2 Avakolindo 9
9
Uwutanzi kwa Avakilisito vayetu
1Silumbaji nene ngine ukwandika ulwa ikipigo chenyu ukwimila avanu va Nguluvi. 2Ngulukagula lwe nyenye mwina inumbula iya ukutanga, na ngilumbite ukwimila nyenye mu lukani ulo pa vanu va ku Makedoniya. Ndavatige, “Vanyalukolo vetu va ku Akaya vakakwisise uluhuma umwaka ugulutye.” Sweno, uwupifu wenyu wukavalamwise avanu wolofu hilo. 3Lino, ndivatumite vanyalukolo vetu iwo, sambi ululumbo lwetu ukwimila nyenye luwoneke ulwa si lwa malanga nda, na ulwa nyenye ye mukwisise uwutanzi wenyu ndawe lwe ndendonzile. 4Lulava kangi avanu va ku Makendoniya pevasile pamwi na hwehwe, tuvafike mukaali simulapiga ulo, pepene pemutuhongela inyoni, na inyoni iso sivafika nayinyenye siva ngaya wulongo, pakuva hwehwe twiva tuvahuvye hilo. 5Nambi lino, mbwene lunofu ndivagongole avanyalukolo vetu iva, valongole ukusa, sambi vahwane ukugelanisa ifipelwa nafyo filagila nachene ulwa fitawule chesa mutima si kwa kukangalilwa.
6Mwiwukage, “Umunu yeivyalaga kwa kutagalisa; uyo aibetaga fikefu; yeivyalaga kwa kudida kwa wunofu uyo aibetaga fyolofu.” 7Yeyeavesaga swe, atawulage ululing'ene ndawe lwe alamwe, neke luvelage kwa uwesa mutima si kwa uwuhuguvafu apangi kwa kukangalilwa, pakuva Nguluvi akumwenda yula yeitawula kwa luhekelelo. 8Nguluvi akwilye avapele nyenye ukulutila fila fyemugulwime, sambi mbepalli muvelage mwinafyo mbefili fyemwiwenda, pemugina ukutanga mbepali mufipigo ifinofu, 9ndawe Uwandike Uwelu wewilonga:
“Umwene aitawulaga kwa wudeke,
akuvapela avamikaa,
uwunofu wakwe winanaga kitasila.”
10Nguluvi ye mwene yeaitawula inyadikwa ya ukuvyala na ifilyo fya ukulya, palulo Nguluvi avapela nyenye inyadikwa mbesili isa ukuvyala na kangi na isanga ya uwudeke wenyu. 11Umwene avanonia nyenye mbepali mwa mbefili, sambi avanu vamulumbe Nguluvi ukwimila ifipelwa fyenyu fyevakanuche mumawoko getu. 12Pakuva ikipigo iki chelu chemwipiga si witigila wanda kitanga hela fyevagulwime avanu va Nguluvi, pesi ukuta kangi kikwega avanu wolofu vamulumbe Nguluvi. 13Na kwa uwolelesi wewiwoneka wa ikipigo chetu, avanu wolofu vamupela indolo Nguluvi ukwimila uwuhuvilwa wenyu kwa Ulukani Ulunofu lwa Kilisito lwe na kangi ukwimila uwudeke wenyu wemwihanga nawo na avanu mbevali mukwidikila. 14Sweno, vavasukila kwa Nguluvi pevakwifunya ukwimila nyenye kwa uwuwuya uwiyena weakavapelye Nguluvi. 15Tumulumbage Nguluvi ukwimila ikipelwa chakwe ikigaya ikiganiso!
Currently Selected:
2 Avakolindo 9: HeNT2004
Highlight
Share
Copy
Want to have your highlights saved across all your devices? Sign up or sign in
Kihehe New Testament © Bible Society of Tanzania, 2004.
