2 Avakolindo 11

Pawulo na avigendo va uwudesi

1Ikali kiba mung'angalile padodo hela, nambi mbe ndimupuva ulubali ulungi! Ena, mung'angalilage padodo. 2Nene nguvawonela imbafya neke imbafya iso sa Nguluvi; pakuva nyenye mwihwana umuhinza umutuunafu umugolofu yendamulumbye umugosi yumwi hela nave ye Kilisito. 3Neke ngogopa ulwa, ndawe inzoka yila kwa uwubanga wayo uwa uwudesi yamusanzile Hawa, amahosa genyu gahwanite ukuyaswa, nu kuwuleka uwuhuvilwa wenyu uwa nachene kwa Kilisito. 4Pakuva umunu yeyeavesaga akusa nu ukumudalika Yesu uyungi na yula yetwamudalike, nyenye mukumwanukila uyo mugalalwike, apangi mukugufuuwa umuhe na uwudalisi uwungi wesiwukwiyidikisa na lula Ulukani Ulunofu lwemwanuche ukuhuma kwa hwehwe.

5Singwihuvila ulwa nene ye ndi mudodo ukulutila iwo, “Avigendo avavina.” 6Apangi ngaya ikipelwa icha ukuganula indongele, neke uwimbi ndinawo; ulukani ulu tukalulaje pelu ukwenyu na apono pepepavesaga na ulusika mbeluli.

7Nene ndadalike ukwenyu Ulukani Ulunofu lwa Nguluvi wesindilavisa amahombo; ndileviise sambi ndivakang'ule nyenye. Mbi, ndananzile ukupiga ulo? 8Pendapigige ikipigo apenyu, ndanuche amahombo ukuhuma kwa amakanisa agangi. Tutigile kwa ulubali ulungi ndavanwike avene uwunono wawo sambi ndivapigile nyenye. 9Pende pamwi na nyenye sindamufwahisi, umunu yeyeavesaga ukwimila uwugulumu, vanyalukolo vevahumite ku Makedoniya vandetye mbefili fye ndengulwime. Nane ndikomalilige pakomi sandilava ndi kitegulo ikisito kwa nyenye mwa chechekivesaga, na ngina ukugendela lulo. 10Ngwihuvisa ukwimila uwa nachene mwa Kilisito we wuli mugati mwa nene, ulwa kisukuli ikinu chekihwana ukunanila ukwihala mulukani ulo apono baha pavesaga mu Akaya. 11Mbi ndawuli? Mbi pakuva sindivenda nyenye? Nguluvi akulukagula ukuta ndivenda nyenye!

12Mba pemiga ndawe lwe ndipiga lino, sambi ndemwe ukuvalekela ikilega vala vevisaka ikilega, icha ukwihala ukuta ati nawo vipiga ndawe hwehwe. 13Pakuva, iwo vigendo va uwudesi, avapisi avabanga avakwifwila ulwa vigendo va Kilisito. 14Neke nambi ndahihyo ulo silwa wuhulo, pakuva na Setani yumwene aakwifwila ave nda munyivaha va ulung'ali! 15Sweno si lukani lwa kukabuka wone na iwo avakami vakwe vakwifwila ukuva vapisi va uwugolofu. Neke kumudugo savanukila kila ikivavaje ikitegine na ifipigo fyawo.

Ineseko sa Pawulo ukwimila uwigendo

16Kangi ndipilukila ukulonga: Umunu alemwage ukuhosekesa ukuta ndimupuva. Neke wone mwihose ndahihyo, sweno, mutegulage lulo ukuta ndimupuva sambi nane mbe na icha ukwihala nambi kidodo. 17Chendilonga lino si kila cheandaje Umutwa; nda ndimupufi mukwihala, 18pakuva wolofu vakwihalila isa mung'i, swe nane ndihala. 19Nyenye mwivanyaluhala, nambi mukuvakangalila avapuva! 20Mukumukangalila nambi umunu yakuvavika nyenye muwunyawingi, umunu yakuvabunza, yakuvasagila, na ukuvavatula kumiho! 21Kwa ukuhonga inyoni ngwidikila ulwa hwehwe twetwivahomefu. Naluve lweluva, neke wone pwali munu yeyeyavesaga yakwigelela ukwihala mu kinu—ndilonga witigila munu umupuva—nene nywanite ndigelele nane ukwihala. 22Mbi, avene Vaebulaniya? Na yinene. Mbi avene Vaisilaeli? Na yinene. Avene mbegalo ya Abulahamu? Na yinene.

23Avene vakami va Kilisito? Na yinene ndilonga ulo witigila ngulwike ndi mukami va Kilisito ukulutila avene. Nene ngapigite ikipigo ikitalamu ukulutila, ngikalite mundinde kolofu ukulutila, ngatofilwe kolofu ukulutila, supwe ukuwulagwa nako kolofu. 24Ndatofilwe ingoda machumi gadatu na sinyigonza na Avayudaya kahanu. 25Ndatofilwe ingoda kadatu, ndakinyitwe na maganga kamwi; kadatu ndadenyekilwe na ikipugu mubahali, na umo ndagudite ikilo mbekili nu kuhwa ikimunyi mbekili. 26Ingendo mbesili ndatang'ine na inalamu isa ukukuluka indenga mumikoga, na inalamu isa ukukuluka na amakoko, inalamu ukukuluka uluhuma kwa avanyang'i vayangu na kuvanu va ing'i isingi, inalamu ukukuluka muboma; inalamu ukukuluka mwihala, inalamu ukukuluka mu bahali, inalamu uluhuma kwa vanyalukolo va uwudesi! 27Ngapigite ikipigo mu lugudo, ngavasise miho kolofu; ukuhwa ndagine na kukeluka kolofu; ndikalige kinge nu kwikala munungwi we ndimugaya mwenda. 28Neke pamwinga na mbesili isi, mbepali tulaving'ine na ikipigo cha uwimilisi wa amakanisa mbegali. 29Wone pwali umunu yeyeavesaga ye muhomefu, na yinene nane ndimuhomefu; wone pwali umunu yeyeavesaga ivifisiwa, nayinene nane ndandiva nu wuhuguvafu.

30Wone lumbagile ukwihala, sweno, ndihala mu wuhomefu wangu. 31Nguluvi na Dada va Umutwa Yesu—litawa lyakwe lipelwage indolo kitasila—umwene akulukagula ulwa sindilonga wudesi. 32Pende ku Damesiki umutangilisi va Umutema Aleta, peayilolelige iboma ya mu Damesiki sambi andibate. 33Neke nene mugati ya lihanga vanzisise ukukola mulinang'ana lya mulukanzi, ndave ndakulukige mumawoka gakwe.

Currently Selected:

2 Avakolindo 11: HeNT2004

Highlight

Copy