Tobit 14
14
CAB. 14
1Myr shoh ren Tobit jerrey ’yannoo er moylley Jee.
2As v’eh hoght bleeaney jeig-as-daeed dy eash tra chaill eh ’hoilshey, cooid hooar eh reesht lurg hoght bleeaney: as hug eh jeirk, as vishee eh ayns aggle y Chiarn Jee, as hug eh moylley da.
3As tra v’eh feer shenn, deie eh er e vac, as shey mec e vac, as dooyrt eh rish, My vac, gow dty chloan; son cur-my-ner, ta mish shenn, as ta mee aarloo dy aagail y vea shoh.
4Immee gys Media my vac, son ta mish dy-shickyr credjal ny reddyn shen loayr y phadeyr Jonas mychione Nineve, dy bee eh er ny hilgey bun-ry-skyn; as son tammylt dy bee ny smoo dy hee ayns Media; as dy bee nyn mraaraghyn skeaylt fud y theihll veih’n cheer vie shen: as bee Jerusalem ny hraa[r]tys, as thie Yee t’ayn vees er ny lostey, as vees ny hraartys son tammylt;
5As dy bee reesht myghin ec Jee orroo, as dy der eh lesh ad reesht stiagh ’sy cheer, raad troggee ad chiamble, agh cha nee casley rish y chied unnane, derrey vees earish y cheeloghe shen er ny chooilleeney; as ny lurg shen chyndaaee ad reesht veih dy-chooilley ynnyd jeh nyn gappeeys, as Jerusalem y hroggal dy gloyroil, as thie Yee vees troggit ayns shen son dy-bragh lesh troggal gloyroil, ’naght myr ta ny phadeyryn er loayrt jeh.
6As nee dy-chooilley ashoon chyndaa, as aggle firrinagh ’ghoaill roish y Chiarn Jee, as nee ad goanluckey nyn yallooyn.
7Myr shen nee dy-chooilley ashoon yn Chiarn y voylley, as nee e phobble goaill-rish Jee, as nee’n Chiarn soiaghey seose e phobble; as nee ooilley adsyn ta graihagh er Chiarn Jee ayns firrinys as ynrickys boggey ’ghoaill, soilshaghey myghin da nyn mraaraghyn.
8As nish, my vac, immee royd magh ass Nineve, er-yn-oyr as dy jig ny reddyn shen loayr y padeyr Jonas son shickyrys gy-kione.
9Agh freill uss yn leigh as ny annaghyn, as jeeagh oo-hene myghinagh as ynrick dy vod eh goll dy mie mayrt.
10As oanluck mish dy feeudagh, as dty voir marym; agh nagh fuirree veg sodjey ec Nineve. Cooinee, my vac, kys ren Aman loaghtey Achiacharus ren eh y hroggal, ass soilshey hug eh lesh eh ayns dorraghys, as kys deeck eh eshyn reesht: ny-yeih va Achiacharus er ny hauail, agh hooar yn fer elley e leagh: son hie eh sheese ayns dorraghys; hug Manasses jeirk, as scaap eh ny ribbaghyn baaish v’ad er hoiaghey er-e-hon: agh huitt Aman sy ribbey, as ren eh cherraghtyn.
11Shen-y-fa nish, my vac, smooinee cre ta jeirk dy yannoo, as kys ta cair-ys cur livrey. Tra ve er ghra ny reddyn shoh, hooar eh baase ’sy lhiabbee, ec shiaght-feed blein as hoght-jeig dy eash; as hug eh oanluckey ooasle da.
12As tra va Anna e voir marroo, doanluck eh ee marish e ayr; agh jimmee Tobias marish e ven as e chloan gys Ecbatane, gys Reguel e ayr-sy-leigh,
13Raad haink eh dy ve shenn as ooasle, as doanluck eh e ayr as e voir-’sy-leigh dy staydoilagh, as ghow eh ayns eiraght yn chooid oc, as cooid Tobit e ayr.
14As hooar eh baase ec Ecbatane ayns Media, ec shey-feed blein as shiaght dy eash.
15Agh roish hooar eh baase cheayll eh jeh stroialtys Nineve, va goit liorish Nabuchodonosor as Assuerus: as my dooar eh baase ghow eh boggey harrish Nineve.
Currently Selected:
Tobit 14: YNAPBR
Highlight
Share
Copy
Want to have your highlights saved across all your devices? Sign up or sign in
© Yn Cheshaght Ghailckagh 1979, 2017
© Manx Gaelic Society 1979, 2017