Judith 11
11
CAB. 11
1As dooyrt Holofernes ree, Ven, bee dy yien mie, nagh gow aggle ayns dty chree: son cha ghortee mish rieau unnane erbee dy row booiagh dy hirveish Nabuchodonosor, ree yn slane seihll.
2Nish er-y-fa shen, mannagh beagh yn pobble ayds ta cummal ayns ny sleityn er hoiagh beg jeem’s, cha row mish er hroggal seose my shleiy nyn oi: agh t’ad er n’yannoo shoh roo-hene.
3Agh nish insh dou cre’n-fa t’ou er hea voue, as er jeet hooinyn: son t’ou er heet#11.3 (sic?) gys sauchys; bee dy yien mie, bee oc bio noght, as ny-jei shoh:
4Son cha jean veg assee dhyt, agh ver ad dellal vie dhyt, myr t’ad dy choyrt da sharvaantyn ree Nabuchodonosor my hiarn.
5Eisht dooyrt Judith rish, Gow goan dty harvaant, as lhig da dty inney-veyl loayrt ayns dt’enish, as cha ninshym breg erbee da my hiarn yn oie shoh.
6As my nee oo geiyrt er goan dt’inney-veyl, ver Jee lesh yn red gy#11.6 dy? slane gys kione liorts; as cha jig my hiarn giare jeh e yerkalyn,
7Myr ta Nabuchodonosor ree yn slane seihll bio, as myr ta e phooar bio, quoi t’er choyrt uss dy chummal seose dy chooilley nhee bio: son cha nee ynrican deiney nee shirveish eh liorts, agh myrgeddin beiyn y vagheragh, as y maase, as eeanlee’n aer, vees bio liorish y phooar ayds fo Nabuchodonosor as ooilley e hie.
8Son ta shin er chlashtyn jeh dty chreenaght as dty haaseyn, as te er ny insh ayns ooilley’n seihll dy nee uss ynrican ta ooasle ayns y slane reeriaght, as niartal ayns tushtey, as yindyssagh ayns mirrilyn-caggee.
9Nish er-son y chooish my-e-chione loayr Achior ayns y choonceil ayds, ta shin er chlashtyn e ghoan; son v’eh er ny hauail liorish deiney Vethulia, as dinsh eh daue ooilley ny dooyrt eh rhyts.
10Shen-y-fa, O hiarn as kiannoort, nagh soie beg jeh e ghoan; agh tasht seose ayns dty chree ad, son t’ad yn irriney: son cha bee yn ashoon ainyn smaghtit, chamoo oddys y cliwe barriaght ’gheddyn orroo, mannagh der ad rish peccah noi’n Jee oc.
11As nish son nagh bee my hiarn er ny chastey as e chiarail ’ve jeant gyn ymmyd, ta eer yn baase nish er huittym orroo, as ta nyn beccah er verraghtyn orroo, lesh nee ad nyn Yee y vrasnaghey gys corree, cre erbee’n traa nee ad shen y yannoo nagh vel cooie dy ve jeant:
12Son t’ad giare ayns beaghey, as ta ooilley yn ushtey oc er n’aase goan, as t’ad kiarit dy varroo nyn maase, as dy ee ooilley ny reddyn shen ta Jee er vee-lowal daue dy ee liorish e leighyn:
13As t’ad er ghoaill ayns laue dy vaarail ny chied-vessyn jeh’n arroo, as ny jagheenyn feeyney as ooill, v’ad er choyrt er-lheh as er reayll cour ny saggyrtyn ta jannoo shirveish ayns Jerusalem, kiongoyrt rish y Jee ain; rish ny reddyn cheddin cha vel veg jeh’n pobble lowit wheesh as dy ventyn lesh nyn laue.
14Son t’ad er choyrt feallagh gys Jerusalem, er-yn-oyr as dy vel adsyn ta cummal ayns shen neesht er n’yannoo lheid cheddin, dy choyrt lhieu kied huc voish ny shanstyryn.
15Nish tra ver ad lhieu fys huc, nee ad chelleeragh yn olk y yannoo, as bee ad livreit hoods dy ve er nyn stroie yn laa cheddin.
16Shen-y-fa, myr va toiggal aym’s dt’inney-veyl jeh ooilley shoh, ta mee er hea veih’n cheshaght oc; as ta Jee er my choyrt son dy yannoo obbraghyn mayrts, jeu gowee yn slane seihll yindys, as ooilley ny chlynnys jeh.
17Son ta dty harvaant crauee, as shirveish Jee laa as oie: nish er-y-fa shen, my hiarn, fuirr-yms mayrt, as hed dty harvaant magh ’syn oie ayns y choan, as goym padjer gys Jee, as inshee eshyn dooys yn traa vees ad er n’yannoo peccah:
18As neem’s cheet as soilshee-ym dhyts eh: eisht hed oo magh lesh ooilley dty armee, as cha bee veg jeu hassys dt’oi.
19As neem’s oo y leeideil trooid mean Yudea, derrey hig oo roish Jerusalem; as nee’m dty stoyl-reill y hoiagh ayns y vean echey; as nee oo ad y imman myr kirree ta fegooish bochil, as cha jean moddey wheesh as fosley veeal dt’oi: son va ny reddyn shoh inshit dooys cordail rish my ysseree, as v’ad soilshit dou, as ta mee er my choyrt dy insh dhyt.
20Eisht bynney lesh Holofernes as ooilley e harvaantyn ny goan eck; as ghow ad yindys mooar jeh’n chreenaght eck as dooyrt ad,
21Cha vel lheid y ven veih’n derrey chione jeh’n theihll gys y chione elley, chammah son aalid eddin as goan creeney.
22Myr eddin dooyrt Holofernes ree, Ta Jee er n’yannoo dy mie ayns coyrt uss roish y pobble, dy voddagh niart ’ve ayns ny laueyn ainyn, as toyrt-mow orroosyn ta soiagh beg jeh my hiarn’s.
23As nish t’ou chammah bwaagh ayns dt’eddin, as jesh ayns dt’ocklyn: son shickyrys my nee uss myr t’ou er ghra, bee’n Jee ayds yn Jee aym’s, as nee uss cummal ayns thie ree Nabuchodonosor, as bee mooar er ny yannoo jeed trooid y slane seihll.
Currently Selected:
Judith 11: YNAPBR
Highlight
Share
Copy
Want to have your highlights saved across all your devices? Sign up or sign in
© Yn Cheshaght Ghailckagh 1979, 2017
© Manx Gaelic Society 1979, 2017