馬太 13

委種个比喻

(馬可 4:1-9；路加 8:4-8)

1該日，耶穌離開屋下去到湖滣，坐在該位。 2有一大群人聚集到佢面前來，所以佢上船去坐等；眾人企在湖滣。 3佢就用比喻對佢等講盡多道理。

佢講：「有一個委種个出去委種。 4佢委个時，有兜種子落在路堘，鳥仔飛來將它兜食掉。 5有兜落在泥盡淺个石頭地上；因為泥盡淺，種子盡遽就爆芽出來； 6日頭出來一曬，嫩芽就枯燥掉去，因為根無罅深。 7有兜落在竻仔底背，竻仔大起來，將秧仔拮等。 8另外有兜種子落在好泥底背，長大結子，有兜收成一百倍，有兜六十倍，有兜三十倍。」

9耶穌結論講：「有耳公好聽个人，就愛聽！」

比喻个目的

(馬可 4:10-12；路加 8:9-10)

10學生來見耶穌，對佢講：「你對大眾講話樣般愛用比喻呢？」

11耶穌應講：「關係天國个奧秘只有給你等知，總係無給佢等知。 12因為已經有个，愛給佢還較多，俾佢有好賸；無个，連佢所有个一些些仔也愛搶走。 13為到這個緣故，𠊎用比喻對佢等講話；因為佢等看也看毋識，聽也聽毋入耳，心也毋會明白。 14這係應驗先知以賽亞个預言；佢傳上帝个話講：

你等聽了又聽，總係毋會入耳；

看了又看，總係毋會了解。

15因為這子民个心盡鈍；

佢等又耳公背背，

目珠眨眨。

若毋係恁樣，佢等个目珠會看得到，

耳公會聽得入耳，

心也會明白，

佢等就會回心轉意，

𠊎就會醫好佢等。

16「總係，你等係有福氣个人！因為你等个目珠看得到，耳公也聽得到。 17𠊎實在㧯你等講，頭擺有盡多先知㧯義人想愛看你等所看到个，總係無看到；想愛聽你等所聽到个，也無聽到。

解釋委種个比喻

(馬可 4:13-20；路加 8:11-15)

18「所以，你等愛明白這委種个比喻係麼介意思。 19該聽了天國个真道總係無明白个人，就像委在路堘个種子；該邪惡者來到，就將委在佢心中个真道搶走。 20該委在石頭地上个種子係指人聽了真道，黏時歡喜接受， 21總係真道在佢心中釘根無深，存無幾久，一下為到真道堵到困難抑係迫害，盡遽就跌倒。 22該委在竻仔底背个種子係指人聽了真道以後，生活个操心㧯錢財个誘惑將真道歙等，無法度結果子。 23該委在好泥底背个種子係指人聽了真道，有了解，就結果子；有兜收成一百倍，有兜六十倍，有兜三十倍。」

稗仔个比喻

24耶穌另外對佢等講一個比喻。佢講：「天國可比有人將好麥種委在田項。 25有一暗晡，大家睡目个時，對敵來，委稗仔在麥仔中間，就走掉。 26到麥仔打串个時，稗仔也大起來。 27田主个僕人來對佢講：『頭家，你委在田項个敢毋係好麥種嗎？這兜稗仔到底係對㖠位來个？』 28佢應講：『這係敵人做个。』僕人就問講：『你愛𠊎等去將稗仔挷掉麼？』 29佢講：『毋使！因為你等挷稗仔个時，驚怕會連麥仔也挷到。 30由在麥仔同稗仔共下大；等收割个時，𠊎會吩咐收割个工人先將稗仔挷出來，捆等，㧒在火中去燒，然後正割麥仔，收入𠊎个倉庫。』」

芥菜子个比喻

(馬可 4:30-32；路加 13:18-19)

31耶穌另外對佢等講一個比喻。佢講：「天國可比一粒芥菜子，有人將它種在田肚。 32這種子比其他一切个種子較細，總係大起來後就比別樣菜較高大；它成做一頭樹，連飛鳥也在它个樹枝頂高做藪。」

發酵个比喻

(路加 13:20-21)

33耶穌用另外一個比喻對佢等講：「天國可比發酵，有婦人家拿來放在四十公升个麵肚，使歸團麵全部發起來。」

使用比喻

(馬可 4:33-34)

34這兜道理耶穌攏總係用比喻對眾人講个；無一擺佢毋係用比喻對佢等講。 35佢恁樣做，係愛應驗先知所講過个話：「𠊎愛用比喻對佢等講，將創造世界以來囥等个事講給佢等聽。」

解釋稗仔个比喻

36耶穌離開眾人，入屋肚去。學生又來問佢講：「請㧯𠊎等講，田肚个稗仔這個比喻係麼介意思？」

37耶穌應講：「該委好種个係人子； 38田係這個世界；好種係屬天國个人；稗仔係屬該邪惡者个人； 39委稗仔个對敵就係魔鬼；收割个時節係世界个末日；收割个工人係天使。 40到末日，作惡个人愛像稗仔共樣被人挷出來，㧒落火中去燒。 41人子愛派佢个天使，將佢个國底背該兜害人犯罪㧯一切作惡个人攏總捉起來， 42㧒落火爐。在該位，佢等會大噭，咬牙切齒。 43該時，義人在佢等天父个國底背，會發光像日頭一樣。有耳公好聽个人，就愛聽！

囥等个寶貝

44「天國可比財寶囥在田肚。有人發現，就將它揜起來，然後歡歡喜喜將自家所有个全部賣掉，去買該田。

珍珠个比喻

45「天國又可比一個生理人尋貴重个珍珠。 46佢尋到一粒非常貴重个珍珠，就去賣佢所有个一切，來買該粒珍珠。

委網个比喻

47「天國又可比魚網委在湖內來打各種个魚。 48網仔一滿，打魚个將它拉上來，坐在岸上，將魚仔分類，擇好个放落桶肚，將壞个㧒掉。 49世界个末日也係像恁樣：天使愛出去，將壞人對好人當中分別出來， 50㧒落火爐底背。在該位，佢等會大噭，咬牙切齒。」

新㧯舊个教訓

51耶穌問佢等講：「這兜話你等全部了解麼？」

佢等應講：「了解。」

52耶穌講：「恁樣，每一個經學教師成做天國个學生，就像一家之主對佢个倉庫將新㧯舊个東西全部搬出來。」

耶穌在拿撒勒被人拒絕

(馬可 6:1-6；路加 4:16-30)

53耶穌講了這兜比喻，就離開該地方， 54轉到自家个家鄉，在會堂教訓人；聽到个人攏總盡奇怪，講：「這儕人對㖠位得到這樣个智慧，又會行神蹟哪？ 55這敢毋係該木匠个孻仔嗎？厥姆毋係安到馬利亞嗎？雅各、約瑟、西門㧯猶大毋係厥老弟嗎？ 56佢該兜老妹敢毋係住在𠊎等這位嗎？這人到底係對㖠位得到這一切呢？」 57佢等就拒絕佢。

耶穌對佢等講：「除了在自家个本鄉、本家以外，先知全部受人尊敬。」 58因為佢等毋肯信，耶穌在該位就無行盡多神蹟。

Currently Selected:

馬太 13: THV12Hdb

Highlight

Copy