哈該書 2

新聖殿个榮光

1該年七月二十一，上主又通過先知哈該講話。 2佢愛哈該去㧯猶大省長所羅巴伯、大祭司約書亞，並該兜賸下來个人民講： 3「你等當中有麼人還記得這聖殿頭擺係樣般榮光？這下係樣般形？敢毋係當看毋上眼？ 4總係，所羅巴伯啊，𠊎 — 上主勸你，你愛剛強！大祭司約書亞啊，你也愛剛強！這地方个人民啊，𠊎 — 上主乜勸你等，你等愛剛強，愛煞猛做工，因為𠊎 — 上主、萬軍个元帥㧯你等共下。 5你等个祖先對埃及出來个時節，𠊎識㧯佢等 #2:5 「你等个祖先對…㧯佢等」：希伯來文直譯係「你等對…㧯你等」。立這個約。𠊎个靈這下還係㧯你等共下，所以毋使驚。

6「過無幾久，𠊎 — 上主、萬軍个元帥愛再一擺搖動天地、大海㧯陸地。 7𠊎愛搖動萬國，將萬國个寶物帶到這位來，使這聖殿充滿榮耀。這係𠊎 — 上主、萬軍个元帥講个。 8世間所有个銀仔、金仔全部屬𠊎 — 上主、萬軍个元帥。 9這新起个聖殿會比舊个還較榮光；𠊎愛俾𠊎个人民在這位過安居樂業个生活。𠊎 — 上主、萬軍个元帥恁樣宣佈了。」

先知請問祭司

10 大流士做皇帝第二年九月二十四日，上主 — 萬軍个元帥又㧯先知哈該講話。 11佢講：「你去請教該兜祭司有關法律个問題： 12若係有人拿出一垤分別為聖个肉，用佢个衫帕包起來，後來這衫帕憑到餅、湯、酒、橄欖油抑係別个食物，這兜食物算係聖物無？」

祭司應講：「毋算。」

13 哈該又問：「若係有人憑到屍體，打垃圾自家，以後佢摸到這兜食物，這兜食物就算無淨浰係麼？」

祭司應講：「算無淨浰。」

14所以，哈該就講：「上主講：『這情況做得適用在這國家个人民㧯佢等各樣个工作；佢等獻在祭壇頂个逐項東西全部係無淨浰个。』」

上主應許賜福

15上主講：「今晡日，你等愛好好想看仔！吂開始重建聖殿以前个情形， 16在該時節，有人來到榖堆，希望得到兩百公斤，正得到一百公斤。有人來到酒楻，想愛得到一百公升酒，正得到四十公升。 17你等手所做个工作，𠊎用燒風、生菇、冰雹攻擊你等，你等還係毋肯悔改。 18今晡日係九月二十四日 #2:18 「九月二十四日」：照現代个日曆來算係公元前五百二十年十二月十八日。，係聖殿打地基个日仔。你等愛好好想看仔！ 19雖然榖倉肚吂有榖，葡萄樹、無花果樹、石榴樹、橄欖樹還吂結果子，總係對今晡日開始，𠊎愛賜福給你等。」

上主對所羅巴伯个應許

20共日，就係九月二十四該日，上主第二擺㧯哈該講話， 21喊佢㧯猶大省長所羅巴伯講：「𠊎愛搖動天地。 22𠊎愛推翻萬國，消滅佢等个勢力。𠊎愛㩳橫佢等个戰車㧯駛車个人；馬仔也愛橫死淨淨，騎兵互相殘殺。 23𠊎个僕人所羅巴伯啊，在該日，𠊎 — 上主、萬軍个元帥愛選召你。像國王頓王印來統治，𠊎愛指派你，奉𠊎个名來統治，因為你係𠊎所揀選个。𠊎 — 上主、萬軍个元帥恁樣宣佈了。」

Currently Selected:

哈該書 2: THV12Hdb

Highlight

Copy