Yohana 12

Yesu aambwilwa mavuta.

1-8.

1Kukeshiγale mishi mtandatu, mviko wa Pasa ukibula; Yesu azahita Betaniya, Lazalo akoikala, ni yuja, Yesu amfufuleye kwa wafilewo. 2Kuja wazamzuγila nkande, Malita azaγoshola ndima, Lazalo aiikale nawo he nkande. 3Maliya azaγuwa kakomba ka mavuta ya muti weitangwa Nalada yavanganyiγweyo na mafutilo ya mluziluzi, yeγulwa na mali nyingi muno, azashisha nayo milundi ya Yesu, akiheza azahonola ija milundi yakwe na swili zakwe. Nyumba yoshe izagisa mhempe wa yaja mavuta. 4Waja wahina wakwe ṅwiyae ywawe muṅwe, ni Yuda Isikaliyota, ni yuja amwinkileye uko nyuma, azaγamba: 5Nini aya mavuta yakishetaγwa kwa shilingi magana maili, zikainkilwa kwa wakiwa? 6Nkalongile ivyoho, kuti atapikila wakiwa, miya ni mubavi, aitozize mfuko wa senti, aiinule wavyokainkwa. 7Angwe ni Yesu: Muleke! Kangwe ayaikile mushi wa kuzikwa kwangu. 8Hambu wakiwa muna nawo kwenyu mishi yoshe, miya imi nkamna na imi mishi yoshe. 9Wantu wangi wa Kiyuda wakitaila, kuti a γuko, wazaiza, miya so kwa mbuli ya Yesu ike, miya kangwe wamwone Lazalo yohena, amfufuleye kwa wafilewo. 10Wavikizi wakulu wazaivana kumkoma Lazalo yohe, 11kwa kuti Wayuda wangi wazahita kwa mbuli yakwe, ne wahomtozesha Yesu.

Yesu aingila Yelusalemu.

12-19.

12Keloi jakwe wantu wangi waizilewo kwe uja mviko wakiiva kuti: Yesu aiza Yelusalemu, 13wazaγuwa masala, wazamγendela nayo singili wakiimba: Hoziyana! Atogolwe mweiza mwe zina ja Zumbe! Ni Zumbe ywa Isilayeli! 14Yesu azaona ṅwampunda, azamupanda, sa vigondiγwevyo kuγamba: 15Usheogohe, mndele Siyoni! Shuyu Zumbe ywako! Aiza, aipandile ṅwana njowe. 16Iviwahinawakwe bosi nkawavitaile, miya Yesu akibinda kuinkwa utana, wazafukilakuti: Neagondelweye izo mbuli, kangi wenye wazazimγoshwela. 17Waja wantu, ndiwo aina nawo, akimwitanga Lazalo, alawe mwe mbila, akimfufula kwa wafilewo, wazavibilikila. 18Kwa ivyoho wantu wazamγendela singili, kwa kuti wazaiva, kuti azaγoshola luja lwitangilo. 19Mafaliseyo wazaγambilana: Olelai kuti: Nkamγesa! Shivyo: Wantu woshe wamtongela.

Wagiliki wamlonda Yesu.

20Mwe waja wakwezilewo kwa binda mviko kuna Wagiliki kuṅwe. 21Waja wazamwizila Filipo ywa Betisayida ya Galileya, wazamhembeleza angwe: Zumbe! Takunda kumwona Yesu. 22Filipo azahita, azavimγambila Andeleya. Andeleya na Filipo wazavimγambila Yesu. 23Yesu azawalandula angwe: Haibuzile, ṅwanangwa ywa muntu agimbikwe.

Mpuluzi ya ngano.

24Kweli namiti: Ati mpuluzi ya ngano yashegwa mwe shanga ikifa, yaikala ṅwenye ike; miya ikifa yalavya kuwo jingi. 25Mwekikundisha ṅwenye akiaza; mwekishuka ṅwenye mwe inu shi atakihonya, abule kwe nkalamo ya kale na kale. 26Ati muntu anitumikila, shuti anitongele! Hambu niliho imi, mndima ywangu yohe aikale haho! Ati muntu anitumikila, Tate atamgimbika. 27Ivi lushe moyo wangu una futofuto. Kangi niγambeze? Tate, nihonya, hashenibwile? Kangi ne vilekilevyo, nikihatimila!

Kanwa cha Tate.

28Tate, gimbika zina jako! Kuzalawa kanwa mwe lwingu angwe: Naajigimbika, kangi nenijigimbike vituhu! 29Wantu waγolokewo haja wakiviiva wazaγamba: Kuzaγuγumuka; watuhu wazaγamba: Mlau azalonga naye. 30Yesu azalandula angwe: Ichi kanwa nkachilawile kwa mbuli ya imi, miya ni kwa mbuli ya inywi. 31Ivi lushe ni mishi ya kulaha inu shi; ivi lushe zumbe ywa inu shi inga ashindikwe na se.

Yesu inga akweziγwe.

32Nami ndiho nikweziγwe ṅa kuushiγwa kunu shi, woshe nitawahuna na kwangu. 33Ivi avilongile, awaonyeshe mifiile, ndiyo afe. 34Wantu wazamlandula: Ishwi tizaiva mwe mulomongwa kuti: Kilisito akalama kale na kale, iwe ulonga ywai kuti: Ṅwanangwa ywa muntu shuti akweziγwe? Uyu ṅwanangwa ywa muntu ni ndai? 35Yesu azawati: Langaila jike kwenyu mishi miγeke; angai, kwa kuti langaila mkena najo, kangwe lwiza lushemigweele! Kangi mweanga na lwiza nkataila, akohita nako. 36Kwa kuti langaila muna najo, jiya langaila jitozeshei, kangwe mγaluke wana wa langaila! Yesu akibinda kulonga ivyoho, azahita, azakifisha, asheoniγwe ndiwo.

Wayuda nkawatozesha.

37Kangi aiγoshole ntangilo zeinga haja, waja waiolele, miya nkawamtozeshe, 38kangwe mbuli ya mteγanyi Yesaya iwabontokele, akiγamba: Zumbe, mwetozesha ulau wetu ni ndai? Mwefumbwilwa viya vya mkono wa Mulungu ni ndai? 39Kwa ivyoho nkawadahile kutozesha, kuti Yesaya azalonga hatuhu: 40Mesho yawe azayakoma, myoyo yawe azaitoγesha, kangwe washeone na mesho yawe, washetaile na myoyo yawe, wakihituka, nikiwahonya. 41Ivyoho Yesaya alongile, kwa kuti azaona utana wakwe, kangi azalonga mbuli yakwe. 42Vivyoho wafuṅwa wangi wazamtozesha, miya kwa mbuli ya Mafaliseyo nkawavilavilize, washezalemeziγwa miviko; 43hambu kushimilwa ni wantu wazakukunda kuzinka kushimilwa ni Mulungu. 44Yesu azabilikila angwe: Mwenitozesha nkanitozesha imi, miya amtozesha yuja anitumileye; 45kangi mweniona amwona yuja anitumileye. 46Imi ni langaila, nizaiza mwe inu shi, kangwe kila mwenitozesha asheange mwe lwiza. 47Ati muntu aiva mbuli zangu, miya akisheziγoja, imi simlaha, hambu siizile kwa laha inu shi, miya kwa vunila inu shi. 48Mwenibela na kushehokela mbuli zangu ana mwemlaha; mbuli, nilongileyo, ija nezeimlahe mushi wa bindilizo. 49Hambu imi silongile vyangu ṅwenye, miya Tate anitumileye ne anilaγilizeye, ndivyo nibilikile, ndivyo nilonge. 50Nataila, kuti mlaγilizo wakwe ni nkalamo ya kale na kale. Nivyolonga, nivilonga sa viyaho Tate anilaγilizevyo.

Currently Selected:

Yohana 12: KISHNT05

Highlight

Copy