2 Avakolindo 10
10
Pawulo akwiyaamila ulwa ikipigo chakwe
1Nene ye yinene Pawulo, yendiwoneka ulwa ndimulele pendilipamwi nanyenye, neke ndimukali pendilipataali nanyenye, nguvasuka kwa ulusungu nu wunofu wakwe Kilisito. 2Nguvasuka mulasagasa sambi mbe ndimukali ulusika lwe ngusa, pakuva ndina nzeli ulwa ndivakalipila mbevali avakwihosa ukuta hwehwe twigendela imigendele ja mung'i hela. 3Ulwene nachene twikalite mung'i neke situkwihoma ligalu ukwiga lwa mung'i. 4Pakuva, amahomelo getwikola mwigalu lyetu, si gala amahomelo ga mung'i, pesi ukwimila uludali lwa Nguluvi ulwidenyaga amapuli mbegali. Twakwananga uwusugusugu mbewuli wa uwudesi, 5tukwananga imbesa mbesili na ifya ulwidudumbo ifibesa uwukagusi wa Nguluvi; kangi twigalula amahosa mbegali gave na choga kwa Kilisito. 6Peye mukwilaniche muchoga, hwehwe yetwigelanise ukupumya na ukuhiga lweluvesaga lwa uwugaya choga.
7Nyenye mwilavaga ing'ani isa mwivala hela. Mbi, pwali umunu yeyeavesaga yakwihosa ulwa umwene ye munu va Kilisito? Lunofu! Sweno, atuhosage nahwe ulwa nayi hwehwe kangi twi vanu vakwe Kilisito ndawe umwene uyo lwa nave munu va Kilisito. 8Nambi mbe ndiwoneka ndandigina ukwidudumbila ululagilo lwe Nguluvi atupelye, ululagilo lwa ukuvasikimika nyenye, siwita lula uluvambusa nyenye mugwe nda. 9Sindiwenda muhose ulwa nene ndisaka ukuvakabusa nyenye kwa ibalula sangu. 10Pakuva vitigila ukutigila, “Ibalula sa Pawulo ng'ali kangi simemite ing'ani inalamu, neke umwene palipamwi na hwehwe muhomefu, nambi peilonga ing'ani sakwe ngaya kinu.” 11Na umunu yeilonga ndahihyo ikiba iwuke ulwa ing'ani setukwandika mu balula petuli pataali, na ing'ani setwilonga petuli pamwi na nyenye sisiliwungi nda.
12Na kwa lwelweluvesaga hwehwe situhwaniti twivike nambi ukwiteganisa na avanu vala vevakwisumila vavene. Avanu vevakwivika vavene vave kigelo icha ukwigelela, na avanu vevakwiteganisa vavene kwa vavene, iwo vapuva. 13Neke hwehwe sitwidudumba ukulutisa; ukwihala uko kutegana hela na ikigelo cha kila ikipigo chetwapelitwe na Nguluvi, ikipigo chetuhele twipiga kangi na ukwenyu. 14Na pakuva nyenye muli mumo munanana mwetupigila, sitwalowiki ndusa petwasige ukwenyu, petukuvaletela Ulukani Ulunofu lwa Kilisito. 15Sweno, situkwilumbila ikipigo chevapigite avangi ukulutisa ikigelo chetwapelitwe; pesi ukuta lino tukwihuvila ulwa ulufuuwo lwenyu longelekela mwa nyenye ukutegana na ikigelo cheatupelye Nguluvi. 16Ipo petuhwana ukudalika Ulukani Ulunofu mung'i isingi, apataali na nyenye; na ulo si luva lwa nyenye ukwidudumbila ikipigo chevapigite avanu vangi apono apangi.
17Neke ndawe wewilonga Uwandike Uwelu, “Yeakwihala ihalage mukipigo chapigite Umutwa.” 18Si yula yeakwisumila yumwene, pesi ukuta yula yeisumilwa na Umutwa yeakwanukilwa.
Currently Selected:
2 Avakolindo 10: HeNT2004
Highlight
Share
Copy
Want to have your highlights saved across all your devices? Sign up or sign in
Kihehe New Testament © Bible Society of Tanzania, 2004.
