出埃及記 20

十條誡命

(申命記 5:6-21)

1上帝吩咐以下這兜誡命，講：

2「𠊎係上主 — 你个上帝；𠊎識𢱋你對做奴才个埃及地出來。

3「𠊎以外，你做毋得敬拜別个神明。

4「做毋得為自家雕刻偶像；也做毋得造天頂、地上、抑係地底下、水中所有个形像。 5做毋得向該兜偶像跪拜，也做毋得服事它兜，因為𠊎 — 上主 — 你个上帝係專情个上帝 #20:5 「專情个上帝」抑係譯做「嫉妒个上帝」抑係「忌邪个上帝」意思係表明上帝㧯人立約个關係親像婚約要求對方完全个愛。。恨𠊎个人，𠊎一定會責罰佢等㧯佢等个子女，直到三四代。 6總係敬愛𠊎、遵守𠊎命令个人，𠊎愛用慈愛款待佢等，直到千代。

7「做毋得糮糝用上主 — 你上帝个名；因為糮糝用上主名个人，上主一定會責罰佢。

8「愛遵守安息日做聖日。 9你有六日好勞碌做一切个工作； 10總係第七日係屬上主 — 你上帝个安息日。這日，無論係你、你个子女、奴僕、奴婢、頭牲、抑係城內暫住个旅客，全部做毋得工作； 11因為上主在六日內創造天、地、海、㧯其中个萬物；總係第七日佢就歇睏。所以，上主賜福安息日，定這日做聖日。

12「愛孝敬爺𡟓，好俾你在上主 — 你上帝愛賜給你个土地上享長壽。

13「做毋得㓾人。

14「做毋得犯姦淫。

15「做毋得偷拿。

16「做毋得做假見證害人。

17「做毋得貪別人个屋；也做毋得貪別人个𡜵娘、奴僕、奴婢、牛、驢、抑係其他个東西。」

人民盡驚

(申命記 5:22-23)

18人民聽到雷公聲㧯歕羊角个聲，看到𥍉爧㧯山頂衝出來个煙，全部非常驚，遠遠企等。 19佢等對摩西講：「請你㧯𠊎等講話，𠊎等一定會聽；若係上帝㧯𠊎等講話，驚怕𠊎等會無命！」

20 摩西應佢等講：「毋使驚；上帝降臨來考驗你等，使你等時時敬畏佢，正毋會犯罪。」 21總係人民還係遠遠企等；只有摩西行近上帝所臨在該賁賁个雲中。

祭壇个條例

22上主對摩西講：「你愛㧯以色列人講：『你等已經看到𠊎 — 上主樣般對天頂向你等講話。 23做毋得造麼介偶像當做𠊎；做毋得為自家造金銀个神像。 24你等愛用泥為𠊎造一座祭壇，在壇上獻牛羊做燒化祭㧯平安祭。在𠊎指定做你等敬拜𠊎个每一個地方，𠊎一定會來賜福給你等。 25若係你等用石頭為𠊎造祭壇，做毋得用打過个石頭，因為鑿過个石頭會打垃圾祭壇。 26做毋得為𠊎起造有段仔个壇，免得你等上段仔个時露出自家个下體。』」

Currently Selected:

出埃及記 20: THV12Hdb

Highlight

Copy