Zipania 2
2
Pakiapapawlringau pangitatupela ki laumawmase
1Ku kai wathingale kainu ka kuni, pacuna! 2Sa kaisu ngialrawana ki bengelrai kalraici, ku apwi ka lisiane ki Tamatama sakaiyana kela muswane, sa kai kelana ku akalisianeini ku vai, pacuna! 3Kunumi ka yakai kawmasane ka ngiatatwalebe si kilalra pasalaladha ku drekaseini ka umawmase, kipasilapa ki Tamatama! Silapa si malra ku dringelresane, ikaiya cucubungu ki Tamatama ngitatwalebe. Ikai kudra ki takalisiane ki Tamatama ka vai, alau lri dulru numi mubere ki sapathavungane.
Ku pasiagisi ki swa Iseraylri ku lakuni lri kimwa ku amatikurwane
4Ikai cekele Gaza ku umawmase kadrwa kulri panianiake; ku swa Asekelungu lri aubulane. Ku laumawmase ki swa Asedude lri ikai ki mwalringedele kipakatwase; si ku laumawmase ki swa Ikerungu lai lri kipakatwase pulatadre ki cekele. 5Kunumi ka layakai babiabila ki laveke ka swa Pelisitine ka umawmase, lri matisalregesege numi! Ku Tamatama peaelaelaanga papia numiane; lri amudu numiane, kadrwa kulri abalu ku natangeeanga. 6Kunumi ka langwababiabila ki laveke lri atawlrakavane aubulane, kathanenga ku daane ki taraagwagu si takivane. 7Ku abalu ki swa Yuda lri ravase ku kadaengane numi; lai lri ikai numi kwini agwagu ki lakiu, si apece ikai ki daane ki swa Asekelungu. Ku Tamatama ka Twaumase lini lri kakalithi liniane, kwini lalasu lai lri siwlri mwa ki cekele lini si lri tupela tucekele.
8 Tamatama ka abebeelengenga ki sanaka kwapingi amia kai, “Kialalraku ku taulralrakadhane ki umawmase ki swa Muabe si takaelaelane tusinalreme ki swa Amune; kwini lalasu mwalralrakai ki laumawmaseli, si pelaelaela lri drikisi malra ka kadaengane lini iya. 9Kwaku yai Twaumasaku ki swa Iseraylri; papiaku ki palralrawthu ka niakeli kiketekete: Kai swa Muabe lri tara ngimia ki swa Sudume, kai swa Amune lri mia ki si swa Gumura kamudu. Kwi lalasu lri atimu ka valrulrange ka kadaengane, si lrika palralraauthunga aubulane, cebecebe suete ku ngibebecenge ka ubulu. Kudra kai kiaravase ka laumawmaseli lri malra ribici liniane, si mwa drikisi sikadaengane ki kadaengane lini.”
10Ku laumawmase ki swa Muabe si swa Amune lri kipia kai kipathavungu; asi lwiyane kwi lalasu ngiakalrilrigu ngitatuadrau, si tusinalrelreme ki laumawmase ki Tamatama ka abebeelengenga ki sanaka kwapingi. 11Ku Tamatama lri pakathathiburu liniane kai thingale ku atumanane; lri mwalra amudu ku lanitu twaumasane ki kawmasane. Sanaka kuni lai lri dulru makanaelre ikai ki kuni lini sukubu iniane.
12Ku Tamatama lai lri miaalri papacai ki swa Kuse.
13Ku Tamatama lri arakai ku pukuini amudu ki swa Asiria; lri paubulane pakameameale acalragulragu ki cekele ki swa Ninivi, 14kai Ninivi ka cekele lrika taikaikaiyanenga apece ki lalwange, lakiu, si lamakaelaeela ka waudriwdripi. Ku lakwici yakai ki kinaburukane tulisisuku, la ngulribange karariau; ku talralreba la icucubungu ki tataetaetale karariariau#2.14 “ku talralreba la icucubungu ki tataetaetale karariariau” patwalai ki sidrumane ka nihunyakane ka lahungu, ku pacase ki Hiburu yai “kai cucubungu ki tataetaetale acinilrianenga” amia.; ikai ki ladaane ku cedare ka angatu lri kituluthu. 15Ki kikai patuelre lri musarare mwa kai ki cekele; asi lwiyane ngiadradrengedrengere ku pukuini turamuru, si ngitatu maswalreke. Kwini yakai adringi ki cekele ku laumawmase lu kidremedreme kikai cekele sanianiangenga ki yakawmasane amia. Ai, lri matisepelenga aubulane, ka taisadrasadrane ki lawaudriwdripi. Sanaka aneeanenga ka umawmase lu lribate lri ulralrakai pulrivale si kaelaela pusu.
Currently Selected:
Zipania 2: NDV
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
