Maliko 13
13
Yelusalemu neuchakulwe.
1Wakilawa mwe vikilongwa, mhina ywakwe muṅwe azamγamba: Mfuzi, olela mawe yeinga aha na zengo jeinga aha! 2Yesu azamuti: Waolela zengo iji kulu? Nkezehalekwe iwe, jikiandakana na ṅwiyae vivyoho jikishechakulwa.
Ntangilo za bindilizo.
3Akiikala mwe mulima wa miziyaγembe sheja ja vikilongwa, Petelo na Yakobo na Yohana na Andeleya wazamwuza he njama angwe: 4Tiγambile, ati ni lini, ziya mbuli zikizabontoka? Kangi lwitangilo ni luhi, viya vikiunga kubontoka? 5Yesu azaandiila kuwaγambila angwe: Oleleshai, muntu ashezamiazaγanya! 6Hambu wantu wangi watazalawila mwe zina jangu wakiγamba: Imi ndiye, wataazaγanya wangi ivyoho. 7Ndiho nezemwivile, kuti kuna nkondo na ulongo wa izo nkondo, msheshentuke! Hambu viya shuti vibontoke, miya hata aho bindilizo nkajizati. 8Hambu mbali na mbali zitazainukilana, uzumbe ulazainukila uzumbe ṅwiyae; shi itazadidima hantu haṅwe na haṅwe, sala itazagwa na nkondo ntuhu ntuhu; ivi ne chandilo cha mishango.
Nkondo ndizo ziize.
9-13.
9Kiolelei inywi wenye! Hambu watazamiinkila kwa wafuṅwa, mulutwe mwe mavikilo, mulaviliziγwe kwa watoza shi na kwa wazumbe wakulu kwa mbuli ya imi, viwaγalukile uwona. 10Miya bosi ulaungwa shuti unebilikilwa kwa wamzimu woshe. 11Kangi aho ndiho nezewamiiγale, wakamiinkile, msheje sungu kwa viya, ndivyo mulandule! Miya viya, ndivyo mwinkwe ija minga, ne ndivyo mulandule! Hambu si nywiyo mwelonga, ni Mpeho mṅazi. 12Wanduγu na wanduγu nezewainkilane kwa koṅwa, hata waishe nezewainkile wana wawe, wana nezewaiγaile wavyazi wawe nkondo, wawakome. 13Nezemshukiziγwe ni wantu woshe kwa mbuli ya zina jangu. Miya ndiye azizimize mpaka bindilizo, ne ndiye avunilwe.
14Aho ndiho nezemwone, uja uchakuzi webuza useli ukibula hantu hashiboagiza, sa vilongiγwevyo ni mteγanyi Danyeli. (Mwefyoma aha hantu ateγeleze vyedi!) Mishi ija we mwe shi ya Yudeya wanyilike kwe milima! 15Mwebulilwa aiikale mwe nyumba ulanga, ashesheele akishindaingila kwa γuwa ntanu ze nyumbai mwakwe! 16Mwe nkoi asheuye na nyuma kwa γuwa shuke zakwe! 17Wena nda na weonkeza watazaona ukiwa mishi ija. 18Miya hembelezai, kuja kunyilika kwenyu kusheteγane na mishi ya nyota! 19Hambu mishi ija kutaoneka ukiwa washaonekawo kale hoshe, vikiandiila haja, Mulungu akiumba lwingu na shi, mpaka ivi lushe, kangi nkezeuoneke vituhu. 20Ati Zumbe ashedwisha ija mishi, anga nkakuna muntu mwehona. Miya kwa mbuli ya waja washaγulwewo, ashaγulewo ṅwenye, azaidwisha ija mishi. 21Haja muntu azahamiti: Shuyu Kilisito! A haha!, ao du: Shuyuja! A kuja!, mshetozeshe! 22Hambu Wakilisito wa ulongo na wateγanyi wa ulongo watazainuka, waγoshole vilozo na vimaka, waazaγanye, ati vyadahikana, hata waja washaγulwewo. 23Miya inywi kiolelei! Shivyo, nizavimiγambila vyoshe, vishizati vikinte. 24Mishi ija, uja ukiwa ukibinda kuzinka, zuwa jitagwa lwiza, hata ṅwezi utaleka kuaka, 25hata ntondwe zitakina zikiuka mwe lwingu, hata nguvu ze kuja kwe lwingu zitavuwanika. 26Ne ndiho wamwone ṅwanangwa ywa muntu, avyoiza mwe mazunde ya lwingu na nguvu nyingi na utana ungi. 27Ne ndiho nezeatume walau, waimganyanye waja washaγulwewo ndiye, wakiwalavya kwe nyazu zoshe, mpeho ikokalawa nako, kuandiila shi ikohelela mpaka kuja, lwingu iuhitileko kwa helela. 28Hinai lushimo mwe mkuyu Ntimbwati zakwe zikikwela matumba, zikivungula, mwataila kuti: 29Vuli ji hehi. Vivyoho hata inywi mkizaona, viya vikibontoka, tailai kuti: Bindilizo ji hehi! 30Kweli namiti: Inu mbali nkeibanike, mpaka izi mbuli zoshe zinebontoka. 31Lwingu nezelubanike, hata inu shi, miya mbuli zangu nkezezibanike. 32Miya mbuli ya uja mushi ao ija saa nkakuna mweitaila, hata walau we mwe lwingu nkawaitaila, hata ṅwanangwa nkaitaila, ni Tate ike.
Gonai mesho.
33Kiolelei, mgone mesho na kuvika! Hambu nkamtaila, mishi ndiho nezeitimize. 34Vyafanana na muntu mwehita ntambo akiasha nyumba yakwe, akiinka wabwanga wakwe ufuṅwa wa kumupangiia kila muntu ndima yakwe, miya yuja muluγojo ywa nkili amlaγiliza, agone mesho. 35Vivyoho gonai mesho lushe! Hambu nkamtaila aho, ndiho ṅwenye nyumba nezeaizile, ati ni lwa ṅwiyaγulo, ati ni kilo kikulu, ati ni haja soγolo zihokakemela, ati ni makelo, 36ashezamitutukanya na kuiza kwakwe, akimibulila, mwisisile. 37Miya nivyomilonga inywi, nawalonga woshe: Gonal mesho!
Currently Selected:
Maliko 13: KISHNT05
Highlight
Share
Copy
Want to have your highlights saved across all your devices? Sign up or sign in
New Testament in Kishambala © Bible Society of Tanzania, 2005.
