Nisikawlane 5

Anania si Sapira

1La ikainga kwidra tangea ku umawmase, sia Anania, kwini lasu si taelrelreini ka Sapira la kilangai ku kadaengane. 2La suru ku drumane ku paisu, si malra kwidra tedrane patarumara ki nisikawlane, ki kikai taelrelreini lamialri palraingi. 3Ku Pitiru la iya kai kwini ki lasu, “Anania, asu kiruthuku ki Satange kwi kidremedremesu, la draedrangelre ki Siri, la pasurusu ku drumane ku langadhane ki kadaengane? 4Sa kaisu kilangayana kwini kadaengane, muswane, sa kilangaingasu, maiyalri ka muswane kwini langadhane ka paisu. Asu kirimu sikidremedreme nawpiyalringa iya ki kikai? Kaisu ka wadraedrangelre ki umawmase, wadraedrangelresu ki Twaumase!” 5Ku Anania sa kilalra kikai vaga, la kirimu tubakebake, si pacai. Kwidra la kialalra ki kikai ku umawmase la makitu mukuludru. 6La ikai kwidra layacengecenge ku mwadaane, la lrepelrepe kwini ki wapacai la katwase mabulribulri iluku si dralreke.

7Sangilribate ku ikai kau tulru ki tuki, wakela kwini taelrelre ki lasu mudaane, la kai thingathingale kwini tangimiane. 8Ku Pitiru la iya kai iniane, “Pelaelaili, kwini langadhane ki kadaengane ku paisu yakai kai patuelre?”

La tubalre kwini alisu, “Unu, yakai kai patuelre.”

9Ku Pitiru ala iya kai, “Kunumi anu kirimu sikidremedreme nai kituthiathingale ki Ri ki Tamatama iya? Drela kwini wadralreke ki taelrelresu yakainga lrawlrawdru, kikai lalasu maiyalri ka lri malra muswane mabulribulri si katwase!” 10Kwini alisu la makakaai tubakebake icucubungu ki Pitiru, la pacai! Kwidra layacengecenge la mudaane, la drele kwini ki alisu ka wapacainga, la malra iniane mabulribulri si katwase dralreke pikai thili ki taelrelreini. 11Kwidra lakiwkai si kwidra lakialalra ku laumawmase la makitu mukuludru makanaelre.

Matiasamali ka pinangu Twaumasane ka puku

12Kwini lanisikawlane la ikai ki mapapangale kipuawngane ku makaalra ku pinangu Twaumasane ka puku si matiasamali ka awngane, sanaka sinzia la maramaramau ku kidremedreme si irurubu itailebe ki Sulumungu ruka. 13Unu kwini lamapapangale mwasakene liniane, ai kwidra kaika sinzia ka laumawmase kai mwabangalre ngudadethe liniane. 14Sakavai kwini ku masalru ki Tamatama arwa tapangapaangale, adravane ka sawvalai ka ababai takaala. 15Ngwalai ku takipuawnganane ku makaalra ku pinangu Twaumasane ka puku ki lanisikawlane, la ikai ku laumawmase ku kainganai bulri ki macaeme pukadalranane, pikai ki tapeapecane, pikai ki takibulribulriane, si sidramadrama ki Pitiru lu lribate, ku alalinguini ikai ki kinawmasane ki lamacaeme. 16La ikaiyana ku takaalra ku laumawmase ku wailuku ki macaeme si kia ikai ki aidridringane ku la twalai kwini ki ngwadadethe Yerusalrime ka cekele kela, kwini lamacaeme la makitu kipawdringai makanaelre.

Takihakegadhane ki lanisikawlane

17Kwini abebeelengenga ki barakalai si kwidra la thadalraneini, ka amani ka swakai kwini ka swa Sadukise, la pathalra turamuru ki lanisikawlane, la mapalrailraingi ku apangimiane pwalrima. 18Kwi lalasu la mwa ruthuku si pwalra ki lanisikawlane, la alra liniane emenge pitaememengane. 19Ai kwidra sakamaungu, ku sasiakawlu ki Tamatama mwaelebe ku lrawlrawdru ki taememengane, la arake pulatadre ki lanisikawlane, si iya kai liniane, 20“Kunumi lu mwa, la acegecega ikai ki daane ki Twaumase, si pelaela ki mapapangale ku patharukai kikai ki niake ka vaga.” 21Kwini lanisikawlane la kilalra kikai ki vaga, sakalialiare la mudaane ki daane ki Twaumase, si pathagili bulru ki laumawmase.

Kwini abebeelengenga ki barakalai si la thadalraneini la dawlu kwidra ki sanaka yadringi ki gikai ka laciwru si swa Yuda si madrekadrekase, ala drekase mwa taememengane si pulatadre ki kwini ki lanisikawlane. 22Ai, sa daruru kwini tarakadrekadrenge, la drele kudra ki lanisikawlane la ka kadruanga itaememengane, la katwase siwlri mwa gikai pelaela iya kai, 23“Sa daruru nai taememengane, la drele nai ku lrawlrawdru nisawsiane tupudriadriingai, ku tarakadrekadrenge la ikai talilatadre ki lrawlrawdru kadrekadrenge, ai samuelebe nai ku lrawlrawdru ki taememengane, ala ka kadrwa ku natangeanga ku umawmase ku yadringi!” 24Kudra mabelenge ki tarakadrekadrenge ki daane ki Twaumase si marudrange ki labarakalai sa kilalra kikai tapelaelane, masamali turamuru, si kaithingale luka kiapadradresenge ki manemane kwini lanisikawlane. 25La ikai kwidra tangea ku umawmase ku mwadaane si pelaela, “Kwidra ruthuku numi pitaememengane ka umawmase yacengecenge acegecege ikai ki daane ki Twaumase si bulrubulru ki mapapangale.” 26Kwidra mabelenge ki tarakadrekadrenge la iluku ki papalraini mwa, malramalra si iluku ki lanisikawlane. Ai kwini lalasu kai ara puku maruthuruthuku, asi lwiyane mwakuludru ku kiadukulru ki mapapangale.

27Kwini lalasu sa malranga iluku kwini ki lanisikawlane, la pacegecege liniane picucubungu ikai gikai. Ku abebeelengenga ki barakalai la pathagili saibange liniane. 28La iya kai kwini lasu, “Anai pakiapapawlringau turamuru paisadra numiane madha pangukaikainga kwini ki nagane kai ki lasu bulru ki umawmase iya, kunumi la malralringa numi kwini sabulrwane pasalraelre kai Yerusalrime, si pasanu papiapia numi naiane kwidra kiame ka erai ku takipapacadhane kikai ki lasu!”

29Ku Pitiru si la drumane ka nisikawlane la tubalre iya kai, “Kunai lri tara pasalalaadha nai ki Twaumase, kai nai lri pasalaladha ki umawmase. 30Kwidra pakedrekedre numi pikai ki ziwzika papacai ka Yesu, kwidra Twaumase ki cucungulaneta pasiaelanga iniane. 31Ku Twaumase pwabelenge iniane, si la ikai ki tali vanaleini, a Tamatama, a Takipalribulribulane, pakai ku abaadhane ki swa Iseraylri ku apikakwaneana ngitatupela, si kipacepe ku lapasalrivane lini. 32Amani nai ku akasi kikai ki lamiyaiya kai, ku Twaumase kwidra ki pasalaladha iniane ka umawmase ku patarumaraini ka Siri maiyalri tupapapalra naiane pasudalepe.”

33Kudra yakai ki gikai ka lagiingi sa kilalranga kikai vaga, la kagirimucu turamuru, si la kalrithethe ku apapacadhane kwini ki lanisikawlane. 34Ai, ikai liniane yakai ku tangea ka swa Palrisai, sia Gamalile, amani ku kiamusakesakene turamuru ka tarabulrubulru ki hulrice, kwini lasu la acegecege ikai ki gikai, la pelaela ki umawmase ilukana pulatadre ki lanisikawlane iya, 35ala papia ki lagiingi avavaga, “Sakacekeleli ka swa Iseraylri, lu marasikai numi kikai ki laumawmase tara kipapawlringava, 36ku paswalala, ku Thiwda saacegecege, si ngiatatwadrau ngitatusaniange, lri ikai kau ta 400 ku twapapalra iniane. Sakabilrilinga la kipapacai kwini lasu, kwidra twapapapalra ku laumawmase la mawvagavagai si kawlrawnga. 37Sakabilrilane la ikainga ku swa Galrilri ka Yuda sa icengecenge ka tapacapacasane ki daane si umawmase, ngiadrakale si lrilrigili sangiluku ki laumawmase, kwini lasu la maiyalri kipapacai, kwidra twapapapalra iniane ku laumawmase, la mialri kipasawvagavagai. 38Papia ki kikai tangimiane kaiasasane, nau pelaela numiane, madha kiecebe liniane, palrainga pangilralraingi liniane! Lwiyasi kudra ngidradrekase lini, si ngwakai ki umawmase ku pia lini, lri tara pangilisi. 39Alaiyasi ka twalai ki Twaumase, kai numi lri dulru pamalebe liniane, ku takipuawnganane numi, alau lrika kiaececebe numi ki Twaumase!”

Kai swa gikai la tarumara ku taiyane ki Gamalile, 40ala dawlu pudaane ki lanisikawlane, si lrumai liniane, la drekase liniane madha pangukaikainga ki nagane ki Yesu bulru iya, ala pakatwase liniane. 41Ku lanisikawlane la katwase gikai, la kiraragai turamuru ku takipasudalepane lini ngwalai ku nagane ki Yesu kitusinalrelreme. 42Kwini lalasu laka sakamiya lukakaiya ikai ki daane ki Twaumase si ladaane ki tangea ki umawmase kai isadrasadra ku abulrwane ki laumawmase, pelaelaela patharukai ku hukuingi ki Yesu Kirisitu.

Currently Selected:

Nisikawlane 5: NDV

Highlight

Copy