Maliko 14

Yesu aambwilwa mavuta.

1-9.

1Kukeshiγale mishi mili, mishi ya Pasa iki bula, yejiilwa migate ishigezilweyo shimbi. Wavikizi wakulu na watabaluwangwa wazapisha, ndivyo wamgwile na minyanyi, wamkome. 2Hambu wazaγamba: Tishezaγoja mishi ya mviko, kushezaoneka nkondo nkulu na wantu!

3Akiikala Betaniya mwe nyumba ya Simoni Mkoma, wakija nkande, kuzaiza mvyele, aitozize kakomba ka mavuta ya muti weitangwa Nalada yavanganeyo na mafutilo ya mluziluzi, yeγulwa na mali nyingi muno. Azabonda kaja kakomba, azayatununtila mwe mutwi wakwe. 4Miya kuṅwe wazaihilwa mwe myoyo yawe angwe: Nini aya mavuta matana yakihabaniγwa? 5Hambu aya mavuta yetama ivyoho yaadaha kutaγwa kwa shilingi magana maili, zikainkilwa kwa wakiwa. Wazamshimbukila. 6Miya Yesu azalonga: Mulekei! Nini mkimwonya sungu? Azaγoshola ndima ntana mwe ṅwili wangu. 7Hambu wakiwa muna nawo kwenyu mishi yoshe, ndiho mkundile, mwadaha kuwafila mbazi, miya imi nkamna na imi mishi yoshe. 8Viya avyodaha azaviγoshola; azaandiila kushisha ṅwili wangu mavuta kangwe nezeuzikwe. 9Kweli namili: Aho ndiho ulau wedi nezeubilikilwe mwe ngulu ngima, hata ivi, uyu aγosholevyo, nezevilongwe, kangwe yohe nezeakumbukwe.

Yuda Isikaliyota.

10-11.

10Yuda Isikaliyota, waja kumi na waili ni ṅwiyae ywawe, azahita kwa wavikizi wakulu, kangwe amwinkile kwawe. 11Waja wakiviiva wazatamilwa, wazalaγana naye feza, ndizo wamunke. Lushe azapisha, ndivyo akombaγanye kumwinkila.

Nkande ya Pasa yaliγanyiγwa.

12-16.

12Mushi wantu wahoandiila kuja migate ishigezilweyo shimbi, wantu wakikoma ngoto za Pasa, wahina wakwe wazamuti: Ukunda kujiila hi ngoto ya Pasa, tihite, tiveiliγanya? 13Azatuma wahina waili, azawati: Hitai na muja kaya! Nemkintane na muntu ainuleye iγa ja mazi, mtongelei! 14Ndimo aingile, mtamγamba yuja ṅwenye nyumba: Kangwe ni mfuzi: Fikilo jangu ni jihi, ndimo nijiile ngoto ya Pasa haṅwe na wahina wangu? 15Lushe ṅwenye atamionyesha chumba kikulu chibindilecho kutandikwa, ne ndimo mtiliγanyize. 16Waja wahina wazalawa, wazahita na muja kaya, wazaona, sa viyaho awaγambilevyo; wazaliγanya ngoto ya Pasa.

Yesu ambunkula Yuda.

17-25.

17Lwa ṅwiyaγulo azaiza nawaja kumi nawaili. 18Wakiikala, wakija, Yesu azalonga: Kweli namiti: Ṅwenyu muṅwe mweja na imi aunga kuniinkila. 19Wazaandiila kuona ukiwa na kulonga muṅwe muṅwe: Hambu ni miyo? 20Azawahitwila angwe: Inywi kumi na waih ni ṅwenyu, ni yuja, ndiye aginte haṅwe na imi mwe lwiγa. 21Ṅwanangwa ywa muntu ahita sila yakwe sa viyaho, mbuli yakwe igondiγwevyo; miya yuja muntu mwemwinkila ṅwanangwa ywa muntu nezeaone ukiwa. Ati yuja muntu nkavyelwe, anga ni vitana vyakwe.

Nkande ya Zumbe.

22Aho wakija, azaγuwa mgate, azalavya ntogolo, azaubendula, azawainka angwe: Γuwai! Unu ni ṅwili wangu. 23Vikibinda azaγuwa kinywelo, azalavya ntogolo, azachiwainka, woshe wazanywa mumo. 24Azawati: Inu ni mpome yangu ya kilaγa kihya yeitilwa kwa mbuli ya wantu wangi. 25Kweli namiti: Sezeninywe lute lwa mazabibu mpaka uja mushi, nihozalunyweela luhya mwe uzumbe wa Mulungu.

Yesu ashunda wahina wekitogola.

26-31.

26Wakibinda kutogola wazamlawa, wahite kwe mulima wa miziyaγembe. 27Yesu azawati: Nyoshe nemwihilwe ni miyo. Hambu kuigondiγwe: Nezenitowe mulishi, ngoto ziasakanyiγwe. 28Miya nikibinda kufufuka nitamilongwela na Galileya. 29Petelo azamuti: Ati woshe waihilwa, miya imi seniihilwe. 30Yesu azamuti: Kweli nakuti: Ichi kilo cha lelo, soγolo ishizati ikeme kaili, utakela nkani katatu, kuti nku ywangu. 31Miya yuja azalongesha kuti. Hata nikibuza kukoṅwa haṅwe na iwe, sezenikele nkani kuti: Si ywako. Woshe wazalonga vivyoho.

Getisemane.

32-42.

32Wazabula hantu heitangwa Getisemane, haja azalonga wahina wakwe: Ikalai aha, mpaka nibinde kuvika! 33Azamγuwa Petelo na Yakobo na Yohana, azahita nawo; azaandiila kudidima na kuukwa ni vizingizo, 34azawati: Moyo wangu waisa kujiγwa ni lusoyoyo, ushiγaze kufa. Ikalai aha, mgone mesho! 35Azahita na kamazu hadodo, azakina funi, azavika, ati vyadahikana, aho hantu hamzinke. 36Azalonga: Tate ene, vyoshe vyadahikana kwako, zisa ichi kinywelo kwangu! Miya imi nivyokunda sivyo, miya iwe uvyokunda vibontoke. 37Azahita, azawabulila waja, waisisile, azamγamba Petelo: Simoni, utesisila? Nkudaha kugona mesho saa ṅwenga du? 38Gonai mesho, muvike, kangwe msheγeziγwe! Moyo wakunda, miya ṅwili ni mnyonge. 39Azahita vituhu azavika akilonga ija mbuli, alongileyo. 40Akiiza vituhu azawabulila waja, waisisile, hambu mesho yawe ne yaina usisiza ungi, nkawataile vya kumlandula. 41Azaiza ka ntatu, azawati: Mwasisila vivyoho, mwushe muku? Hangu hazatimiza, hazabula; olelai: Ṅwanangwa ywa muntu ainkilwa mwe mikono ya wahuza! 42Inukai, tihite! Shuvuja mweniinkila! Azabula.

43Haho akelonga, Yuda azabula, waja kumi na waili ni ṅwiyae ywawe, ana bumba kulu ja wantu watozizewo shime na vigongo, watumiγwe ni wavikizi wakulu na watabaluwangwa na waγolokezi. 44Miya yuja mwemwinkila aiwainkile weyae lwitangilo kuγamba: Ṅdiye nifyosane naye milomo, ndiye; mgwilei, mumwiγale na kumγojesha! 45Viya du lushe akibula azamtimila angwe: Mkulu! Akibinda azamfyosa milomo. 46Wazamgwila na mikono yawe, wazamshunga. 47Waja waγolokewo haja, ṅwiyae ywawe muṅwe azasholola shime, azamshenga mupuna ywa mvikizi mkulu, azamdwisha shikilo. 48Yesu azawalonga angwe: Mulawile mwitozize shime na vigongo, viya mtabasha mumpoko, munigwile imi 49Mishi yoshe nizaikala kwenyu vikiloi nikifuza, miya nkamunigwizile; ni kangwe ugondengwa ubontoke. 50Woshe wazamwasha, wazanyilika. 51Kuna mubwanga, azamtongela, aikiγubike shuke yeṅala; wazamgwila. 52Miya yuja azaasha shuke yakwe, azanyilika bule.

Yesu alahiγwa kwa wavikizi na wafuṅwa.

53-65.

53Wazamwiγala Yesu kwa mvikizi mkulu; wavikizi wakulu woshe na waγolokezi na watabaluwangwa wazaunganana kwakwe. 54Petelo azamtongela hale hale mpaka mwe chengo cha kitala cha mvikizi mkulu; azaikala na wafunguwo akiotela moto. 55Miya wavikizi wakulu haṅwe na wafuṅwa woshe wazalonda mbuli ya kumfyalima Yesu, kangwe wamkome, miya nkawaene. 56Hambu wangi wazamshinga mbuli za mambeza, miya mbuli zawe, wazomshinga, zizazinkana. 57Kuna wainukewo wakimshinga kuγamba; 58Tizamwiva, akiγamba: Imi nezenichakule iji vikilo jizengiγwejo ni wantu, nizenge tuhu mishi mitatu jishizengiγwejo ni wantu. 59Miya hata ivyoho uwona wawe uzazinkana. 60Ne mvikizi mkulu ahoinuka akilawila na haja gati, azamwuza Yesu angwe: Nkulandula ivi, awa wavyokushinga? 61Miya azaleka lwashu, nkalandule hata. Vituhu mvikizi mkulu azamwuza akimuti: Iwe u Kilisito, ṅwana yuja mweagiziγwa ni ntogolo zoshe? 62Angwe ni Yesu: Ni miyo; kangi nezemumwone ṅwanangwa ywa muntu, avyoikala kulume kwe nguvungwa, kangi avyoiza mwe mazunde ya lwingu. 63Ne mvikizi mkulu ahotatula shuke zakwe angwe: Waona tishindawalondelai? 64Mzaiva ulu lukanko. Muγambai? Woshe wazaitikila kuti: Ni mumasa ywa kufa. 65Kuṅwe wazaandiila kumshwela mate na kuγubika cheni chakwe na kumtowa nkonde wakimuti: Teγanya! Hata waja wafunguwo wazamγuwa na kumtowa vibao.

Petelo amtowa Yesu hulu.

66-72.

66Petelo akiikala kuja chengoi, kuzaiza mndele muṅwe ywa mvikizi mkulu. 67Akimwona Petelo, avyootela moto, azamwolela, azamuti: Hata iwe ne ukianga na yuja Yesu ywa Nazaleti. 68Miya yuja azakela nkani angwe: Sitaila, siiva uvyolonga. Azakulawa, azahita na lwazoi. 69Yuja mndele akimwona azaandiila vituhu kuwaγambila waja waγolokewo kuti: Uyu ni ṅwiyae ywawe. 70Miya azakela nkani vituhu. Kafunda kadodo kakizinka, vituhu waja waγolokewo haja wazamuti Petelo: Kweli u ṅwiyae ywawe, hambu u Mgalileya. 71Miya yuja azaandiila kukilaγilila na kukilisha angwe: Simtaila yuja muntu, muyelonga! 72Viya du lushe soγolo izakema ka mbili; ne Petelo ahofukila ija mbuli, Yesu amulongileyo kuti: Soγolo ishizati ikeme kaili, neukele nkani katatu, kuti nku ywangu. Akivitongonyeza mwe moyo wakwe azalila.

Currently Selected:

Maliko 14: KISHNT05

Highlight

Copy