馬太 23

責備經學教師㧯法利賽人

(馬可 12:38-39；路加 11:43，46；20:45-46)

1耶穌對眾人㧯厥學生講： 2「經學教師㧯法利賽人坐在解釋摩西法律个位仔頂高， 3所以，你等愛聽從並遵行佢等个教訓；總係毋好學佢等个所做，因為佢等會講，毋會行。 4佢等將難㧡个重擔捆起來，放在別人个肩頭頂，總係自家連伸一支手指𢯭手也毋肯。 5佢等所做一切个事情，攏總係做給別人看个。佢等將戴在額頭㧯手項个經文袋做較大兜，也將衫繸仔 #23:5 「衫繸仔」表示人對上帝个敬畏，參考民數記 15:37-41 。做較長兜； 6佢等盡愛坐筵席中个大位㧯會堂肚个特別座位； 7佢等盡愛別人在公共場所對佢等致敬請安，喊佢等『先生』。 8其實，你等無應該被人稱做『先生』，因為你等只有一位先生；你等全部係兄弟姊妹。 9你等毋好稱世間个人做『阿爸』，因為你等只有一位阿爸，就係在天頂个阿爸。

10「你等也無應該被人稱做『師傅』，因為你等只有一位師傅，就係基督。 11你等中間麼人係最偉大个，就愛做你等个僕人。 12上帝愛將自高个人降做卑微，也愛高升甘心謙卑个人。

責備假好个人

(馬可 12:40；路加 11:39-42，44，52；20:47)

13「你等這班假好个經學教師㧯法利賽人慘了！你等當人个面將天國个門關起來，自家毋入去，也毋俾想愛入个人入去！#23:13 有兜古卷加 14 節：「你等這班假好个經學教師㧯法利賽人慘了！你等吞食寡婦个產業，然後在人个面前表演長篇个祈禱。所以，你等一定會受到較重个責罰。」

15「你等這班假好个經學教師㧯法利賽人慘了！你等行遍天涯海角，勸一個人入教，等到佢入教以後，你等卻使佢變做比你等加倍壞，比你等更加當受地獄个刑罰。

16「你這兜青盲个帶路人慘了！你等講：『人若係指等聖殿發誓，這無麼介要緊；總係指等聖殿肚个金仔發誓个，佢就愛遵守。』 17你這兜青盲个戇仔啊！借問，金仔較重要？抑係使金仔成做聖物个聖殿較重要啊？ 18你等又講：『人若係指等祭壇發誓，這無麼介要緊；總係指等祭壇頂个祭物發誓个，佢就愛遵守。』 19你這兜青盲仔啊！到底係祭物較重要？抑係使祭物成做聖个祭壇較重要啊？ 20總講，人指等祭壇發誓，就係指等祭壇㧯祭壇頂所有个祭物發誓； 21指等聖殿發誓，就係指等聖殿㧯住在底背个上帝發誓； 22指等天發誓，就係指等上帝个寶座㧯坐在頂高个上帝發誓。

23「你等這班假好个經學教師㧯法利賽人慘了！你等連薄荷、八角、茴香這兜香料也獻十分之一給上帝；總係法律中較重要个，像公義、慈悲、信實，你等反轉忽略。其實，這兜正係你等應當盡力去行个；其他个，也做毋得忽略。 24你這兜青盲个帶路人啊！你等對飲料中將蚊屑仔濾出來，總係駱駝你等反轉吞落去！

25「你等這班假好个經學教師㧯法利賽人慘了！你等將杯仔㧯盤仔个外背洗到淨淨，底背反轉裝滿貪心㧯放蕩。 26青盲个法利賽人啊！杯仔个底背先洗給它淨，恁樣，外背就會淨浰。

27「你等這班假好个經學教師㧯法利賽人慘了！你等像粉白个墳墓，外背盡靚，總係底背係死人骨頭㧯各種屙糟東西。 28共樣，你等表面看起來十分公正，總係內心裝滿虛假㧯邪惡。

預言佢等會堵到个刑罰

(路加 11:47-51)

29「你等這班假好个經學教師㧯法利賽人慘了！你等重建先知个墳墓，整理義人个碑石， 30又講：『𠊎等若係生在祖先个時代，絕對毋會像佢等恁樣殺害先知！』 31恁樣，你等已經承認自家就係該兜殺害先知个人个子孫！ 32由在你等繼續去做，去補滿你等祖先積惡个份額！ 33你這兜毒蛇、毒蛇个子孫啊，你等愛樣般閃開地獄个刑罰啊？ 34看啊！因為恁樣，𠊎會派先知、智慧人㧯教師來你等這位；當中，有兜會被你等㓾死抑係釘十字架，有兜會在你等个會堂被你等鞭打，對這城迫到別城去。 35恁樣，世間所有殺害無辜个血債，就係對殺害無辜个亞伯到撒迦利亞為止一切个血債，攏總會臨在你等个身上。撒迦利亞就係巴拉加个孻仔，被你等㓾死在聖殿㧯祭壇中間个。 36𠊎實在㧯你等講，這兜事情攏總會臨在這代人个身上。

為到耶路撒冷噭

(路加 13:34-35)

37「耶路撒冷啊！耶路撒冷啊！你殺害先知，又用石頭㧹死上帝所差派來你這位个使者！𠊎樣般多擺愛保護你个子女，像雞乸聚集雞子在翼胛下一樣；總係你等無愛！ 38看啊，你等个家園會變做荒涼个所在。 39𠊎㧯你等講，從今以後，你等會看𠊎毋到，直到你等講：『願上帝賜福給該奉主名來个！』」

Currently Selected:

馬太 23: THV12Hdb

Highlight

Copy