出埃及記 21

奴才个條例

(申命記 15:12-18)

1「愛為以色列人民設立下背个條例： 2若係你買一個希伯來人做奴才，佢一定愛為你工作六年。到第七年，佢就做得恢復自由，毋使付贖金。 3若係佢做你奴才个時還吂結婚，離開个時就愛單身一儕走；若係佢做你奴才个時已經結婚，佢就做得帶𡜵娘共下走。 4𡜵娘若係主人給佢个，𡜵娘為佢𫱔有子女，厥𡜵娘㧯子女全部係屬主人个；佢愛單身一儕走。 5若係該奴才表示講：『𠊎愛吾主人，惜吾𡜵娘㧯子女，無愛自由離開』， 6佢个主人就愛帶佢到敬拜上帝个所在，在該位俾佢憑等門抑係門框企等，用鑽仔在佢耳公鑽一隻孔。恁樣，佢就愛一生人服事厥主人。

7「若係有人將自家个妹仔賣做使女，姖做毋得像奴才恁樣自由離開。 8若係主人本來想討姖做𡜵娘，後來無中意姖，就愛俾姖个家族贖轉去；主人無權將姖賣給外族人，因為主人已經騙過姖。 9若係主人擇姖給自家个孻仔做𡜵娘，就愛對待姖像對待自家个妹仔恁樣。 10若係主人討第二個𡜵娘，佢對第一個𡜵娘一定愛像以前恁樣供給食物、衫褲並同房，全部做毋得減少。 11若係主人對第一個𡜵娘毋實行這三項義務，這個𡜵娘就做得自由離開，毋使付錢贖身。」

刑罰暴行个條例

12「打死人个，一定愛將佢處死； 13若毋係故意㓾人，係一時失手，佢做得逃到𠊎指定个地方去； 14若係故意謀殺，就算逃到𠊎个祭壇前，也愛將佢捉去處死。

15「打爺𡟓个，一定愛將佢處死。

16「強強捉人去賣抑係留下來个，一定愛將佢處死。

17「咒罵爺𡟓个，一定愛將佢處死。

18「兩儕相打，一方用石頭抑係拳頭打傷對方，總係無將對方打死；被人打个人因為受傷睡眠床， 19總係䟘起來以後，出門行愛拄柺棍仔，該打佢个人毋使受刑罰；總係愛賠佢無法度工作个損失，並負責將佢醫到好。

20「若係用棍仔打奴才抑係奴婢，使佢即時死亡个，一定愛受刑罰。 21若係奴才過一兩日正死，主人就毋使受刑罰；因為這奴才係佢用錢買來个。

22「若係有兜人因為相打來撞傷有身項个婦人家，使姖落胎，總係無其他个傷害，該傷害姖个一定愛照婦人家个老公提出來个數額，照判官所決定个來賠償。 23若係該婦人家受別个傷害，該傷害姖个就愛：一命賠一命、 24目珠賠目珠、牙齒賠牙齒、手賠手、腳賠腳、 25燒傷賠燒傷、刀傷賠刀傷、打傷賠打傷。

26「若係有人打壞掉奴才抑係奴婢一隻目珠，就愛因為佢个目珠放佢自由離開，準做賠償金。 27若係打壞掉奴才抑係奴婢个一支牙齒，就愛因為佢个牙齒放佢自由離開，準做賠償金。」

物主个責任

28「若有牛鬥死男人抑係女人，就愛用石頭㧹死牠，總係牠个肉做毋得食；牛个主人就毋使受罰。 29若係該隻牛常常鬥傷人，牛个主人逐擺受警告，還係毋將牛紽好，致到牛鬥死人，該隻牛愛用石頭㧹死，牛个主人也愛處死。 30若係牛个主人被人判罰錢來賠命，佢一定愛照規定个錢額繳清。 31若係牛鬥死細孻仔抑係細妹仔，也愛照這種辦法來處理。 32若係牛鬥死奴才抑係奴婢，牛个主人一定愛賠佢等个主人三十隻銀幣，牛也愛用石頭㧹死。

33「若係有人掀開井蓋，抑係挖井又毋將井蓋揜好，致到牛抑係驢跌落去， 34佢一定愛拿錢賠償頭牲个主人，死掉个頭牲就歸給自家。 35若係有牛鬥死掉另外一隻牛，愛將生个牛賣掉，雙方平分賣牛个價錢，同時平分死牛个肉。 36若係其中一隻牛一溜裡好鬥，牛个主人無紽好，佢一定愛用一隻生牛賠對方，該隻死牛就歸給自家。」

Currently Selected:

出埃及記 21: THV12Hdb

Highlight

Copy