馬太 12
12
安息日个問題
(馬可 2:23-28；路加 6:1-5)
1無幾久以後，耶穌在一個安息日經過麥田。厥學生肚飢，就捋兜麥串來食。 2有兜法利賽人看到就對耶穌講：「你看，你个學生做安息日禁止做个事！」
3耶穌應講：「大衛㧯跈佢个人肚飢个時做麼介，你等無讀過係麼？ 4佢入去上帝个聖殿，食獻給上帝个餅；佢㧯跈佢个人食該種餅仔係違法个，因為只有祭司正做得食。 5敢講你等無讀過摩西个法律所記載个？逐個安息日，祭司在聖殿攏總違犯安息日个規矩，總係毋算犯罪。 6𠊎㧯你等講，在這位有比聖殿還較重要个。 7聖經講：『𠊎所愛个係慈悲，毋係獻祭。』你等若係正經明白這句話个意思，就毋會定無罪个人做有罪。 8因為人子係安息日个主。」
醫好手瘸掉个人
(馬可 3:1-6；路加 6:6-11)
9耶穌離開該所在，去猶太人个會堂。 10在該位有一個人，佢个一支手瘸掉。有兜人想愛尋耶穌个把柄來告佢，就問佢講：「在安息日醫病合法麼？」
11耶穌應講：「你等當中，若係有人有一隻羊，該隻羊在安息日跌落窟肚去，愛樣般呢？佢敢毋係將羊仔拉上來？ 12人比羊仔貴重加盡多呢！所以，在安息日做好事係合法个。」 13接等，耶穌對該人講：「手伸出來！」
該人一伸手，手就復原到像另外該支手一樣。 14法利賽人出去，就參詳愛樣般對付耶穌來殺害佢。
上帝所揀選个僕人
15耶穌聽到這個消息，就離開該位，盡多人跈等佢。佢醫好該兜有病个人， 16總係吩咐佢等，做毋得將佢个名傳出去。 17這係應驗先知以賽亞所講个話：
上帝講：
18「看哪，這係𠊎所揀選个僕人；
𠊎惜佢，佢係𠊎心所歡喜个。
𠊎愛將𠊎个靈賜給佢；
佢愛對萬民宣告𠊎个正義。
19佢毋會相爭，毋會大聲喊，
街項也無人聽到佢个聲音。
20磧壞个蘆竹，佢毋會將它拗斷，
會烏个燈火，佢毋會將它歕掉。
佢會堅持行正義，
一直到正義得勝。
21全世界所有个人
攏總愛仰望佢！」
耶穌㧯別西卜
(馬可 3:20-30；路加 11:14-23)
22該時，有人帶一個被鬼附身又瞙目个啞仔來耶穌面前。耶穌醫好佢，使佢會講話也看得到。 23眾人盡著驚，講：「這敢毋係大衛个子孫嗎？」
24法利賽人聽到這個話就講：「佢係靠鬼王別西卜逐鬼，若無，佢就無辦法！」
25耶穌知佢等个意思，就對佢等講：「一個國家自相紛爭，該國家一定會敗掉；城市抑係家庭自相紛爭，定著會企毋住。 26假使撒但逐撒但，就係自相紛爭，佢个國樣般會企得住哪？ 27𠊎逐鬼若係靠別西卜，恁樣，你等个子弟逐鬼又係靠麼儕哪？你等个子弟會證明係你等毋著！ 28其實，𠊎逐鬼若係靠上帝个靈，就係證明上帝已經在你等當中掌權了。
29「敢有人能進入勇士个屋下去搶佢个財產？除了先將勇士捆起來，正有法度搶佢个東西。
30「毋同𠊎共下个，就係反對𠊎个；毋同𠊎共下收集个，就係打散个。 31所以，𠊎㧯你等講，人所犯一切个罪㧯所講一切譭謗个話 #12:31 「一切譭謗个話」抑係譯做「一切譭謗上帝个話」。，全部可以得到赦免；總係褻瀆聖靈个人無可能得到赦免。 32講話犯到人子个，還有可能得到赦免；總係褻瀆聖靈个，無論在今生抑係來世，無可能得到赦免。
果子樹㧯果子
(路加 6:43-45)
33「好个果子樹正會結好果子；壞个果子樹一定結壞果子。看所結个果子就做得認出果子樹个好壞。 34你這兜毒蛇啊！你等本來係惡毒个，樣般會講好話呢？因為心肝所裝滿个，嘴就講出來。 35好人心肝積善就發出善；壞人積惡就發出惡。
36「𠊎㧯你等講，在審判該日，人所講个閒話，逐句攏總愛供出來。 37因為，上帝愛用你自家个話來宣佈你無罪，也愛用你个話來定你有罪。」
要求神蹟
(馬可 8:11-12；路加 11:29-32)
38該時，有幾個經學教師㧯法利賽人來對耶穌講：「先生，𠊎等希望看你行神蹟。」 39耶穌就應佢等講：「一個邪惡毋信个世代正要求神蹟；總係，除了先知約拿个神蹟以外，無別个神蹟好給你等看。 40約拿識在大魚个肚笥三日三夜，人子也愛在地最深个所在三日三夜。 41在審判該日，尼尼微人會企起來告你等這代个人，因為佢等聽到約拿所傳个就棄邪歸正。𠊎㧯你等講，在這位有比約拿還較偉大个。 42在審判該日，南方个女王會企起來告你等這代个人，因為姖對恁遠來聽所羅門王智慧个話。𠊎㧯你等講，在這位有比所羅門王還較偉大个。
邪靈倒轉來
(路加 11:24-26)
43「邪靈離開所附身个人，在燥爽个地方行來行去，尋休息个所在，總係尋無， 44就講：『𠊎愛轉原來个屋肚去。』佢就倒轉去，看到該屋閒等，拚到淨浰淨浰，又整理到盡好勢。 45佢就出去，帶七個比佢還較惡个邪靈倒轉來，同佢共下入去住。恁樣，該人後來个情形就比先前還較慘。這邪惡个世代也會恁樣。」
耶穌个阿姆㧯兄弟
(馬可 3:31-35；路加 8:19-21)
46耶穌還對眾人講話个時，厥姆㧯厥老弟來。佢等企在外背，愛㧯佢講話。 47有人對耶穌講：「看啊，若姆㧯若老弟企在外背，愛㧯你講話。」
48耶穌回答該人講：「麼人係𠊎个阿姆？麼人係𠊎个兄弟？」 49佢又指等佢个學生講：「看啊，𠊎个阿姆，𠊎个兄弟在這位！ 50凡實行𠊎天父旨意个就係𠊎个兄弟、姊妹，㧯阿姆。」
Currently Selected:
馬太 12: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
