哈該書 1

上主命令重建聖殿

1 大流士做波斯皇帝个第二年六月初一 #1:1 「六月初一」：照現代个日曆來算係八月二十九。，上主通過先知哈該向撒拉鐵个孻仔猶大省長所羅巴伯㧯約撒答个孻仔大祭司約書亞講話。

2上主 — 萬軍个元帥對哈該恁樣講：「這兜人民講：『這下毋係重建上主聖殿个時節。』」

3該時，上主通過先知哈該將以下个話㧯人民講。 4佢講：「你等住恁靚个屋仔，總係𠊎个聖殿還恁荒涼！ 5這下𠊎 — 上主、萬軍个元帥愛你等反省自家个行為。 6你等委種多，總係收成少；你等有飯食，總係食毋飽；你等有酒啉，總係啉毋罅；你等有衫著，總係著毋燒；做工賺到个錢，總係毋罅生活 #1:6 「總係毋罅生活」希伯來文直譯係「像放在爛孔个袋肚」。。

7「𠊎 — 上主、萬軍个元帥愛你等反省自家个行為。 8這下你等愛上山取樹料，來起聖殿；恁樣，𠊎就歡喜，又得到尊榮。這係𠊎 — 上主講个。

9「你等望豐收，結果收成少；收成帶轉屋下，𠊎一歕就無半些。𠊎 — 上主、萬軍个元帥愛問：麼介理由呢？因為𠊎个聖殿荒涼，總係你等全部為到自家个屋舍無閒直掣。 10所以，因為你等个緣故，天毋降甘露，地毋出土產。 11𠊎命令旱災臨到大地，包含山、田、葡萄園、橄欖園、地上个出產、人民、頭牲、㧯人手中勞碌得來个一切。」

人民聽從上主个命令

12該時，所羅巴伯、大祭司約書亞㧯所有賸下來个人民聽從上主 — 佢等上帝个命令，也聽從上主个使者 — 先知哈該个話去做；人民就敬畏上主。 13上主个使者哈該向人民宣告上主个信息，講：「𠊎 — 上主㧯你等共下。」 14上主感動猶大省長所羅巴伯、大祭司約書亞，㧯所有賸下來个人民；佢等就來為到上主、萬軍个元帥 — 佢等个上帝開工重建聖殿。 15該時係大流士做皇帝个第二年六月二十四日。

Currently Selected:

哈該書 1: THV12Hdb

Highlight

Copy