馬太 1

耶穌基督个家譜

(路加 3:23-38)

1耶穌基督係大衛个後代，大衛係亞伯拉罕个後代。

耶穌个家譜係恁樣：

2 亞伯拉罕𫱔以撒，以撒𫱔雅各，雅各𫱔猶大㧯佢个兄弟。 3猶大同塔瑪𫱔法勒斯㧯謝拉，法勒斯𫱔希斯崙，希斯崙𫱔亞蘭， 4亞蘭𫱔亞米拿達，亞米拿達𫱔拿順，拿順𫱔撒門， 5撒門同喇合𫱔波阿斯，波阿斯同路得𫱔俄備得，俄備得𫱔耶西， 6耶西𫱔大衛王。

大衛同烏利亞个𡜵娘𫱔所羅門， 7所羅門𫱔羅波安，羅波安𫱔亞比雅，亞比雅𫱔亞撒， 8亞撒𫱔約沙法，約沙法𫱔約何蘭#1:8 「約何蘭」：參考列王紀下 8:16 。，約何蘭𫱔烏西雅， 9烏西雅𫱔約坦，約坦𫱔亞哈斯，亞哈斯𫱔希西家， 10希西家𫱔瑪拿西，瑪拿西𫱔亞們，亞們𫱔約西亞。 11以色列族被人捉去巴比倫个期間，約西亞𫱔約雅斤㧯佢个兄弟。

12被人捉到巴比倫後，約雅斤𫱔撒拉鐵，撒拉鐵𫱔所羅巴伯， 13所羅巴伯𫱔亞比玉，亞比玉𫱔以利亞敬，以利亞敬𫱔亞所， 14亞所𫱔撒督，撒督𫱔亞金，亞金𫱔以律， 15以律𫱔以利亞撒，以利亞撒𫱔馬但，馬但𫱔雅各， 16雅各𫱔約瑟，就係馬利亞个老公。該稱做基督个耶穌係對馬利亞出世个。

17恁樣算起來，對亞伯拉罕到大衛一共有十四代，對大衛到以色列人被人捉到巴比倫也係十四代，對被人捉个時到基督个出世也係十四代。

耶穌基督个出世

(路加 2:1-7)

18耶穌基督出世个經過係恁樣：佢个阿姆馬利亞已經㧯約瑟定親，總係在結婚以前，馬利亞就對聖靈懷胎。 19姖个未婚夫約瑟做人正直，總係又無愛公開羞辱姖，想愛祕密解除婚約。 20佢當考慮這事个時節，主个天使在夢中對佢顯現，講：「大衛个後代約瑟，毋使驚，做你討馬利亞做𡜵娘，因為姖係對聖靈懷胎个。 21姖會𫱔一個孻仔，你愛將佢个名安到耶穌，因為佢愛拯救自家个子民脫離佢等个罪。」

22這一切事个發生係愛應驗主通過先知所講个話：

23有童貞女會懷胎𫱔孻仔，

佢个名愛喊做以馬內利。

(「以馬內利」个意思就係「上帝㧯𠊎等同在。」)

24 約瑟醒過來，就照主个天使所吩咐个去做，㧯馬利亞結婚； 25總係在姖𫱔孻仔以前，無㧯姖同房。細人仔出世，約瑟就將佢个名安到耶穌。

Currently Selected:

馬太 1: THV12Hdb

Highlight

Copy