadatu.” Petulo lwamuvafile neke avembe ahulusage na inzihosi.

Currently Selected:

Maliko 14: HeNT2004

Highlight

Copy