Yohana 11

Utamu wa Lazalo.

1Ne kwina muntu mwehuma, ndiye Lazalo ywa Betaniya, ni uja muzi wa Maliya na mkuluwe Malita. 2Maliya ni yuja amshishizeye Zumbe mafutilo ya mluziluzi haṅwe na kuhonola meshozi mwe milundi yakwe na swili zakwe; uyu lumbuje Lazalo azahuma. 3Waja walumbuze wazamtumiza angwe: Zumbe, olela! Yuja, uyemkundisha, ahuma. 4Yesu akiviiva azalonga: Unu utamu so wa kufa, ni wa kumgimbika Mulungu, kangwe ṅwana Mulungu agimbikwe ndiwo. 5Yesu azamkundisha Malita na nduγuye na Lazalo. 6Akiiva, kuti ahuma, azanaikala haja hantu, aliho, mishi mili. 7Vikibinda azaγamba wahina wakwe: Netiliite vituhu Yudeya! 8Waja wahina wamuti: Mfuzi mkulu, zuzi Wayuda wazalonda kukuhomela mawe, kangi vituhu wahita na γuko? 9Yesu azalandula angwe: Mush: nkauna saa kumi na mbili? Ati muniu aanga mushii, nkakikwila, hambu aona langaila ja inu shi. 10Ati muntij aanga na kilo, akikwila, hambu langaila nkana najo. 11Akilonga ivyoho, akibinda awati: Mumbuya ywetu Lazalo aisisile; miya nahita, nikamwinule mwe usisiza. 12Angwe ni wahina: Zumbe, ati aisisile, inga ahone. 13Miya Yesu alongile mbuli ya kufa kwakwe, miya waja wafanyanye, kuti atelonga kusisila ṅwenye. 14Ne Yesu aholonga na kulaviliza: Lazalo azafa; 15miya natamilwa kwa mbuli ya inywi, kangwe mtozeshe, kwa kuti ne niishiho; miya netihite na uko, aliko! 16Toma mweitangwa Mpasha azawati wahina weyae: Netihite neshwi, tikakoṅwe haṅwe naye!

Malita na Maliya.

17Yesu akibula azamubwila, a mwe mbila mishi mine. 18Miya Betaniya ni hehi na Yelusalemu, ni luγendo lwa kahindi ka saa. 19Wayuda wangi waiizile kwa Malita na Maliya, wawahongeze kwa mbuli ya lumbu jawe. 20Malita akiiva kuti: Yesu aiza, azamγendela singili, Maliya azanyamala kaya. 21Malita azamγamba Yesu: Zumbe, ati ne ui haha, anga lumbu jangu nkafile. 22Hata ivi lushe nataila kuti: Vyoshe, ndivyo umlombeze Mulungu, Mulungu neavikunke. 23Yesu azamuti: Lumbujo neafufuke. 24Angwe ni Malita: Nataila, kuti neafufuke mwe ufufuki mushi wa bindilizo. 25Yesu amuti: Imi ni ufufuki na nkalamo; mwenitozesha neakalame, hata akifa. 26Kangi kila mwe moyo akinitozesha nkezeafe kale na kale. Wavitozesha ivi? 27Angwe: Ehe, Zumbe; imi niitozeshe kuti: Iwe u Kilisito, ṅwana Mulungu, aizileye mwe inu shi. 28Akibinda kulonga ivyoho azahita, azamwitanga nduγuye Maliya, azamlonga he njama, azamuti: 29Mtuzi a haha, akuitanga. Yuja akiviiva azafikainuka, azamtimila; miya 30Yesu nkazati aingile mwe uja muzi, ake haja hantu, Malita akintaneho naye. 31Wayuda, ndiwo waina naye muja nyumbai wakimhongeza, wakimwona Maliya, kuti azafikainuka, akilawa, wazamtongela, hambu wazafanyanya kuti: Azahita kwe mbila, akalilile γuko. 32Maliya akibula, Yesu aliho, akimwona azamkinila he milundi, azamuti: Zumbe ati ne ui haha, anga lumbu jangu nkafile. 33Yesu akimwona, avyolila, hata waja Wayuda waizilewo haṅwe naye wavyolila, azaihilwa mwe moyo wakwe, azaona futofuto, 34azalonga: Mumwikile hi? Angwe: Zumbe, so, ukaolele! 35Yesu azalila. 36Wayuda wazaγamba: Olelai, ndivyo akimkundisha!

Lazalo afufulwa.

37Weyae wawe kuṅwe wazaγamba: Yuja aγubuleye mesho ya jiya tuntu nkadahile kufingiza, uyu yohena ashefe? 38Yesu azaihilwa vituhu mwe moyo wakwe, ne ahobula he mbila; ni mpanga izuγalweyo na iwe. 39Yesu azalonga: Ushai iji iwe! Malita, lumbuje ja yuja afileye, amuti: Zumbe, aanunka, hambu lelo ni mushi wakwe wa ne. 40Yesu amuti: Sikuγambile kuti: Ati watozesha, neuone utana wa Mulungu? 41Wazausha lushe jiya iwe. Yesu azainula mesho na ulanga, azalonga: Tate nakutogola kuti: Uzaniiva. 42Miya niitaile kuti: Waniiva mishi yoshe; miya nivilongile kwa mbuli ya awa wantu weγoloka aha na kunidenganila, kangwe watozeshe, kuti uzanituma. 43Akibinda kulonga ivyoho azaitanga na kanwa kikulu: Lazalo, lawa! 44Yuja afileye azalawa, aikantiγwe milundi na mikono na shuke, hata cheni chakwe chiiγubikwe na mhaluma. Yesu awati: Mshungulei, mumleke, ahite! 45Wayuda wangi waizilewo kwa Maliya wakiona, aγosholevyo, wazamtozesha.

Wavikizi walonda mikomele.

46-53.

46Miya weyae wawe kuṅwe wazahita kwa Mafaliseyo, wazawaγambila, Yesu aγosholevyo. 47Wavikizi wakulu na Mafaliseyo wazaunganyanya wafuṅwa woshe, wazaγamba: Titende zeze? Hambu uyu muntu aγoshola ntangilo nyingi. 48Ishwi likimleka vivyoho, wosheni watazamtozesha; bindilizo Waloma wataiza, watatihoka shi haṅwe na wantu. 49Kuna ṅwiyae ywawe muṅwe, ni Kayafa, ni mvikizi mkulu jiya vuli, yuja awati: Inywi nkamna mchotaila! 50Kangi nkamtongonyeza, kuti vyaagiza, muntu muṅwe akifa kwa mbuli ya mbalingwa, kangwe mbali ngima ishebanike. 51Ivyoho nkalongile ṅwenye, miya kwa kuti ni mvikizi mkulu jiya vuii, azateγanya; hambu Yesu aifanyanyiziγwe, afe kwa mbuli ya mbalingwa, 52kangi so kwa mbuli ya mbalingwa du, miya hata kwa mbuli ya wana Mulungu waasakanyiγwewo wohena awaunganyanye hantu haṅwe. 53Mushi uja wazaandiila kufanyanya, ndivyo wamkome. 54Yesu azaleka lushe kuanga kwa Wayuda cha sale, miya azahauka, azahita mwe shi ye hehi na nyika, ni muzi weitangwa Efulayimu, azaikala mumo na wahina wakwe. 55Miya mviko wa Pasa wa Wayuda ne ui hehi, wangi wazakwela Yelusalemu wakilawa kwawe, uwo mviko wa Pasa ushizati ukinte, kangwe wakihoze. 56Wazamlonda Yesu, wazaγambilana, waiγoloke mwe vikilongwa: Muγambai? Nkeaize kwe unu mviko? 57Wavikizi wakulu na Mafaliseyo wailavize milomo kuγamba: Ati muntu ataila aliho, shuti alonge, kangwe wamgwile.

Currently Selected:

Yohana 11: KISHNT05

Highlight

Copy