Tobit 12
12
CAB. 12
1Eisht deie Tobit er e vac Tobias, as dooyrt eh rish, My vac, jeeagh dy vow’n dooinney hie mayrt e aill, as shegin dhyt tooilliu ’choyrt da.
2As dooyrt Tobias rish, O ayr, cha nel eh coayl erbee dooys dy chur da lieh jeh ny reddyn shen ta mee er chur lhiam:
3Son t’eh er my chur lesh reesht hoods ayns sauchys as er laanaghey yn ven aym’s, as er chur lesh yn argid hym, as myrgeddin er lheihys uss.
4Eisht dooyrt yn chenn ghooinney, Te cair da.
5Myr shen deie eh er yn ainle, as dooyrt eh rish, Gow eh jeh ooilley ny ta shiu er choyrt lhieu, as immee royd ayns sauchys.
6Eisht ghow eh ad ny-neesht er-lheh as dooyrt eh roo, Cur shiu booise da Jee, moylley-jee eh, as cur-jee ard ooashley da, as jean-jee eh y voylley son ny reddyn t’eh er n’yannoo riu ayns shilley ooilley ny bioee. Te mie dy choyrt moylley da Jee, as dy ghloyraghey yn ennym echey, as ooasle dy hoilshaghey magh obbraghyn Yee; shen-y-fa nagh bee-jee lhag dy chur moylley da.
7Te mie folliaghtyn ree y reayll keillit, agh te red ooasle dy hoilshaghey magh obbraghyn Yee; jean shen ny ta mie, as cha vod olk erbee bentyn rhyt.
8Ta padjer mie marish trostey as jeirk as ynrickys; ta red beg lesh ynrickys ny share na lane lesh neuynrickys; te ny share jeirk y choyrt na dy hashtey seose airh:
9Son ta jeirk livrey voish baase, as nee eh glenney ersooyl dy chooilley pheccah, adsyn ta cur-rish jeirk as ynrickys vees er nyn yannoo magh lesh bea:
10Agh adsyn ta cur-rish peccah, t’ad noidyn da nyn mioys hene.
11Dy jarroo, cha geill-ym nhee erbee veue; son dooyrt mee, Dy row eh mie folliaghtyn ree y cheiltyn, agh dy row eh red ooasle dy hoilshaghey magh obbraghyn Yee.
12Nish, er-y-oyr shen, tra v’ou uss goaill padjer, as Sara dty ven-chleuin, hug mish lhiam yn imraa jeh ny padjeryn eu kiongoyrt rish yn Er Casherick: as tra ren oo ny merriu y oanluckey, va mish mayrt myrgeddin.
13As tra hrog oo ort fegooish cumrail, as daag oo dty yinnair, dy gholl dy choodaghey ny merriu, cha row yn obbyr vie ayd gyn-yss dou: agh va mee mayrt.
14As nish ta Jee er my choyrt dy lheihys oo-hene as Sara dty ven-chleuin.
15Mish Raphael, unnane jeh ny shiaght ainlyn casherick ta chebbal padjeryn ny nooghyn, as ta goll stiagh as magh kiongoyrt rish gloyr yn Er Casherick.
16Eisht v’ad ny-neesht seaghnit, as huitt ad er nyn eddinyn: son v’ad agglit.
17Agh dooyrt eh roo, Nagh gow-jee aggle son hed eh dy mie meriu; cur-jee moylley da Jee er-y-fa shen.
18Son cha nee jeh my chenjallys hene, agh liorish aigney nyn Yee haink mish; er-y-fa shen moylley-jee eh son dy bragh.
19Ooilley ny laghyn shoh haink mee er-ash gys nyn reayrt; agh cha ren mee edyr gee ny giu, agh honnick shiu caslys.
20Nish er-y-fa shen cur-jee booise da Jee: son ta mish goll seose huggeysyn ren my choyrt; agh scrieu ooilley ny reddyn shen ta jeant ayns lioar.
21As tra v’ad er n’irree, cha vaik ad eh arragh.
22Eisht ghow ad rish obbraghyn mooarey as yindyssagh Yee, as kys va ainle y Chiarn er yeeaghyn eh-hene daue.
Currently Selected:
Tobit 12: YNAPBR
Highlight
Share
Copy
Want to have your highlights saved across all your devices? Sign up or sign in
© Yn Cheshaght Ghailckagh 1979, 2017
© Manx Gaelic Society 1979, 2017