撒迦利亞書 7

上主責備無誠實个禁食

1 大流士做皇帝个第四年九月，就係基斯流月初四 #7:1 「第四年九月…初四」：照現代个日曆來算係公元前五百一十八年十二月初七。，上主个話傳給撒迦利亞。

2該時，伯特利人已經差派沙利色、利堅‧米勒㧯跈等佢等个人，到上主 — 萬軍个元帥个聖殿去，祈求上主賜福， 3並向祭司㧯先知求問：「𠊎等係毋係愛像往年，在五月間禁食，為到聖殿被人毀掉來哀傷？」

4以下係上主 — 萬軍个元帥傳給𠊎个話。 5佢講：「你去㧯這地方个人民並祭司講，這七十年來，佢等在五月㧯七月禁食表示哀傷，敢有真心尊敬𠊎？ 6佢等食，佢等啉，全部係為到滿足佢等自家。」

7這係上主通過以前个先知所警告个話。該時耶路撒冷當繁榮，逐位當多人；毋單淨在它四周圍个鄉鎮有人住，連南片地區㧯西片地區也攏總有人住。

悖逆致到流亡

8以下係上主傳給撒迦利亞个話。佢講： 9「𠊎 — 上主、萬軍个元帥識對你等个祖先吩咐講：『你等愛公正審判；大家用慈愛憐憫互相款待。 10毋好欺負孤兒、寡婦、外族人㧯窮苦人；麼人都毋好存心害別人。』

11「總係，佢等毋肯聽，做佢等斡頭，耳公塞等毋聽。 12佢等个心像金剛石恁硬，毋遵守法律，又藐視𠊎 — 上主、萬軍个元帥用靈感動以前个先知所傳个教訓；所以𠊎向佢等大發譴。 13𠊎㧯佢等講話，佢等毋聽；所以佢等向𠊎祈求，𠊎乜毋搭。 14𠊎像係用狂風將佢等吹散到遠遠生份个國家去。恁樣，佢等使這恁好个土地變做一片荒涼、無人來往經過个所在。」

Currently Selected:

撒迦利亞書 7: THV12Hdb

Highlight

Copy