出埃及記 22
22
賠償个條例
1「若係有人偷牛抑係羊，無論係㓾掉、係賣掉，佢一定愛拿五隻牛賠一隻牛，拿四隻羊賠一隻羊。 2佢一定愛賠到罅額；若係無東西好賠，就愛被人賣做奴才，來還佢偷牛羊个罰金。 3若係偷來个牛、驢、抑係羊被人發現个時還生生，佢就愛加倍賠人。
4「若係有人暗晡時偷偷進入別人个屋下，被人發現又被人㓾死，該㓾佢个人無罪；事情若發生在日時頭，㓾佢个人就有罪。
5「若係有人在田肚抑係葡萄園掌牛羊，由在頭牲在別人田肚食掉農作物，佢一定愛拿自家田肚出產个五榖抑係葡萄賠別人个損失。
6「若係有人在自家田肚燒竻仔，火燒到別人田肚去，將別人吂收割抑係割下个農作物燒掉，佢一定愛賠別人个損失。
7「若係有人答應保管別人个錢抑係貴重个東西，被賊仔對屋下偷走，賊仔被人捉到，一定愛加倍賠償； 8總係賊仔若係捉毋到，受託个人一定愛到敬拜上帝个地方發誓，表示佢無偷拿別人拜託佢保管个財物。
9「有關財產糾紛个案件，無論係牛、驢、羊、衫褲、抑係其他毋見掉个東西，相爭个雙方全部愛到敬拜上帝个地方去。上帝判定有罪个一方，一定愛加倍賠對方。
10「若係有人答應看守別人个驢、牛、羊，抑係其他个頭牲，頭牲若有死傷抑係被人搶走，總係無證人， 11受託个人一定愛到敬拜上主个地方發誓，表示佢無偷物主个頭牲。恁樣，物主就愛接受損失，受託个人毋使賠。 12若係頭牲確實被人偷走，受託个人一定愛賠償物主。 13頭牲若被野獸咬死擘爛，受託个人一定愛將屍體碎骨帶來做證據；佢就毋使賠。
14「若係有人向別人借用頭牲，物主無在場个時，這頭牲無論係受傷抑係死掉，借用个人一定愛賠； 15物主若在場，就毋使賠。頭牲若係租來个，損失愛用租金賠。」
道德㧯宗教个條例
16「若係有男人引誘吂定親个人家女㧯姖發生性關係，佢一定愛拿出聘金來討該細妹仔做𡜵娘。 17若係細妹仔个阿爸毋肯俾佢㧯妹仔結婚，該男人一定愛交出像送給人家女聘金恁多个錢。
18「行邪術个女人，一定愛將姖處死。
19「㧯動物發生性關係个人，一定愛將佢處死。
20「向𠊎 — 上主以外个神明獻祭个人，一定愛將佢滅掉。
21「做毋得欺負抑係壓迫對外地來个旅客；愛記得你等識在埃及做旅客暫住過。 22做毋得欺負寡婦抑係孤兒。 23若係你等欺負佢等，𠊎 — 上主會聽佢等个求喊， 24也會大發譴，使你等死在刀下；你等个𡜵娘會成做寡婦，你等个子女會成做孤兒。
25「若係你借錢給𠊎子民中个窮苦人，做毋得像放債个人㧯佢算利息。 26若係你拿別人个外衫做抵押，一定在日頭落山以前還給佢； 27因為該係佢惟一愛蓋燒个，無該領外衫愛樣般睡目呢？佢向𠊎求喊，𠊎一定會幫助佢，因為𠊎係慈悲个。
28「做毋得譭謗上帝，也做毋得咒罵人民个領袖。
29「愛拿你新出產个農作物、酒、㧯油獻給𠊎，做毋得拖延。
「愛將你个長子獻給𠊎。 30將你所有頭胎个牛羊獻給𠊎。頭胎个牛牯、羊牯愛跈牛乸、羊乸七日，到第八日愛獻給𠊎。
31「你等係𠊎个子民，愛做聖潔个人；所以你等做毋得食被野獸咬死个頭牲个肉；愛㧒給狗仔食。」
Currently Selected:
出埃及記 22: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
