Mateyo 26

Wavikizi walonda ndivyo wamkome Yesu.

1-5.

1Yesu akibinda kulonga izi mbuli zosheni, azawati wahina wakwe: 2Mwataila kuti: Mishi mili ikizinka, ni Pasa; ne ndiho ṅwanangwa ywa muntu ainkilwe kwa koṅwa na kuambiγwa mwe muti. 3Mishi ija wavikizi wakulu na watawa wa mbalingwa wazaunganana mwe kitala cha mvikizi mkulu mweitangwa Kayafa, 4wazafanyanya, ndivyo wamgwile Yesu na minyanyi, wamkome. 5Miya wazaγamba: Tishezamkoma mishi ya mviko, mushezagwa nkondo mwe bumbangwa!

Yesu aambwilwa mavuta Betaniya.

6-13.

6Yesu akiikala Betaniya mwe nyumba ya Simoni Mkoma, 7azaizilwa ni mvyele, aitozize kakomba ka mafutilo ya mluziluzi yaγuzilweyo na mali mangi, azayatununtila mwe mutwi wakwe, aiikale! 8Wahina wakwe wakiviona wazaihilwa angwe: Unu ubanasi ni wai? 9Hambu yaadaha kutaγwa kwa shilingi nyingi zikainkilwa kwa wakiwa. 10Yesu akivitaila azawati: Nini mkimwonya uyu mvyelengwa sungu? Hambu azaγoshola ndima ntana mwe ṅwili wangu. 11Wakiwa muna nawo kwenyu mishi yoshe, miya imi nkamna na imi mishi yoshe. 12Uyu mvyelengwa akiambwila aya mavuta mwe ṅwili wangu azaupikila, udahezikwa. 13Kweli namiti: Aho ndiho ulau wedi ubilikilwe mwe ngulu ngima, hata ivi, uyu aγosholevyo, nezevilongwe, kangwe yohe nezeakumbukwe.

Yuda Isikaliyota.

14-16.

14Haho waja kumi na waili ṅwiyae ywawe mweitangwa Yuda Isikaliyota, 15azahita kwa wavikizi wakulu, azawati: Mwakunda kuninkai, nimwinkile na kwenyu? Waja wazamwikila msuhi wa feza milongo mitatu. 16Ne aandiileho kulonda lwinkilile.

Ngoto ya Pasa.

17-19.

17Mushi wantu wahoandiila kuja migate ishigezilweyo shimbi wahina wakwe wazamwizila angwe: Ukunda, tikuliγanyizize hi ngoto ya Pasa? 18Angwe: Hitai na muja kaya kwa ngatiyani, mumγambe: Kangwe ni mfuzi: Mishi yangu i hehi, nakunda, nijiile mwako ngoto ya Pasa haṅwe na wahina wangu. 19Waja wahina wazaγoshola, sa Yesu awalaγilizevyo, wazaliγanya ngoto ya Pasa.

Yesu amlanga ndiye amwinkile.

20-30.

20Lwa ṅwiyaγulo azaikala na waja wahina kumi na waili, waje nkande. 21Aho wakija azawati: Kweli namiti: Ṅwenyu muṅwe aunga kuniinkila. 22Wazaona ukiwa ukulu, wazaandiila kumwuza muṅwe muṅwe angwe: Zumbe, hambu ni miyo? 23Azawahitwila angwe: Agintileye mwe lwiγa haṅwe na imi, uyu ne ndiye aniinkile. 24Ṅwanangwa ywa muntu ahita sila yakwe sa viyaho, mbuli yakwe igondiγwevyo, miya yuja muntu mwemwinkila ṅwanangwa ywa muntu nezeaone ukiwa; ati yuja muntu nkavyelwe, anga ni vitana vyakwe. 25Yuda, yuja ndiye amwinkile, azalandula angwe: Mkulu, hambu ni miyo? Amuti: Uzalonga.

Nkande ya Zumbe.

26Aho wakija, Yesu azaγuwa mgate, azalavya ntogolo, azaubendula, azawainka wahina wakwe angwe: Γuwai, muje! Unu ni ṅwili wangu. 27Vikibinda azaγuwa kinywelo, azalavya ntogolo, azawainka angwe: 28Nywai nyosheni mumol Hambu inu ni mpome yangu ya kilaγa kihya yeitilwa kwa mbuli ya wantu wangi, ya kuushiliza masa.

29Miya namiti: Kuandiila ivi lushe sezeninywe lute lwa mazabibu mpaka uja mushi, nihozalunyweela luhya haṅwe na inywi mwe uzumbe wa Tate.

Nkani za wahina.

30-35.

30Wakibinda kutogola wazamlawa, wahite kwe mulima wa miziyaγembe. 31Haja Yesu azawati: Inywi nyoshe nemwihilwe ni miyo ichi kilo cha lelo, hambu kuigondiγwe: Nezenitowe mulishi, ngoto za chuma chakwe ziasakanyiγwe. 32Miya nikibinda kufufuka nitamilongwela na Galileya. 33Petelo azamlandula angwe: Ati woshe waihilwa ni weyo, imi seniihilwe. 34Miya Yesu azamuti: Kweli nakuti: Ichi kilo cha lelo soγolo ishizati ikeme, utakela nkani katatu, kuti nku ywangu. 35Angwe ni Petelo: Hata nikibuza kukoṅwa haṅwe na iwe sezenikele nkani kuti: Si ywako! Wahina woshe wazalonga ivyoho.

Getisemane.

36-46.

36Vikibinda Yesu azahita hantu heitangwa Getisemane; haja azalonga wahina wakwe angwe: Ikalai aha, mpaka imi nihite na kuja kwa vika! 37Azamγuwa Petelo na waja wana waili wa Zebedeyo, azaandiila kubulilwa ni lusoyoyo na kuukwa ni vizingizo. 38Ne ahowati: Moyo wangu waisa kujiγwa ni lusoyoyo, ushiγaze kufa; ikalai aha, mgone mesho haṅwe na imi! 39Azahita na kamazu hadodo, azakina funi, azavika angwe: Tate, ali vyadahikana, ichi kinywelo chinizinke! Kangi imi nivyokunda sivyo, miya iwe uvyokunda vibontoke! 40Azahita kwa waja wahina, azawabulila, waisisile, azamuti Petelo: Nkamdahile kugona mesho na imi saa ṅwenga du? 41Gonai mesho, muvike, kangwe msheγeziγwe! Moyo wakunda, miya ṅwili ni mnyonge. 42Vituhu azahita ka mbili, azavika angwe: Tate, ati nkavidahikana chikinizinka, shuti nichinywe, viya uvyokunda vibontoke! 43Akiiza azawabulila vituhu, waisisile, hambu mesho yawe ne yaina usisiza ungi. 44Azawaleka, azahita vituhu, azavika ka ntatu, akilonga ija mbuli vituhu. 45Akibinda azaiza kwa wahina wakwe, azawati: Hayai sisilai, mwushe muku. Olelai, hazabula, ṅwanangwa ywa muntu ndiho ainkilwe mwe mikono ya wahuza! 46Inukai, tihite! Shuyuja mweniinkila! Azabula.

Yesu ashungwa.

47-56.

47Akelonga, kuzalawila Yuda, waja kumi na waili ni ṅwiyae ywawe; ana bumba kulu ja wantu watozizewo shime na vigongo weanduka kwa wavikizi wakulu na kwa watawa wa mbalingwa. 48Miya yuja mwemwinkila aiwainkile weyae lwitangilo kuγamba: Mwazahaona niyefyosana naye milomo, ndiye, mgwilei! 49Azafikamtimila Yesu angwe: Mkulu, mpeho na iwe!, akibinda azamfyosa milomo. 50Miya Yesu azamuti: Ṅwiyangu, uizilei? Ne weyae waholawila, wazamgwila Yesu na mikono yawe, wazamshunga. 51Waja, Yesu awona nawo, ṅwiyae ywawe muṅwe azaiγala mkono, asholole shime, azamshenga mupuna ywa mvikizi mkulu shikilo, jizadwika. 52Ne Yesu ahomlonga: Uza shime yako na hantu hakwe! Hambu woshe wetoza shime walazakoṅwa nazo. 53Hambu waγamba: Sidaha kumhembeleza Tate, akaninka ivi lushe aha kuzinka makulija kumi na maili ya walau? 54Miya baluwangwa zitabontoka vivihi? Shuti zibontoke iviho. 55Haho Yesu azalonga waja wantu angwe: Mulawile mwitozize shime na vigongo, viya mtabasha mumpoko, munigwile imi. Kangi mishi yoshe nizaikala kwenyu vikiloi nikifuza, miya nkamunigwizile. 56Ivi vyoshe vizaγosholwa, kangwe vibontoke viya, wateγanyingwa wagondilevyo. Haja wahina woshe wazamwasha, wazanyilika.

Yesu alahwa ni wavikizi wakulu.

57-75.

57Waja wamgwizilewo Yesu wazamwiγala kwa mvikizi mkulu Kayafa; hambu watabaluwangwa na watawa waiunganane kwakwe. 58Miya Petelo azamtongela hale hale mpaka kwe kitala cha mvikizi mkulu, azaingila na mumo, azaikala na wafunguwo, aone iyo mbuli, ndivyo ibontoke. 59Wavikizi wakulu haṅwe na wafuṅwa woshe wazalonda uwona wa lulimi, ndiwo wamshinge Yesu, kangwe wamkome. Waona wa lulimi wangi wazalawila, 60miya hata vivyo nkawaonele. Kushilikiza kuzalawila waili, 61wazaγamba: Uyu azalonga kuti: Nadaha kuchakula vikilo ja Mulungu na kujizenga mishi mitatu. 62Mvikizi mkulu azainuka, azamuti: Nkulandula ivi, awa wavyokushinga? 63Yesu azaleka lwashu. Ne mvikizi mkulu ahomuti: Mulungu mwe moyo akatakulaha, ukishetiγambila, ati ni weyo Kilisito, ṅwana Mulungu! 64Angwe ni Yesu: Uzalonga! Kangi namiti: Kuandiila ivi lushe nezemumwone ṅwanangwa ywa muntu, avyoikala kulume kwe nguvungwa, kangi avyoiza mwe mazunde ya lwingu. 65Ne mvikizi mkulu ahotatula shuke zakwe angwe: Atemweza Mulungu! Tishindalondelai waoua? 66Ivi lushe sha mzaiva mikankile yakwe. Muγambai? Waja wazaitikila angwe: Ni mumasa ywa kufa. 67Ne wahomshwela mate mwe cheni chakwe haṅwe na kumtowa nkonde; kuṅwe wazamtowa ngoda angwe: 68Kilisito, titeγanyize, ati ni ndai akulukuleye?

Petelo amtowa Yesu hulu.

69Miya Petelo azaikala mwe kitala kuja chengoi; kuzaiza mndele muṅwe na kuja aliko, azamuti: Hata iwe ne ukianga na Yesu ywa Galileya. 70Miya yuja azakela nkani, woshe waiivile, angwe: Sitaila uvyolonga. 71Mndele mtuhu azamwona, akihalawa, akihita na uko nkilii; azalonga waja we kuja: Uyu ne akianga na Yesu ywa Nazaleti. 72Azakela nkani vituhu azalonga na kukilisha kuti: Simtaila yuja muntu. 73Kafunda kadodo kakizinka, kuzaiza waja waγolokewo haja, wazamuti Petelo: Kweli hata iwe u ṅwiyae ywawe, hambu milongele yako yakubunkula. 74Haja azaandiila kukilaγilila na kukilisha angwe: Simtaila yuja muntu. Viya du lushe soγolo izakema. 75Ne Petelo ahofukila ija mbuli ya Yesu kuti: Soγolo ishizati ikeme, neukele nkani katatu, kuti nku ywangu. Azalawa na se, azalilisha.

Currently Selected:

Mateyo 26: KISHNT05

Highlight

Copy