馬太 14
14
施洗約翰个過身
(馬可 6:14-29；路加 9:7-9)
1該時，加利利个希律王聽到耶穌个事， 2就對大臣講：「這個人定著係施洗約翰返生，正會有行這兜神蹟个能力。」
3原來，希律為到厥兄弟腓力个𡜵娘希羅底个緣故，識下令捉約翰，將佢䌈等關在監獄肚。 4因為約翰再三責備希律講：「你佔希羅底做𡜵娘係違法个。」 5希律想愛㓾佢，總係驚人民，因為佢等相信約翰係先知。
6 希律做生日該日，希羅底个妹仔在人客面前跳舞，使希律盡歡喜。 7希律就對姖發誓，應許照姖所要求个賞給姖。
8受到厥姆个教唆，姖要求講：「求你即時將施洗約翰个頭那放在盤肚給𠊎！」
9王感覺非常為難，總係佢已經在人客面前發誓，只有下令照姖所要求个給姖。 10所以，希律派人去監獄，斬約翰个頭那， 11放在盤肚，㨮給細阿妹仔；姖就交給厥姆。 12約翰个學生來，將身屍領去埋葬；然後去將這件事㧯耶穌講。
給五千人食飽
(馬可 6:30-44；路加 9:10-17；約翰 6:1-14)
13耶穌聽到這消息，就上船離開該位，自家一儕去偏僻个所在。眾人聽講，就對逐個城市行路跈等佢去。 14耶穌一上岸，看到這一大群人，就憐憫佢等，醫好佢等當中个病人。
15臨暗仔个時，學生來見耶穌，對佢講：「天暗囉，這位又係偏僻个所在，請喊大家離開，好俾佢等去附近个村莊買東西食。」
16耶穌應講：「毋使喊大家離開；你等給佢等食！」
17學生講：「𠊎等這位只有五隻餅㧯兩尾魚。」
18耶穌講：「拿來給𠊎。」 19佢吩咐眾人坐在草坪頂，然後將五隻餅㧯兩尾魚拿起來，昂頭望天，感謝上帝，然後擘開餅仔，交給學生；學生就分給眾人。 20大家全部食到飽；學生將所賸个碎仔拈起來，裝滿十二隻籃仔。 21食个人，婦人家㧯細人仔以外，約有五千儕。
耶穌行水面
(馬可 6:45-52；約翰 6:15-21)
22事後，耶穌黏時催學生上船，先到對面該片去，等佢喊眾人轉去。 23眾人離開以後，佢自家一儕上山去祈禱；到暗晡頭佢一儕還留在該位。 24該時，船離岸已經盡遠，被浪打到橫來橫去，因為船係逆風行。 25天曚光个時，耶穌在湖面行等去學生該位。 26學生看到佢在湖面行，非常著驚，講：「係鬼！」佢等就驚到喊起來。
27耶穌即時對佢等講：「安心，係𠊎，毋使驚！」
28 彼得講：「主啊，若正經係你，請喊𠊎行水面去你該位！」
29耶穌講：「來！」彼得就對船頂下去，在水面行等去耶穌該位。 30總係，因為看到風盡大，心肝著驚，就開始沈等落去；佢大聲喊講：「主啊，救𠊎！」
31耶穌黏時伸手拉等佢，講：「你个信心忒細了，做麼介疑狐哪？」
32佢等上了船，風就停下來。 33船頂个學生就跪拜佢，講：「你實在係上帝个孻仔。」
醫好革尼撒勒个病人
(馬可 6:53-56)
34佢等過了湖，在革尼撒勒上岸。 35該位个人一認出耶穌，就派人去附近个地方，帶所有个病人來耶穌个面前。 36佢等求耶穌准病人單淨摸佢个衫尾；所有摸到个人全部得到醫好。
Currently Selected:
馬太 14: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
