Matai 8

Ku Yesu pawadringai ki maraibiu ka umawmase

(Maruku 1.40-45; Luka 5.12-16)

1Ku Yesu sa twalai lregelrege kainganai, la turedededele ku laumawmase tupapalra iniane. 2Yakai ku tangeea ku kiapucaemane ki raibiu ka umawmase la kainganai kikawriva iniane, si sukubu iniane, la iya kai, “Tamatama, sana palraingisu, lri dulrusu pakabula nakwane.” 3Ku Yesu la taale ku alrima ecenge iniane, si iya kai, “Palraingaku, kusu kabula!” Kudra caemaneini la makakaai kawlrau si kabulanga. 4Ala iya kai ku Yesu iniane, “Madha pelaelaela sanaka aneeanenga ki kikai, malradalrua mwa kidrele ki barakalai, lani kamani ku wadrele muswane, ala singikai kudra tukakudhane ki Musi si patarumara ku sapatarumarane, si cubungu papia ki mapapangale pathingale ala ka mabulangasu.”

Ku Yesu pawadringai ki sasiakawlu ki kwapingi ki swa Ruma

(Luka 7.1-10)

5Ku Yesu sa kela Kaperenawme, yakai ku tangea ku mabelenge ka kwapingi ki swa Ruma kaiyanganai kidredresenge iniane, si kitubi ku akiparalubane, la iya kai, 6“Tamatama, macaeme kalrunai ku sasiakawluli, la apece ikai tavanane, si kipakwalrialri turamuru.”

7Ku Yesu la iya kai, “Anau mwa si pawdringai iniane.”

8Kwini mabelenge ki kwapingi la tubalre iya kai, “Tamatama, lu ngikakamanisu kela ki daaneli, kainaku swadalepe, sana kawrivasu akuvavaale, ku sasiakawluli lri tara mudriingai. 9Mararaamau nakwane yakai ku sabebelenge ku lri drekase nakwane ku tabebelenge, la ikai ku salelebe nakwane ku kwapingi ku adrekasaneli; lu drekasaku ki tangea ka umawmase lu mwa iya, kwi lasu lri katwase mwa, lu drekasaku bwala iya kwini ki umawmase, lai lri kela, lu papiaku ki sasiakawluli kawriva ‘Pia kikai’ iya, lai lri katwase pia.”

10Ku Yesu sa kilalra ki kikai vaga, masamaali turamuru, si iya kai ki twapapapalra iniane, “Nau kapatengatengaane pelaela numiane, kudra miyaiya kai ku salrwane, ikai ki swa Iseraylri, kainaku wadreleana kainaku kiapadradresengeana. 11Nau pelaela numiane, lubibilrili lri ikai ku takaalra ku umawmase ku twalai tali talrawane si tali sapakalriwgu ku kaiyanganai, si taelre ki Aberahame ki Isake, si Yakubu kalringulringulu ikai ki kuni belenge. 12Kudra la naika amani ku umawmase ka kuni belenge, lri kipakatwaselringa pulatadre pwa ki kadradridrimitane; ikai kwini, kwi lalasu lai lri tubitubi, si apararitaitaiti ku valisi.” 13Ku Yesu ala papia kwini ki abelenge ka kwapingi si iya kai, “Lu utavanana, lri singikainga ki salrwanesu si baai muswane pangimia!”

Ku caemane ki sasiakawluini la makakaai udringainga.

Ku Yesu pawadringai ki takaalra ka lamacaeme

(Maruku 1.29-34; Luka 4.38-41)

14Ku Yesu sa kela ki daane ki Pitiru, la drele ki tina ki labaibai ki Pitiru icengecenge kacaeme ki culwane, si apece itapeapecane. 15Ku Yesu sa kirecenge ki alrimaini, kwini culwane ki alisu la ngwalrane, si ngidrakale si pasudalru ki Yesu.

16Saka miauawbunga, yakai ku wakela mailuku ku takaalra ku kiaikai ki aidridringane ku umawmase si kikawriva ki Yesu. Ku Yesu la arakai ku niakuvavalane ku vaga si pakatwase patueelre ki laaidridringane, la pawdringai ki macaeme makanaelre. 17Ku tapianeini kikai mwataluvaivainga kudra taiyane kai ki yuginsia ka Isaiya,

“Amani ka kiatawbalrithi ki turamuraneta,

la siamece ki caemaneta.”

Ku lri tupapalra ki Yesu ku umawmase

(Luka 9.57-62)

18Ku Yesu wadrele kudra takaalra ku yathalringulu iniane ku laumawmase, la kawriva ki lasitu mwa ka balrealreanane babiabila kai ki baiyu iya. 19Yakai ku tangea ku tarabulrubulru ki Sisiu ku kaiyanganai kikawriva iniane, si iya kai, “Sinsi, adravane muinininusu, lri tara tupapaalraku muswane.”

20Ku Yesu la tubalre iya kai, “Ku kalailalri yakai ku barungulu, ku adhadhame la ikai ku lisisuku, ai ku Lalake ki Umawmase adravane ka asitawlrwanane kadrwa ku taikaiyane.”

21La ikaiyana ku tangea ku situ ku amia kai ki Yesu, “Tamatama, nau katwaseana siwlri si dralrekeana ki ama.”

22La iya kai ku Yesu, “Kusu bwala tupapalraili sikakathane, kudra wapacai ka umawmase ani katwasenga dralreke ki wapacai!”

Ku Yesu payadrengere ki valrigi si bikabiki

(Maruku 4.35-41; Luka 8.22-25)

23Ku Yesu la mubelenge ki varukuru, ku lasituini la tupapalra iniane katwase. 24Ala kiriimu pangitutuluku, valrigi kwini ki baiyu, ku bikabiki la makalrilriwgunga ki varukuru, ai ku Yesu waapece. 25Ku lasitu la kainganai mucucubungu iniane, si tawtau aceace iniane, iya kai, “Tamatama, palribula naiane, lri pacaita!”

26Ku Yesu la tubalre iya kai, “Asingithaanga mia kikai mukuludru? Ala tikiyane kai salrwane numi!” Ala kirimu ngidrakaale, si kaelaela ki valrigi si bikabiki, ku valrigi si bikabiki la kirimu idreengere.

27La kasamaali turamuru makanaelre, si maiyaiya kai, “Kikai umawmase kai aneane, adravane ka valrigi si bikabiki kialalra iniane!”

Pawadringai ki tadrusa ku kiaikai ki aidridringane ka umawmase

(Maruku 5.1-20; Luka 8.26-39)

28Ku Yesu sa kela balrealreanane ki baiyu tali kai Gadara, kiapadradresenge ku tadrusa ku twalalai tadralredralrekane barurungulu kainganai ka umawmase. Kikai tadrusa kiaikai ki aidridringane, la kalilisi turamuru, ngwalai kikai kadrwa ku umawmase ku walreme ngukakai kikai ki kadalranane. 29Kwini lalasu sa drele ki Yesu, la makakaai karaleale si iya kai, “Lalake ki Twaumase, asu keela upungu naiane? Sakaiyana mutakelane ku zikange wa kelasu pakwalrialri naiane?”

30La icengecenge kwidra, ikai kwini deethe la ikai ku makaalra ku labeke ku wakanekane. 31Ku aidridringane la kitubi ki Yesu iya kai, “Alaiyasi lri pakatwasesu naiane, pamwadringa naiane kai ki labeke.”

32Ku Yesu la iya kai, “Lu katwasa!” Ku aidridringane la utaluvaivai, si mwadringi ki labeke; kudra labeke la katwase kalrungulrungu mulrevese ki tukadrane, si makakai ki baiyu, la murenere si pacai patueelre.

33Kudra taralapulapu ki beke la katwase mubere mucekele, si pelaela ki laumawmase ku tangimiane singipathagili si takipadradresengane ki kiaikai ki aidridringane. 34Ku sakatucekelane makanaelre la kainganai drele ki Yesu, kwi lalasu sa drelenga, la kitubi iniane ku akatwasaneini kidaili ki taikaiyane lini.

Currently Selected:

Matai 8: NDV

Highlight

Copy