Judith 10
10
CAB. 10
1Nish lurg j’ee v’er scuirr dy eamagh gys y Chiarn dy Israel, as er n’yannoo jerrey er ooilley ny goan shoh,
2Dirree ee raad v’ee er duittym sheese, as dyllee ee er e hinney-veyl, as jimmee ee sheese gys y thie ayn ren ee cummal er ny laghyn-doonee, as ny laghyn-feailley eck,
3As cheau ee lee yn aanrit-sack v’urree, as hug ee jee garmadyn e treoghys, as niee ee e corp ooilley harrish lesh ushtey, as d’ooillee ee ee-hene lesh ooill deyr, as fee ee folt e kione, as hug ee quoif er, as hug ee urree e garmadyn dy ghennallys, lhieu v’ee er ny coamrey choud’s va Manasses e sheshey bio.
4As hug ee braagyn er e cassyn, as hug ee mo’ee e boandaghyn-mhuinneel, as e fainaghyn-cleayshey, as ooilley e jesheenyn, as ren ee ee-hene y hoiaghey magh dy braew, son dy chleaynaghey sooillyn dy chooilley ghooinney yinnagh fakin ee.
5Eisht hug ee da e hinney-veyl boteil feeyney, as cruishtin dy ooill, as poagey lhieent lesh arroo greddanit, as cruint dy figgyn, as lesh arran mie; myr shen dhill ee ooilley ny reddyn shoh cooidjagh, as hug ee urree ad.
6Myr shoh hie ad magh gys giat ard-valley, Vethulia, as hooar ad ny shassoo ayns shen Osias, as shanstyryn yn ard-valley, Chabris as Charmis.
7As tra honnick ad ee, dy row yn eddin eck ceaghlit, as e coamrey er ny chaghlaa, ghow ad yindys mooar jeh’n aalid eck, as dooyrt ad ree,
8Dy der Jee, Jee nyn ayraghyn, foayr dhyt, as shen ny t’ou er ghoaill ayns laue y chooilleeney gys gloyr cloan Israel, as gys yrjagh Yerusalem; eisht hug ad ooashley da Jee.
9As dooyrt ish roo, Cur-jee sarey giattyn yn ard-valley dy [ve] foshlit dou, dy vod-ym goll magh son dy chooilleeney shen jeu ren shiu loayrt rhym; myr shen hug ad sarey da ny deiney aegey ad dy osley j’ee, myr v’ee er ghra.
10As tra v’ad er n’yannoo shen, hie Judith magh, ish as e hinney-veyl maree; as yeeagh deiney yn ard-valley geiyrt urree, derrey v’ee ersooyl sheese jeh’n clieau, as derrey v’ee er n’gholl shaghey’n coan, as nagh bleayr daue ee ny sodjey.
11Myr shoh jimmee ad jeeragh magh ’sy choan: as veeit yn chied arrey jeh ny Assyrianee ee,
12As ghow ad ee, as denee ad jee, Cre’n sleih t’ou jeh? as cre voish t’ou er jeet? as cre dys t’ou goll? As dooyrt ee, Ta mish ben jeh ny Hebrewnee, as ta mee er hea voue: son bee ad er nyn livrey hiuish dy ve currit mow:
13As ta mish cheet kionfenish Holofernes ard-chaptan yn armee euish, dy loayrt focklyn firrinagh; as jeeaghyms da aght liorish nee eh goll, as ooilley cheer-ny-gronk y chosney, fegooish coayl corp ny bioys unnane jeh e gheiney.
14Nish tra va ny deiney er chlashtyn ny goan eck, as er n’akin e heddin, ghow ad yindys mooar jeh’n aalid eck as dooyrt ad ree,
15T’ou er hauail dty vioys, ayns dy vel oo er n’yannoo siyr dy heet sheese kionfenish nyn jiarn: nish er-y-fa shen tar gys e chabbane, as hed paart jin lhiat, derrey vees ad er livrey oo gys ny laueyn echey.
16As tra vees oo dty hassoo kiongoyrt rish, nagh bee agglit ayns dty chree, agh jeeagh da cordail rish dty ghoo; as ver eh dhyts dellal vie.
17Eisht reih ad ass-doo-hene keead dooinney dy gholl ry-heshaght mareeish as e hinney-veyl; as hug ad lhieu ee gys cabbane Holofernes.
18Eisht va cochruinnaghey trooid-magh ooilley’n camp: son va feiyr jeh’n cheet eck mastey ny cabbaneyn, as haink ad mygeayrt-y-mo’ee, myr v’ee ny shassoo cheumooie jeh cabbane Holofernes, as dinsh ad da mychione eck.
19As ghow ad yindys jeh’n aalid eck, as v’ad eadolagh jeh cloan Israel by-chyndagh ree, as dooyrt dagh unnane rish e naboo, Quoi hoiagh beg jeh’n pobble shoh, ny mast’ oc ta lheid ny mraane? shickyr cha vel eh mie un dooinney jeu dy ve faagit, my yoghe eh raad, oddagh eh miolagh yn slane seihll.
20As hie adsyn va fuirraght liorish Holofernes roue magh, as ooilley e harvaantyn as hug ad lhieu stiagh ee ayns y chabbane.
21Nish va Holofernes goaill ’aash er e lhiabbee fo coodagh, va obbrit lesh gorrym-jiarg, as airh, as emeraldyn, as claghyn deyr.
22Myr shen hoilshee ad da mychione eck; as haink eh magh roish e chabbane lesh lampyn argid goll hoshiaght roish.
23As tra va Judith er jeet ’syn enish echeysyn as e harvaantyn ghow ad ooilley mooarane yindys jeh’n cummey aalin eck; as huitt ish sheese er e heddin, as ren ee ammys da: as hrog e harvaantyn seose ee.
Currently Selected:
Judith 10: YNAPBR
Highlight
Share
Copy
Want to have your highlights saved across all your devices? Sign up or sign in
© Yn Cheshaght Ghailckagh 1979, 2017
© Manx Gaelic Society 1979, 2017