Judith 4
4
CAB. 4
1Nish cheayll cloan Israel, va baghey ayns Judea, jeh ooilley ny va Holofernes ard-chaptan Nabuchodonosor ree ny Assyrianee er n’yannoo rish ny ashoonyn, as cre’n aght v’eh er spooilley ooilley ny chiambylyn oc, as er n’yannoo ad gyn-veg.
2Shen-y-fa v’ad ayns aggle ass towse jeh, as imneagh son Jerusalem, as son chiamble y Chiarn nyn Yee:
3Son cha voddey neayr v’ad er hyndaa veih’n chappeeys, as va ooilley pobble Yerusalem er-y-gherrit shen chaglit dy cheilley: as va ny siyn as yn altar, as y thie er nyn gasherickey lurg yn an-chasherickey.
4Shen-y-fa hug ad fys gys ooilley ardjyn Samaria, as ny baljyn-beggey, as gys Bethoron, as Belmen, as Jericho, as gys Choba, as Esora, as gys coan Salem:
5As ghow ad daue-hene ro-laue ooilley mulleeyn ny sleityn ard, as niartee ad ny baljyn beggey v’ayndoo, as hasht ad seose beaghey cour y chaggey: son va ny magheryn oc er-y-gherrit shen buinnit.
6Myrgeddin ren Joacim yn ard saggyrt, va ayns ny laghyn shoh ec Jerusalem, scrieu hucsyn va cummal ayns Bethulia, as Betomestham, ta jeeragh er Esdraelon, lesh cheu yn cheer rea, er-gerrey da Dothaim,
7Curmaghey ad dy reayll ny raaidjyn gys cheer-ny-gronk: son lioroo va reamys dy gholl stiagh ayns Judea, as ve ny sassey dy lhiettal adsyn harragh seose, er-yn-oyr as dy row’n raad coon dy liooar son daa ghooinney ec y chooid smoo.
8As ren cloan Israel myr va Joacim yn ard saggyrt er harey daue, marish y chenndeeaght jeh ooilley pobble Israel, va baghey ec Jerusalem.
9Eisht ren dy chooilley ghooinney dy Israel geamagh gys Jee lesh jeeanid vooar, as lesh ooilley nyn gree ren ad nyn anmeenyn y injillaghey:
10Chammah ad-hene as nyn mraane, as nyn gloan, as nyn maase, as dy chooilley yoarree as fer-failt, as sharvaantyn kionnit lesh argid, hug aanrit-sack er nyn meeghyn.
11Myr shen ren dy chooilley ghooinney as ben, as y chloan veggey, as huitt cummaltee Yerusalem sheese roish y chiamble, as spreih ad leoie er nyn ging, as skeayl ad magh nyn aanrit-sack roish eddin y Chiarn: myrgeddin hug ad aanrit-sack mygeayrt-y-mysh yn altar,
12As deie ad gys y Jee dy Israel ooilley lesh un chree as aigney nagh derragh eh nyn gloan son cragh, as nyn mraane son spooilley, as ard-valjyn nyn eiraght gys toyrt-mow, as yn ynnyd casherick dy ve er ny an-chasherickey as oltooan, da ny ashoonee dy voggyssagh harrish.
13Myr shen cheayll Jee ny padjeryn oc, as yeeagh eh er nyn seaghyn: son ren y pobble trostey ymmodee laghyn ayns ooilley Judea as Jerusalem, kiongoyrt rish ynnyd casherick yn Chiarn Ooilley-niartal.
14As Joacim yn ard saggyrt, as ooilley ny saggyrtyn hass kiongoyrt rish y Chiarn, as adsyn ren shirveish gys y Chiarn, va nyn meeghyn cryssit aanrit-sack, as heb ad ny ourallyn-losht gagh laa, marish breearaghyn as giootyn arryltagh yn pobble,
15As va leoie er nyn geyjeenyn, as deie ad gys Jee lesh ooilley nyn booar, dy jinnagh eh jeeaghyn dy foayroil er slane thie Israel.
Currently Selected:
Judith 4: YNAPBR
Highlight
Share
Copy
Want to have your highlights saved across all your devices? Sign up or sign in
© Yn Cheshaght Ghailckagh 1979, 2017
© Manx Gaelic Society 1979, 2017