馬太 7
7
毋好論斷別人
(路加 6:37-38，41-42)
1「毋好論斷別人，上帝就毋會審判你等。 2因為上帝愛用你等論斷別人个標準來審判你等；你等用麼介東西量給別人，上帝也愛用共樣个東西量給你等。 3你做麼介單淨看到若兄弟目珠底背个草屑仔，總係無想到自家目珠底背个大樑呢？ 4你自家目珠底背有大樑，樣般做得對若兄弟講：『你目珠底背个草屑仔，𠊎代你挑出來』哪？ 5假好个人啊，先將你自家目珠底背个大樑徙走，正看得清楚來挑若兄弟目珠底背个草屑仔。
6「毋好將神聖个東西㧒給狗仔，牠兜會轉過來咬你等；毋好將珍珠㧒給豬仔，牠兜會踐踏珍珠。
求、尋、掽門
(路加 11:9-13)
7「你等求，就會得到；尋，就會尋到；掽門，門就會為你等開。 8因為每一個求个，就得到；尋个，就尋到；掽門个，門就為佢開。 9你等當中有麼人，孻仔討麵包，反轉拿石頭給佢？ 10討魚仔，反轉拿蛇哥給佢？ 11你等雖然壞，還知拿好東西給自家个子女；恁樣，你等在天頂个阿爸敢毋係還較愛將好東西賜給求佢个人嗎？
12「你等愛別人樣般對待你等，就愛樣般對待佢等；這就係摩西法律㧯先知教訓个真意義。
狹个門
(路加 13:24)
13「你等愛對狹門入去；因為該透到滅亡个門係闊个，路係好行个，行該條路个人也盡多。 14該透到永生个門係狹个，路係難行个，尋到个人也盡少。
樹仔㧯果子
(路加 6:43-44)
15「你等愛提防假先知。佢等出現在你等面前，外表看起來像綿羊，總係底背係兇惡个豺狼。 16你等看佢等个行為就會認出佢等。竻樹毋會結葡萄，蒺藜也毋會結無花果。 17好樹結好果子；壞樹結壞果子。 18好樹毋會結壞果子；壞樹也毋會結好果子。 19無結好果子个樹仔就斬掉，㧒落火底背。 20所以，看佢等个行為，你等就會認出假先知。
𠊎毋識你等
(路加 6:46；13:25-27)
21「該兜喊𠊎『主啊，主啊！』个人並毋係攏總會入天國；只有實行𠊎天父旨意个人正做得入去。 22末日來个時，盡多人會對𠊎講：『主啊，主啊！𠊎等識奉你个名傳上帝个福音，也識奉你个名逐鬼、行盡多神蹟！』 23該時，𠊎愛明明對佢等講：『𠊎從來毋識你等；你這兜作惡个，閃開！』
兩種起屋个人
(路加 6:47-49)
24「所以，聽𠊎這兜話就去行个人，就像聰明人起屋在磐石頂； 25就算受到風吹，雨淋，水沖，該屋也毋會橫掉，因為地基在磐石頂。 26總係，聽𠊎這兜話毋去行个，就像戇仔起屋在泥沙頂， 27受到風吹，雨淋，水沖，屋就橫掉，又橫到貼貼！」
耶穌个權柄
28耶穌講了這兜話，眾人對佢个教訓感覺非常奇怪； 29因為佢教訓佢等个時盡有權柄，㧯佢等个經學教師無共樣。
Currently Selected:
馬太 7: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
