馬太 8
8
耶穌醫好發癩个人
(馬可 1:40-45；路加 5:12-16)
1耶穌對山頂下來个時，弛崗打陣个人跈等佢。 2有一個發癩个人來拜佢，講：「主啊，你若係肯，就會使𠊎淨浰。」 3耶穌伸手摸佢，講：「𠊎肯，你淨浰了！」佢个癩即時無掉去，佢就得到淨浰。 4然後，耶穌對佢講：「毋好㧯別人講；直接去見祭司，俾佢檢查，然後照摩西所定个規矩獻祭物，來對人證明你已經淨浰了。」
耶穌醫好羅馬軍官个僕人
(路加 7:1-10)
5耶穌來到迦百農，有一個羅馬軍官來求佢，講： 6「主啊，𠊎个僕人發癱風，睡在屋肚，非常痛苦。」
7耶穌講：「𠊎來去醫好佢。」
8該軍官講：「主啊，你去吾屋下，𠊎當毋起；只愛你講一句話，𠊎个僕人就會好。 9就像𠊎頂高有指揮官，下背也有受𠊎指揮个兵仔。𠊎命令這個兵仔去，佢就去；命令該個來，佢就來；對𠊎个奴僕講『做這個事』，佢就去做。」
10耶穌聽到這個話，非常希奇，對跈佢个人講：「𠊎實在㧯你等講，像恁樣个信心，就係在以色列人當中，𠊎也從來吂識看過！ 11𠊎㧯你等講，將來會有非常多个人對東、對西來，同亞伯拉罕、以撒、雅各共下在天國坐席。 12該兜本來愛做天國子民个人，反轉會被人逐到外背个烏暗肚；在該位，佢等會大噭，咬牙切齒。」 13然後，耶穌對該軍官講：「轉去，照你个信心成全你！」
厥僕人个病就在該時完全好了。
耶穌醫好盡多病人
(馬可 1:29-34；路加 4:38-41)
14耶穌來到彼得个屋下，看到佢个丈人𡟓發燒，睡在眠床頂。 15耶穌摸姖个手，燒就退掉，姖就䟘起來接待耶穌。
16臨暗仔个時，有人帶盡多被鬼附身个人來見耶穌。耶穌講一句話就將鬼逐走；佢也醫好所有个病人。 17佢恁樣做，係應驗先知以賽亞所講个：
「佢承受𠊎等个軟弱，
擔當𠊎等个病痛。」
愛跈耶穌个人
(路加 9:57-62)
18耶穌看到盡多人圍等佢，就吩咐學生渡到湖个對面去。 19有一個經學教師來見佢，對佢講：「先生，你無論去到㖠位，𠊎一定愛跈你。」
20耶穌講：「狐狸有窿，鳥仔有藪，總係人子連墊頭个所在也無。」
21另外有一個學生講：「主啊，准𠊎先轉去埋葬吾爸。」
22耶穌講：「做你跈𠊎，俾死人去埋葬佢等个死人！」
耶穌平定風浪
(馬可 4:35-41；路加 8:22-25)
23耶穌上船，厥學生跈等佢去。 24忽然，有一陣暴風在湖面吹等來，船被浪激到，總係耶穌在該位睡目。 25學生來喊醒佢，講：「主啊，救命！𠊎等會無命囉！」
26耶穌應講：「樣愛使恁驚？你等个信心樣會恁細！」然後佢䟘起來，責備風㧯浪，風浪就停下來，湖面大大平靜。
27大家非常著驚，講：「這係樣仔个人？連風㧯浪也聽從佢！」
醫好兩個被鬼附身个人
(馬可 5:1-20；路加 8:26-39)
28耶穌來到湖對面个加太拉地方；有兩個對塚埔出來个人堵到佢。因為這兩個人被鬼附身，盡惡，致到無人敢行這條路。 29佢等看到耶穌，就喊講：「上帝个孻仔，你做麼介愛干涉𠊎等？你愛提早來蹧踏𠊎等係麼？」
30離好遠有一大群豬仔在該位食東西。 31鬼就求耶穌，講：「你若係愛逐𠊎等出去，就准𠊎等入去這群豬仔底背。」
32耶穌講：「去啊！」鬼就出來，入去該群豬仔底背；歸群豬仔衝下崩崗，跌落湖底背，全部浸死。
33掌豬仔个人就走掉，入去城肚，將這件事个經過㧯被鬼附身个人所堵到个全部對大家報告。 34全城个人就出來見耶穌；佢等看到佢，就要求佢離開佢等个地方。
Currently Selected:
馬太 8: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
