Mateyo 25

Lushimo lwa wandele kumi.

1Haja uzumbe wa lwingu utazafanana na wandele kumi weγuwa vijali vyawe, wamγendele ṅwenye nteγuzi singili. 2Weyae wawe washano ni wadashi, washano ni wanyanyi. 3Hambu waja wadashi wazaγuwa vijali vyawe, miya nkawainule mavuta; 4waja wanyanyi wazainula mavuta mwe vichupa haṅwe na vijali vyawe. 5Yuja ṅwenye nteγuzi akikawa, woshe wazatibuka, wazasisila. 6Kilo kikulu kuzaiviγwa vuzo kuγamba: Shuyu ṅwenye nteγuzi! Lawilai, mumγendele singili! 7Waja wandele woshe wazainuka, wazaliγanya vijali vyawe. 8Waja wadashi wazawalonga waja wanyanyi: Tipangilei mavuta yenyu! 9Hambu vijali vyetu vizazima. Waja wanyanyi wazawalandula angwe: Do, kangwe tishezakosa toshe, ishwi haṅwe na inywi! Miya hitai kwa wachuluzi, mkakiγulile! 10Waja wakihita kwa γula, ṅwenye nteγuzi azaiza; waja wabindilewo kukiteγa wazaingila haṅwe naye mwe nteγuzi, vikibinda luvi luzazuγalwa. 11Uko nyuma kuzaiza waja wandele watuhu wohena angwe: Zumbe! Zumbe! Tizuγwile! 12Yuja azawalandula angwe: Kweli namiti: Simitaila. 13Kwa ivyoho gonai mesho! Hambu nkamtaila mushi ao saa, ṅwanangwa ywa muntu ahozaiziia.

Lushimo lwa feza Zumbe ainkileyo kwa wapuna wakwe.

14-30.

14Sa vivyoho vya muntu mwetamba, akiitanga wapuna wakwe, awapangile viya, avyona navyo. 15Muṅwe azamunka miziγo mishano ya feza, muṅwe miziγo mili ya feza, muṅwe mziγo muṅwe wa feza, kila sa midahile yakwe ilivyo; vikibinda azahita. 16Viya du lushe yuja ainkiγweye miziγo mishano ya feza azaiγuwa, azalungiliza nayo, azaonela nayo mituhu mishano. 17Vivyoho yuja ainkiγweye mili, azamota mituhu mili. 18Miya yuja aγwileye muṅwe azahita, azaufukila, akifishiza fezangwa za zumbe ywakwe. 19Mishi mingi ikizinka, baba ywa waja wapuna azaγotoka, azatala nawo. 20Yuja ainkiγweye miziγo mishano ya feza azamletela miziγo mituhu mishano ya feza angwe: Zumbe, uzaninka miziγo mishano ya feza, shinu miziγo mituhu mishano, nimotileyo! 21Baba yakwe azamuti: U mupuna mtana mkoolezi, uzaγolokela viya viγeke, nenikugimbike, uγolokele vingi. Ingila kwe nyemi ya baba yako! 22Vikibinda kuzaiza yuja ainkiγweye miziγo mili ya feza, azalonga: Zumbe, uzaninka miziγo mili ya feza, shinu mituhu mili, nimotileyo! 23Baba yakwe azamuti: Iwe u mupuna mtana mkoolezi, uzaγolokela viya viγeke, nenikugimbike, uγolokele vingi! Ingila kwe nyemi ya baba yako! 24Vikibinda kuzaiza yuja ainkiγweye mziγo muṅwe wa feza, azalonga: Zumbe, nizakutaila kuti: U muntu mwena ntoγo, uhaγobola ushihandileho, uhaγuwa ushimyaγileho. 25Ne vinigwizizevyo woγa, nizahita, nizafukila feza yako mwe shanga, shinu mali yako! 26Baba yakwe azamlandula angwe: U mupuna mubada mwena chevu; ati uzataila kuti: 27Nihaγobola nishihandileho, kuti: Nihaγuwa nishimyaγileho, anga uzahita, ukainkila feza zangu kwa wachuluzi, nanga imi nikiiza nizaγuwa vyangu na kuwo. 28Mumhokei mziγo wa feza, mumunke yuja mwena miziγo kumi! 29Hambu kila mwena kitende atainkwa vivyoho, aisiize kuγenyeza, miya ashinaye, hata viya, avyona navyo, atavihokwa. 30Miya uyu mupuna mchevu mshindikei na kwe lwiza ludala uko se! Ne ndiko kuivike kulila na kukemeza meno.

Masa ya mbali zoshe mushi wa bindilizo.

31Aho ndiho ṅwanangwa ywa muntu nezeaizile na utana wakwe haṅwe na walau wosheni, ne ndiho aikale mwe kiti cha utana wakwe. 32Vikibinda mbali zoshe zitaunganyanyiγwa na haja, aliho, aziahule, sa mulishi avyoahula ngoto na mbuzi. 33Ngoto ataziika kulume kwakwe, mbuzi kumosho. 34Vikibinda Zumbe atalonga waja we kulume kwakwe kuγamba: Izai, inywi waṅazi wa Tate, mupale uzumbe mwikilwewo inywi aho, shi ikiumbiγwa! 35Hambu ne niina sala, mzaninka vya ja; ne niina nkilu, mzaninka vya nywa; 36ne nii mγeni, mzanifikiza; ne niishina vya zwika, mzanivutila; ne nii mtamu, mzanikaula; ne nii mwe chumba, mzaiza kwa niluγusha. 37Ne ndiho waja watanda wamwitikile kuγamba: Zumbe, ni lini tikikuona, wina sala, tikikunka vya ja, ao du wina nkilu, tikikunka vya nywa? 38Ni lini tikikuona, ui mγeni, tikikufikiza, ao uishina shuke, tikikuvutila? 39Ni lini tikikuona, ui mtamu ao ui mwe chumba, tikikukaula? 40Zumbe atawahitwila, atawati: Kweli namiti: Awa wanduγu wangu wadodo, vyoshe mumγoshwelevyo ṅwiyae ywawe muṅwe, mzaviniγoshwela imi. 41Vikibinda atalonga waja we kumosho kuti: Ukai kwangu, inywi mulaniγwewo! Hitai kwe moto ushizimawo, waashiziγwawo yuja ṅwenye leba na walau wakwe! 42Hambu ne niina sala, nkamuninkile vya ja; ne niina nkilu nkamuninkile vya nywa; 43ne nii mγeni, nkamunifikize; ne niishina vya zwika, nkamunivulile; ne nii mtamu, ao ne nii mwe chumba, nkamunikaule. 44Ne ndiho waja wohe wamhitwile kuγamba: Zumbe, ni lini tikikuona, uina sala ao nkilu, ui mγeni, uishinavya zwika, ui mtamu, ui mwe chumba, tikishekutumikila? 45Ne ndiho awalandule kuti: Kweli namiti: Awa wadodo, vyoshe mwashamγoshwelavyo ṅwiyae ywawe muṅwe, hata imi nkamuviniγoshwele. 46Awa watahita kwe mlaho wa kale na kale, miya waja watanda watahita kwe nkalamo ya kale na kale.

Currently Selected:

Mateyo 25: KISHNT05

Highlight

Copy