Matai 7

Madha raeratenge ki umawmase

(Luka 6.37-38, 41-42)

1“Madha raeratene ki umawmase, ku Twaumase lri kai saibange numiane. 2Asi lwiyane, lu pangitumane numi raeraeratenge ki umawmase, ku Twaumase lri mialri raeratenge saibange numiane, lu arakai numi ku manemane aceacepange ki umawmase, ku Twaumase mialri arakai ku tapangimiane numi ki umawmase si aceacepange numiane. 3Asu drele sikakathane kwi buti ki maca ki retesanesu, la kaisu ngikakidremedreme ka yakai ki macasu kwi maadrau ka bulri? 4Ikai ki macasu yakai kwi maadrau ka bulri, asu maka duulru iya kai ki retesanesu, ‘Tanau mwalra kwini yakai ki macasu ka buti’ iya? 5Kusu ka ngiakathaithaitharirane ka umawmase, paswalana mwalra kwi bulri ki macasu, lasu dulru drele patakulringau ku lrika apangimianesu patwalai ki maca ki retesanesu mubuti.

6“Madha malramalra kwini alrivilrivi ka lamanemane si cilri baai ki tawpungu, lri ngibangulu si kace numiane. Madha malramalra ku silu si cilri baai ki beke, lri dredre kwini ki silu.”

Kiatubi, wasilape, wabangebange ki lrawlrawdru

(Luka 11.9-13)

7“Lu kitubi numi, lri malra numi; lu silape numi, lai kidringai numi; lu bangebange numi ki lrawlrawdru, lai mulebe numiane. 8Asi lwiyane sanaka kiatubi, lri tarumara, kudra wasilape, lri kidringai; kudra wabangebange ki lrawlrawdru, lri kimuelebe. 9Ikai numiane aneane ku mwarikai ku lalakeini ku pange, wabaailringa ku lrenege iniane? 10Lu murikai ku kange, la baailringa ku sulrau iniane? 11Adravane kanganga numi, wathiingaleana numi malra ku mathariri ku lamanemane si baai ki lalalake numi, laikamaniyanenga ku Tama numi ka yasubelebelenge kai lrika makadrwadrwa malra ku mathaaithariri ka lamanemane si patarumara kudra ki kiatubi iniane ka umawmase?

12“Lakamani, kunumi ani pangitumane marasikai numiane lu iya numi ki palrapalra, tungimiyaiya pangimia marasikai ki palrapalra; ala amani kikai kudra pacugane ku hulrice ki Musi si sabulrwane ki layuginsia.”

Ngwatiki ka lrawlrawdru

(Luka 13.24)

13“Kunumi ngukakaiya ki ngwatiki ki lrawlrawdru; asi lwiyane kudra papia ki apacadhane ku lrawlrawdru ngwaadrau, ku kadadalranane la kathariri dadavace, ku papia kwini katwase ku laumawmase la takaalra turamuru. 14Kudra papia ki niake ku lrawlrawdru ngwatiki turamuru, ku kadalranane la kakucingalre dadavace, ku kiadringai ku umawmase tabeekele.”

Cebe si madru

(Luka 6.43-44)

15“Kunumi padulrwa telenge ki kaika patengane ka yuginsia. Kwi lalasu lu kela mucucubungu numiane, ku belenge lu drelane mia ki nikiubawbalane ka kiu, ku adringi yai ala ka malilisi ka tawpungu ubulane. 16Lri dulru numi patwalai ki kakwakudhane lini si thingale liniane. Ku cecenekane ka angatu kai lri dulru pumadru ku budu, ku ubulu ka ciilri kai lri dulru pumadru ku icizike. 17Ku mathariri ku cebe pwamaadru ku mathariri ku madru; ku malisi ku cebe la pumaadru ku malisi ku madru. 18Ku mathariri ku cebe kai pwamadrumadru ku malisi ku madru; ku malisi ku cebe la kai pumadrumadru ku mathariri ku madru. 19Ku kai pwamadru ku mathariri ka madru ku cebe apulebeane patueelre, si cilri pwa ki apwi. 20Lakamani, patwalai ki kakwakudhane lini, lri dulru numi thingale ku kaika patengane ka yuginsia.”

Kainaku wathingale numiane

(Luka 13.25-27)

21“Kudra ‘Tamatama, Tamatama’ amiamia nakwane ku umawmase kaika lri duulru mwa ki kuni subelebelenge makanaelre; kathane kudra pasuusu ku takidremedremane ki yabelenge ka Ama lri dulru mudaane. 22Lu kela ku apalikaiyane ka vai, takaalra ku umawmase ku lri iya kai nakwane, ‘Tamatama, Tamatama, napangwakainga nai ku naganesu si pelaelaela ku vagasu, la pangukai nai ku naganesu si pakatwase ki takaalra ka aidridringane, si pia ku makaalra ku matiasamaimali ku puku!’ 23Lukamaninga kwidra, lri iyaku kai liniane, ‘Kainaku wathingale numiane; kunumi ka manganga ka laumawmase, lu katwasa!’ ”

Taidrusane ka twadaane ka umawmase

(Luka 6.47-49)

24“Lakamani, sanaka kialaalra kai taiyaaneli si la pangimia pasuusu, mararaamau ki tangeea ka malrigili ka umawmase ka twadaane pikai belenge ki alrisapesape; 25Adravane kuvalrigi, kudale, kilriau ki acilai, kwini daane kai mwakadrulu, asi lwiyane piakai ki alrisapesape ku karwalai. 26Ai, kudra kialalra kikai lavagali si lakai pangimia pia, mararaamau kudra ki tangea ka makulrungu ka umawmase ku twadaane pikai belenge ki enaenai, 27sana kuvalrigi, kudale, kilriau, kwini daane mwakadrulu, si ku tawkadrulane pakialringau!”

Puku ki Yesu

28Ku Yesu samaka kawrivanga kikai lavaga, ku laumawmase makitwa kasamali turamuru ku tabulrwaneini; 29Asi lwiyane ku tabulrwane ki Yesu mailuku ku puku, makakaela ki tarabulrubulru ki Sisiu lini.

Currently Selected:

Matai 7: NDV

Highlight

Copy