撒迦利亞書 8

上主應許重建耶路撒冷

1上主 — 萬軍个元帥傳給撒迦利亞以下个話。 2佢講：「錫安係𠊎深深痛惜个；因為𠊎當惜它个人民，所以𠊎對它个仇敵大發譴。」

3上主又講：「𠊎這下愛轉到錫安山，住在耶路撒冷。人愛稱耶路撒冷做『誠實个城』，將上主 — 萬軍元帥个山稱做『聖山』。」

4上主 — 萬軍个元帥恁樣講：「將來會再有老阿公、老阿婆坐在耶路撒冷街項，逐儕攏總手拄等杖仔。 5城肚、街項會有當多个細阿哥仔、細阿妹仔在該位搞。」

6上主 — 萬軍个元帥恁樣講：「到該日，所賸个人民會認為這種情況係無可能發生个事；總係對𠊎來講，這毋係無可能个。」這係上主 — 萬軍个元帥講个。

7上主 — 萬軍个元帥恁樣講：「𠊎愛對東片、西片个國家將𠊎个人民拯救出來。 8𠊎愛帶佢等轉來，俾佢等住在耶路撒冷城肚。佢等愛做𠊎个子民；𠊎愛做佢等个上帝，照信實、公平治理佢等。」

9上主 — 萬軍个元帥恁樣講：「愛堅強！你等這下所聽到个話，就係重建𠊎个聖殿、開工打地基个時先知所講過个話。 10在該日以前，無論係人抑係頭牲，做工拿毋到工錢；又因為敵人个緣故，出入無平安，因為𠊎使眾人互相攻擊。 11總係這下𠊎無像以前恁樣對待所賸个人民。這係𠊎 — 上主、萬軍个元帥講个。 12佢等會平平安安去委種；葡萄樹會結葡萄，土地會出產五榖，雨水充足。𠊎愛將這兜福氣賜給所賸个人民。 13猶大家㧯以色列家啊，過去在外族人中，你等樣般成做受咒詛个；總係，𠊎愛拯救你等，人愛稱你等做有福氣个。所以，你等愛堅強，毋使驚！」

14上主 — 萬軍个元帥恁樣講：「你等个祖先惹𠊎發譴个時，𠊎決定降災難在佢等个身上，無改變心意。 15這下𠊎照樣決定愛賜福給耶路撒冷㧯猶大个人民。所以你等毋使驚。 16你等應當恁樣做：大家講話愛誠實；在城門口審判个時愛公正，使人和睦； 17毋好存心害別人；毋好做假見證。這兜事全係𠊎 — 上主所惱个。」

18上主 — 萬軍个元帥又將話傳給𠊎。佢講： 19「在四月、五月、七月、十月个禁食，愛成做猶大人歡喜快樂个節期。你等愛歡喜誠實㧯和平。」

20上主 — 萬軍个元帥恁樣講：「將來會有列國个人民㧯當多城市个人來到耶路撒冷。 21這城个人會㧯該城个人講：『𠊎等遽遽來去敬拜上主 — 萬軍个元帥，求佢賜福。𠊎乜愛來去！』 22會有盡多民族㧯強大个國家來到耶路撒冷敬拜上主 — 萬軍个元帥，求佢賜福。 23到該時，會有十個外國人拉等一個猶太人个衫尾，講：『𠊎等愛㧯你等共下去，因為𠊎等聽講上帝㧯你等同在。』」這係上主 — 萬軍个元帥講个。

Currently Selected:

撒迦利亞書 8: THV12Hdb

Highlight

Copy