馬太 24

預言聖殿个毀滅

(馬可 13:1-2；路加 21:5-6)

1耶穌對聖殿出來，行等離開个時，學生來到佢个面前，指等聖殿个建築喊佢看。 2耶穌對佢等講：「你等敢毋係看到這兜建築嗎？𠊎實在㧯你等講，這所在个每一垤石頭全部會被人拆下來，無一垤石頭會疊在另外一垤个頂高。」

災難㧯迫害

(馬可 13:3-13；路加 21:7-19)

3耶穌坐在橄欖山頂，學生暗中來問佢講：「請㧯𠊎等講，這個事幾時會發生呢？你个再臨㧯世界个結尾會有麼介兆頭？」

4耶穌應講：「你等愛細膩，毋好被人迷惑。 5因為有盡多人會假冒𠊎个名來，講：『𠊎就係基督！』對恁樣迷惑盡多人。 6你等會聽到附近相㓾个風聲㧯遠方戰爭个消息。你等毋使驚，這兜事定著會發生；總係這毋係講末日已經到了。 7民族會㧯民族相㓾；國家會㧯國家戰爭；逐所在會有飢荒㧯地動。 8這一切事情个發生就像產婦生產前个陣痛一樣。

9「該時，你等會被人捉去，受苦刑，被人殺害。為到𠊎个名，天下萬民攏總會怨恨你等。 10該時，盡多人會放掉佢等个信仰，彼此出賣，互相怨恨。 11盡多假先知會出現，來迷惑盡多人。 12因為邪惡氾濫，盡多人个愛心會漸漸冷掉去。 13總係，忍耐到底个人定著會得救。 14天國个福音愛先傳遍天下，對全人類做見證，然後末日正會到。

大災難

(馬可 13:14-23；路加 21:20-24)

15「你等看到先知但以理所講个該『毀滅性、邪惡个東西』企在神聖个所在个時 (讀个人愛了解這句話个意思)， 16住在猶太地區个，愛走去山頂避難； 17在屋頂个，毋好下來入去屋肚拿東西； 18在田項个，毋好轉去拿外衫。 19在該兜日仔，懷胎个婦人家㧯給孲𤘅仔食乳个阿姆就慘了！ 20你等愛祈求上帝，毋好俾你等在寒天抑係安息日避難。 21因為該兜日仔个大災難係創造世界以來毋識有个，將來也毋會再有。 22若係上帝無減少該兜災難个日仔，無人能生存下去。總係，為到佢所揀選个子民，上帝會減少該兜日仔。

23「若係有人㧯你等講：『你看，基督在這位！』抑係『基督在該位！』毋好相信。 24因為假基督㧯假先知會出現，佢等會行大神蹟㧯大奇事，盡佢所能來迷惑上帝所揀選个子民。 25看啊，𠊎已經先㧯你等講過了。

26「若係有人㧯你等講：『看啊，基督在曠野！』你等毋好出去；抑係講：『看啊，佢在屋肚！』你等也毋好相信。 27因為人子个再臨會像𥍉爧一樣，一下仔就對天个東片照到西片去。

28「身屍在㖠位，鷹鳥也會聚集在該位。

人子个再臨

(馬可 13:24-27；路加 21:25-28)

29「該兜災難个日仔一過去，日頭會變烏，月光毋會再光，星仔會對天頂跌下來，太空个系統也會搖動。 30該時，人子再臨个兆頭會在天邊出現。地上个萬族萬民攏總會大噭；佢等會看到人子大有能力㧯榮耀坐等天頂个雲降臨。 31號筒个聲會大響，佢愛差天使到天涯海角去，對世界這片到世界該片，召集佢所揀選个子民。

無花果樹个教訓

(馬可 13:28-31；路加 21:29-33)

32「你等愛對無花果樹學教訓。當樹枝轉青，生出新葉个時，你等就知熱天會到了。 33共樣，你等看到這一切个現象，就愛知時間會到 #24:33 「時間會到」抑係譯做「佢就會來」。，已經在門口了。 34𠊎實在㧯你等講，這代人還吂攏總過身以前，這一切个事就會發生。 35天㧯地會無掉，總係𠊎个話永遠毋會無掉。

愛警醒

(馬可 13:32-37；路加 17:26-30，34-36)

36「總係該愛來个日仔㧯時間，無人知；天頂个天使也毋知，孻仔也毋知 #24:36 有兜古卷無「孻仔也毋知」。，只有阿爸知。 37人子个再臨會像挪亞時代所發生个事一樣。 38大水吂來以前，人人照常食啉嫁娶，直到挪亞入大船該日； 39佢等麼介都毋知，直到大水來到，將佢等全部打走。人子个再臨也會恁樣。 40該時，兩個人在田項做事，一個會受接走，一個會留下來； 41兩個婦人家挨磨石，一個會受接走，一個會留下來。 42所以，你等愛警醒，因為毋知你等个主愛在㖠日再臨。 43你等愛知：一家个主人若係知賊仔暗晡頭幾時會來，佢一定會警醒，毋俾賊仔挖孔仔入來。 44像恁樣，你等也應當隨時準備好勢，因為人子會在你等無想到个時忽然降臨。

忠心㧯無忠心个僕人

(路加 12:41-48)

45「恁樣，麼人係忠心又精明个僕人啊？就係主人指派佢管理其他僕人个時，佢就照時分配糧食个人。 46主人轉來个時，看到佢恁樣行，這僕人係樣般有福氣啊！ 47𠊎實在㧯你等講，主人會派佢管理所有个產業。 48總係，佢若係壞僕人，心中想：『𠊎个主人會較慢正轉來』， 49就出手打佢个同伴，又去同酒醉个人共下食啉， 50在佢無想到个日仔，在佢毋知个時間，該僕人个主人會轉來， 51將佢打到半生死 #24:51 「打到半生死」抑係譯做「切到糜糜」。，使佢㧯假好个人共下受刑罰；在該位佢會大噭，咬牙切齒。」

Currently Selected:

馬太 24: THV12Hdb

Highlight

Copy