Zipania 3
3
Pasalrivane si akicugane ki swa Yerusalrime
1Lri matisalregesege kai swa Yerusalrime! Ngialisianenga turamuru, wabaebalre, twasinalreme dredrepete ki laumawmaseini. 2Kai kialalra pasalaladha ki Tamatama, la kai tarumara ku sabulrwaneini. Kai satalu ki Tamatama, la kai kitubi ki Twaumase ku akiparalubane. 3Ku latabebelenge lini mia ki raiyungu ka wagirigiringi; ku tarasaibaibange lini mia ki amaani kudra masilrau ka tawpungu ubulane, ku ravane adravane ka vaeva ka culrale kai maka padaruru ki mialrealre. 4Ku layuginsia kai mwabangalre marasikai, laka matavuvulrucu. Ku labarakalai wakudrulru pakalisi ku lawbubulu ki Twaumase, si pathivalrau ku padradrekase ki Twaumase. 5Ai ku Tamatama yakaaiyana kai ki cekele; paiya ku madringelrese, kai lri pia lutumane ku kai madringelrese. Lukavaivaivai ki mialrealre, papia ki laumawmaseini padrelane ku dringelresaneini, kadruana ku tapamamane. Ai kudra kai madringelrese ka laumawmase pacungucungulu kanganga, kai thingale ku inwane.
6Ku Tamatama amia kai, “Waamudunga naku ki lakuni; si pakamudu ki cekele lini. Twa kinaburukanaku kudra ki tabebelenge ka daane lini, ki kadadalranane kadrwa ku wadadadavace ku umawmase. Twa tawlrakavanaku kudra ki cekele lini, si paubulane ku kadadalranane, kadruanga ku yakai ku umawmase. 7Sakamani kwidra lu kidremedremaku lri tara usaakene nakwane kai lakawkawluli, si tarumara kai sakaelaelaneli, si kai karimurimuru kai sabulrwaneli liniane palralrawthu#3.7 “kai karimurimuru kai sabulrwaneli liniane palralrawthu” patwalai ki sidrumane ka nihunyakane ka lahungu, ku pacase ki Hiburu yai “kwini taikaikaiyane lini lutumane kai lri kikabebetethe kibaburuku” amia. amiaku. Aneane ku wathingale kai tarathainu ku tangilribatane, la utaluvaiivainga kudra sakwa ka tangimiamiane lini.”
8Ku Tamatama amia kai, “Ukalava! Ukalavaili ku angidrakalaneli si kukusu ki lakuni. Kiadremedremenga naku ku asarubwaneli ki lakuni pakainganai, lri pathingalaku liniane kai lisianeli. Kai apwi ki lisianeli lri lama patuelre ki kawmasane.
9“Lukamaninga kwidra, lri pakabalrithaku ki umawmase ki sanaka kuni. Kwini lalasu lri kitubi nakwane, si savaeva ku kidremedreme pasikaikai nakwane. 10Kudra pasarawli ku lakawkawluli, adravane kudra yakaai adaili turamuru kavai Kuse, lri kainganai si patarumara nakwane. 11Lukelanga kwidra, kunumi ka lakawkawluli, madha ukaikainga kudra tabaebalreane numi nakwane si kainu; lri amudaku kudra ngiakalrilrigu si ngiatatwadrau ku umawmase. Ikai ki lregelregeli, lri kai numi baebalrenga nakwane. 12Lri ikaiyaku kwini si paasuru kudra ngiatatwalebe ku laumawmase; kwi lalasu lri kainganai mucucubungu nakwane si kitubi ku akipalakebane. 13Kwini laabalu kwi swa Iseraylri lri kai pianga ku ngialisiane, kai lri tavuvulrucunga, lri kai dredrepetenga. Kwi lalasu lri ngiradhekane, lri sutelrai, sanaka aneeanenga ka umawmase lri kai ukuludrunga.”
Sakiraragadhane ka senai
14Laumawmase ka swa Iseraylri, kiraragadha senai!
Swa Yerusalrime, pasutea ki kidremedreme kiragai!
15Ku Tamatama mwalranga ku sapathavungane muswane;
papacainga demedeme ki badhasu.
Ku Tamatama ka talialalai ki swa Iseraylri tapalra muswane;
lri kaisu mukuludrunga ki sapapacai.
16Lri kelanga kudra vai, kwi lalasu lri iya kai ki swa Yerusalrime:
Swa Ziyungu ka cekele, madha ukuludru!
Madha pakalruingi kwi alrimasu!
17Ku Tamatama ka Twaumasesu tapalra muswane;
kudra maadrau ka pukuini paakaci muswane.
Lri ngwalai muswane si kiragai;
ku thalradhaneini lri baai muswane ku bavane ka niake#3.17 “ku thalradhaneini lri baai muswane ku bavane ka niake” patwalai ki sidrumane ka nihunyakane ka lahungu, ku pacase ki Hiburu yai “kwi lasu lri ikai ki thalradhaneini isaselebane” amia..
Lri ngwalai muswane si kiragai senai,
18lri mia ki umawmase ka twalrisisisi ku sakiaragai.
Ku Tamatama amia kai: Paliakainga naku ku amatikurwane ka sapapacai,
si mwalranga kudra kiarubwananesu.
19Lri padaalrunga si kela kudra vai! Lri pathavungaku kudra twasinalreme dredrepete muswane ku umawmase;
lri palribulaku ki sanaka twaramuru saraunga ka umawmase,
lai lri ubalriwnga kudra laacaicali ku umawmase.
Kudra inwane lini lri paakabalrithaku paalrigu;
kai yakawmasane makanaelre lri drengedrengere liniane.
20Lri padaalrunga si kela kudra vai! Kudra wasarawnga ku laumawmase lri ililukaku numiane kainganai;
lri pakipunaganaku numiane pasalraelre kai kawmasane,
lai lri pelanasu ngiradhekane.
Ku Tamatama amia kikai pelaela.
Currently Selected:
Zipania 3: NDV
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
