撒迦利亞書 6

戰車个異象

1𠊎又昂頭看到另外一個異象，看到有四輛戰車對兩座銅个山中間出來。 2拖第一輛戰車个係紅馬，拖第二輛戰車个係烏馬。 3拖第三輛个係白馬，拖第四輛个係有斑點个馬；逐隊个馬全部盡強壯。 4𠊎就問㧯𠊎講話个天使講：「主啊，這兜戰車係麼介意思？」

5天使應𠊎講：「這兜係天頂來个四陣風，係對普天下个主面前出來个。」

6烏馬愛拖向北方到巴比倫去，白馬向西方去，有斑點个馬向南方去。 7這兜強壯个馬一出來，就當想愛去全世界。天使吩咐牠兜講：「你等去巡查全世界！」牠兜就照吩咐去。 8天使又大聲對𠊎講：「看啊！向北方到巴比倫去个馬，已經在該位俾上主个大受氣平靜下來！」

為約書亞戴冕旒

9上主个話又臨到𠊎講： 10「該兜倒轉來个人當中，你愛將黑玳、多比雅㧯耶大雅所獻个禮物，黏時帶到西番雅个孻仔約西亞个屋下去；這三儕係對巴比倫轉來个。 11你愛用佢等所獻个金銀做一頂冕旒，戴在約撒答个孻仔大祭司約書亞个頭那頂。 12你愛㧯佢講：上主 — 萬軍个元帥恁樣講：『看啊，該喊做「樹枝」个人 #6:12 「該喊做「樹枝」个人」：參考 3:8 。，佢愛在自家个地方生出去，並重建上主个聖殿。 13佢就係該愛起上主个聖殿、接受王个榮耀、坐在寶座頂、統治佢子民个該儕人。有一個祭司愛企在佢个寶座旁邊；佢兩儕會在和平中共下打拚 #6:13 「有一個祭司…打拚」抑係譯做「佢又愛在寶座頂做祭司，使兩個職務合一和平」。。』 14這頂冕旒愛留在上主个聖殿做紀念品，紀念黑玳#6:14 「黑玳」係根據一古譯本，希伯來文係「希連」。、多比雅、耶大雅㧯西番雅个孻仔約西亞#6:14 「約西亞」係根據一古譯本，希伯來文係「賢」。。」

15住在遠方个人愛轉來協助重建上主个聖殿。聖殿重建以後，你等就會知係上主 — 萬軍个元帥差派𠊎到你等這位來。若係你等完全遵守上主 — 你等上帝个命令，這事一定會實現。

Currently Selected:

撒迦利亞書 6: THV12Hdb

Highlight

Copy