Luka 7

Mkulu ywa washilikali Kapelinaumu.

1-10.

1Akibinda kulonga izi mbuli zoshe kwa waja wantu wamteγelezewo, azaingila Kapelinaumu. 2Kuna mkulu ywa washilikali, mupuna ywakwe azahuma, azabuza kufa, kangi ṅwenye aamkundisha. 3Akiiva mbuli ya Yesu, azamtumila waγolokezi wa Kiyuda, wazamhembeleza, kangwe ahite, akamhonyeze mupuna ywakwe. 4Waja wakibula kwa Yesu wazamhembeleza na kumhimila angwe: Vyaagiza, ukimfila mbazi ivyoho. 5Hambu akundisha mbali yetu, kangi ṅwenye azatizengela vikilo. 6Yesu azahita nawo. Ake hale hale na ija nyumba, yuja mkulu ywa washilikali azatuma weyae angwe: Zumbe ushefe muku! Hambu imi ni mhuza, nkavikuagiza, ukiingila mwangu. 7Kwa inu mbuli nizakifanyanyiza kuti: Nkaviagiza, nikikulawila ṅwenye; miya longa mbuli du! Ne mbwanga ywangu atahona. 8Hambu imi nami ni muntu neitika silikali, kangi nina washilikali weniitika; nikimγamba uyu: Hita!, ahita; nikimγamba mtuhu: Iza!, aiza; nikimγamba mupuna ywangu: Γoshola visiku!, aγoshola. 9Yesu akiviiva azamumaka; azahituka kwa waja wantu wemtongela angwe: Namiti: Kwa Waisilayeli saene mitozesheze ye ivyoho. 10Waja watumiγwewo wakiγotoka na kaya wazamubulila yuja mupuna, aihonile.

Mbwanga ywa Naini.

11Vikibinda azahita kwe muzi weitangwa Naini, wahina wakwe wazahita naye na wantu wangi. 12Akibula hehi na nkili ya muzi, kuzalaviγwa muntu afileye, ni mubwanga avyelweye ike ni nine, kangi uyu mvyele aafilwa ni mulume; wakaya wemtongela haṅwe naye ni bumba jebesha. 13Zumbe akimwona azabulwa ni utungu naye, azamuti: Ushelile! 14Azahita, azadowa ija nkingo, ne waja wainuzi wahoγoloka. 15Azalonga: Mubwanga, nakuti: Inuka! Yuja muntu afileye ne ahoikala, azaandiila kulonga, azamwinkila kwa nine. 16Woγa uzawaingila waja woshe, wazamtogola Mulungu wakiγamba: Mteγanyi mkulu azalawila kwetu, Mulungu azaolela mbali yakwe. 17Inu mbuli yakwe izahita, izagisa shi ngima ya Yudeya na shi zoshe zehampikana nayo.

Yohana mubatizi na Yesu.

18-35.

18Yohana azaukwilwa ivi vyoshe ni wahina wakwe. 19Azaitanga wahina wakwe waili, azawatuma kwa Zumbe angwe: Iwe u yuja mweiza, hambu tiafize mtuhu? 20Waja wantu wakibula kwakwe wazamuti: Yohana Mubatizi azatituma kwako angwe: Iwe u yuja mweiza, hambu tiafize mtuhu? 21Ija minga azahonya wangi mahisho yawe na vilema na mpepo mbada, hata matuntu mangi azayafila mbazi, yaone. 22Azawalandula angwe: Hitai, mumwukwile Yohana muvyoona na muvyoiva: Matuntu yaona, washiwodaha kuγenda waγenda, wakoma waushiγwa ukoma, washiwoiva waiva, wafilewo wafufulwa, wakiwa wabilikilwa nyemi. 23Mwe nyemi ni ndiye asheihilwe ni miyo! 24Waja walau wa Yohana wakibinda kuhita, azaandiila kuuzanya na wantu mbuli ya Yohana kuγamba: Kumbe aho mkizahita mwe nyika muhitile kwa olelai? Ni lasi jevuviγwa ni mpeho? Hambu muhitile kwa olelai? 25Ni muntu azwikileye shuke zedeeleka? Olelai! Wezwika shuke ntana na weja kizumbe wa mwe vitala. 26Miya lushe muhitilei? Kwa olela mteγanyingwa? Kweli namiti: Ni mkulu kuzinka mteγanyi. 27Uyu ne mwegondelwa kuγamba: Olela! Nezenitume mlau ywangu akakulongwele, na kukutulila sila yako, ndiyo ugwile. 28Nainiti: Woshe wavyelwewo ni wavyele nkakuna mkulu kumzinka Yohana Mubatizi; miya mweγaluka mdodo mwe uzumbe wa Mulungu ni mkulu kumzinka. 29Wantu woshe wamwivilewo, hata wangelu wazaitikila utanda wa Mulungu, wazabatizwa na ubatizi wa Yohana. 30Miya Mafaliseyo na watamulomongwa wazabela viya, Mulungu avyokunda, nkawabatizwe ndiye. 31Zumbe azawati: Wantu wa inu mbali niwafanyanye na mbwai, wavyofanana navyo? 32Wafanana na wana wadodo weikala lwazoi, welongana angwe: Tizamitowela inywi miluli, miya nkamvinile, tizamitumbwila ndilo, miya nkamulizite. 33Hambu Yohana Mubatizi azaiza, nkajile nkande, nkanywele mvinyo, lushe mwaγamba: Ana mpepo. Ṅwanangwa 34ywa muntu azaiza, aaja, aanywa, lushe mwaγamba: Shuyu muntu mwejilisha na kunywelesha mvinyo! Wangelu na wahuza ni ṅwiyae ywawe! 35Kweli viyuγo vikanilwa ni viya vyoshe viγosholwevyo ndivyo.

Yesu aambwilwa mavuta ni mvyele mhuza.

36Kuna Faliseyo, azamlalika, aje nkande naye. Akiingila mwe nyumba ya yuja Faliseyo azaikala haja ha jiila nkande. 37Kangi kuna mvyele mhuza mwe uja muzi; yuja akitaila, kuti aja nkande mwa yuja Faliseyo, azahita, azaγuwa kakomba ka mafutilo ya mluziluzi; 38azaγoloka nyuma hadodo he milundi yakwe akilila, ne ahoandiila kugisa milundi yakwe meshozi na kuyahonola na swili za mutwi wakwe, kangi azafyosa milundi yakwe na milomo yakwe, akibinda azaishisha yaja mafutilo. 39Yuja Faliseyo amlalikeye akiviona azafanyanya mwe moyo wakwe kuγamba: Ati uyu ni mteγanyingwa, anga azataila, uyu mvyele mwemdowa alivyo, kuti ni mhuza ṅwenye. 40Yesu azamlandula angwe: Simoni, nina vya longa na iwe. Angwe: Mfuzi, longa! 41Angwe: Ne kwina muntu akopiγweye ni wadeni waili, muṅwe akopile shilingi magana mashano, ṅwiyae milongo mishano. 42Wakishowa vya liha, woshe waili azawafila mbazi washelihe; lushe ndiye amkundishe kumzinka ṅwiyae, ni yuhi? 43Simoni azahitula angwe: Naγamba: Ni yuja afilweye mbazi kuzinka ṅwiyae. Azamuti: Uzaliγanyanya vyedi. 44Azamhitukila yuja mvyelengwa, azamlonga Simoni: Wamwona uyu mvyelengwa? Nizaingila nyumbai mwako, nkuninkile mazi ya kuhaka milundi, miya uyu azagisa milundi yangu meshozi, akibinda azayahonola na swili zakwe. 45Iwe nkufyosane na imi milomo; miya uyu, ivyo aingilevyo, nkadizile kufyosa milundi yangu. 46Mutwi wangu nkuushishize mavuta, miya uyu azashisha milundi yangu mafutilo ya mluziluzi. 47Nakuti: Kwa ivyoho mahuza yakwe mangi yazaushiγwa, hambu mikundishize yakwe ni mingi; miya mweushiliziγwa viγeke, mikundishize yakwe ni miγeke. 48Azamuti yuja mvyele: Mahuza yako yazaushiγwa. 49Waja weja nkande haṅwe naye wazaandiila kufanyanya mwe myoyo yawe kuγamba: Uyu ni ndai, akiushiliza wantu mahuza? 50Azamγamba yuja mvyele: Mitozesheze yako izakuvunila; hita mpeho!

Currently Selected:

Luka 7: KISHNT05

Highlight

Copy