馬太 2
2
對東方來訪問个人
1 希律做王个時，耶穌出世在猶太个伯利恆城。有幾個星象家對東方來到耶路撒冷； 2佢等問講：「該出世做猶太人个王个在㖠位？𠊎等在東方看到佢个星仔，特別來拜佢。」
3 希律王聽到這個話，心肝盡著急；全耶路撒冷城个人也係共樣。 4希律就召集所有个祭司長㧯民間个經學教師來，問佢等講：「基督愛在麼介所在出世？」
5佢等應講：「在猶太个伯利恆，因為先知有恁樣寫等，講：
6 猶大地區个伯利恆城啊，
你在猶大這兜城中並毋係最細个；
因為有一個領袖會對你該位出來，
佢愛牧養𠊎个子民以色列。」
7所以，希律暗中召見這幾個對東方來个星象家，對佢等查問該粒星仔出現个確實日期。 8然後佢吩咐佢等去伯利恆，講：「你等去，詳細尋該細人仔，尋到以後就來報給𠊎知，恁樣𠊎也好去拜佢。」
9聽了王个話，佢等就離開。該時，佢等在東方看到个該粒星仔又出現，在佢等个頭前行，一直到細人仔住个所在，就在頂高停下來。 10佢等看到該粒星仔，歡喜到講毋得。 11佢等入去屋肚，看到細人仔㧯厥姆馬利亞，就伏落去拜細人仔，然後打開寶盒，拿出黃金、乳香、沒藥做禮物來獻給佢。
12在夢中，上帝指示佢等莫轉去見希律；佢等就對另外一條路轉去佢等个家鄉。
逃難去埃及
13佢等離開以後，主个天使在約瑟个夢中顯現，講：「䟘起來！帶等細人仔㧯厥姆逃難去埃及，住在該位，直到𠊎再指示你；因為希律愛搜查這細人仔來殺害佢。」
14所以，約瑟就䟘起來，透夜帶等細人仔㧯厥姆逃走去埃及， 15住在該位，直到希律死掉。這個事應驗主通過先知所講个話：「𠊎喊𠊎个孻仔對埃及出來。」
屠殺孲𤘅仔
16 希律發現自家受星象家个作弄，非常譴，就照佢對星象家所探到該粒星仔出現个時期，派人將伯利恆㧯附近地區兩歲以內个細孻仔全部㓾掉。 17這個事應驗先知耶利米所講个：
18在拉瑪有聽到一個聲，
係噦天噦地个大噭聲；
係蕾潔為姖个子女大噭，
毋肯接受安慰，
因為佢等全部無掉去了。
對埃及轉來
19 希律死後，在埃及，主个天使在約瑟个夢中顯現， 20講：「䟘起來！帶等細人仔㧯厥姆轉去以色列，因為該兜想愛殺害這細人仔个已經死掉了。」 21約瑟就出發，帶等細人仔㧯厥姆轉去以色列。
22 約瑟因為聽講亞基老繼承厥爸希律做猶太王，就毋敢去該位。後來，主又在約瑟个夢中指示佢，佢就閃到加利利省去， 23住在安到拿撒勒个城肚。這就應驗先知所講个話：「佢愛稱做拿撒勒人。」
Currently Selected:
馬太 2: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
