Yohana 21

Yesu alawila wahina he ziwa ja Tibeliya.

1Ziya mbuli zikibontoka, Yesu azalawila waja wahina vituhu he bahali ya Tibeliya. Awalawilevyo ni iviho: 2Simoni Petelo na Toma mweitangwa Mpasha na Natanayeli ywa Kana ya Galileya na wana Zebedeyo na wahina wakwe watuhu waili ne wai haṅwe. 3Simoni Petelo awati weyae: Nahita kwa lowa. Wazamwitikila: Hata ishwi tihite haṅwe na iwe! Wazalawa, wazaingila mwe chombo, miya chiya kilo nkawana wagwizilevyo. 4Kukicha Yesu azaγoloka mpwai, miya waja wahina nkawataile, kuti ni Yesu. 5Yesu awati: Wanangu, nkamna vya ja? Wazamlandula: Do. 6Azawati: Gelai lwavu lwazu lwa kulume lwa chombo, nemwonele! Wazalugela, miya nkawadahile kuluhuna kwa ungi wa nyama za bahali. 7Yuja mhina, Yesu amkundisheye, azamuti Petelo: Ni Zumbe yuja! Simoni Petelo akiiva, kuti ni Zumbe, azakanta nkazu yakwe, hambu ne ai bule, azalumbila na mwe bahali. 8Miya waja wahina watuhu wazahita na chombo, hambu ne waishi hale na mpwai, ni mikono magana maili, wazahuna lwavu na ziya nyama. 9Wakibula kuja mpwai wazaona makala ya moto yaikiγweyo na makapala muja zikoi na vimande. 10Yesu awati: Letei makapala kuṅwe, mugwizileyo ivi lushe! 11Simoni Petelo azahita, azahuna lwavu na mpwai, luna nyama nkulu muno gana na milongo mishano na ntatu; hata zikiγenela ivyoho, lwavu nkaludwikile. 12Yesu awati: Izai na kunu, mkishashule! Waja wahina nkakuna atozizeye moyo kumwuza: Iwe u ndai? Hambu wazataila, kuti ni Zumbe. 13Yesu aiza, aγuwa kimande, awainka, hata kapala vivyoho. 14Ako ni ka ntatu, Yesu akilawila waja wahina akibinda kufufuka.

Yesu na Simoni Petelo.

15Wakibinda kukishashula, Yesu amγamba Simoni Petelo: Simoni, ṅwana Yohana, wanikundisha kuzinka awa? Angwe: Ehe, Zumbe! Iwe wataila, kuti nakukundisha. Angwe: Lisha viγoto vyangu! 16Vituhu amγamba Petelo ka mbili: Simoni, ṅwana Yohana, wanikundisha? Angwe: Ehe, Zumbe! Iwe wataila, kuti nakukundisha. Amuti: Γolokela ngoto zangu! 17Amγamba ka ntatu: Simoni, ṅwana Yohana, wanikundisha? Petelo azaona ukiwa, kuti amwuza ka ntatu: Wanikundisha?, azamuti: Zumbe, wataila mbuli zoshe, iwe wataila, kuti nakukundisha. Yesu amuti: Lisha ngoto zangu! 18Kweli nakuti: Aho, ndiho ui mubwanga, uzakikanta ṅwenye, uzaanga, ukundileko. Miya ndiho udalahale, neukusule mikono yako, kangi mtuhu atakukanta, akuiγale ushikundako. 19Inu mbuli ailongile, kangwe amwonyeshe mifiile, ndiyo amgimbike Mulungu nayo. Akibinda kulonga ivi, amti: Nitongela! 20Petelo azahituka, azamwona yuja mhina, Yesu amkundisheye, kuti amtongela; ni yuja ndiye akiikala hehi na Yesu wakija nkande za ṅwiyaγulo, akimwuza: Zumbe, ni ndai mwekuinkila? 21Petelo akimwona uyu amγamba Yesu: Zumbe, uyu ana mbwai? 22Yesu amuti: Ati imi nakunda, aikale, mpaka nikizaiza, iwe una mbwai navyo? 23Iwe nitongela du! Ne iyo mbuli iandukeho, wanduγu wakihalonga: Yuja mhina nkafa. Miya Yesu nkalongile kuti: Nkafa, miya alongile: Ati nakunda, aikale, mpaka nikizaiza, iwe una mbwai navyo?

Bindilizo.

24Uyu ni yuja mhina mwelongela izi mbuli uwona, ne azigondileye, kangi tataila, kuti uwona wakwe ni wa kweli.

25Miya kuna mbuli nyingi ntuhu, Yesu aγosholezo; ati ziya zagondwa ṅwenga ṅwenga, nanga naγamba: Hata mwe ngulu ngima nkeviγendwe viya vitabu, ndivyo vizigondwe.

Currently Selected:

Yohana 21: KISHNT05

Highlight

Copy