Nisikawlane 4

Ku Pitiru si Yuhani yakai ki takaigigiane kisaibange

1Ku Pitiru si Yuhani sa kawrivariivana papia ki mapapangale, yakai kwidra labarakalai#4.1 “labarakalai” ku wahunyake madu iya kai “abebeelengenga ki barakalai”., si tarakadrekadrenge ki daane ki Twaumase, si swa Sadukise pangiatutuluku kela. 2Asi lwiyane kikai tadrusa ka nisikawlane wabulrubulru ki umawmase ku patharukai ki siaelane, pelaelaela ku tasielane ki Yesu twalai ki wapacai, kikai laumawmase la kagirimucu turamuru. 3Lakamani ku ruthuku liniane, si emenge pitaememengane pakela sakakaiyane, asi lwiyane madradrimitinga ku vai. 4Ai kwidra kialalra kwini sapelaelane ku laumawmase, yakai ku takaalra ku masalru, ku sawvalai si kakathane, padethe ki talrima ka kudrulu.

5Sakakaiyane, kudra tamatama ki swa Yuda, si ciwru, si tarabulrubulru ki Sisiu yarubu ikai Yerusalrime. 6Si ku Anase ka abebeelengenga ki barakalai si Kayapa, Yuhani, Alikesangeda, si laretesane ki abebeelengenga ki barakalai yakai kwini nene makanaelre. 7Kwini lalasu la pacegecege ki lanisikawlane picucubungu liniane, si kivaga, “Satalu numi ki manemane ka puku, pangwakai numi ki nagane ki aneane pia kikai?”

8Ku Pitiru la kisuete ki Siri, si tubalre iya kai: “Kunumi ka tamatama ki mapapangale si laciwru, 9alaiyasi kai takikivavagane nai kaikameane aka patharwakai kikai ki malrunai ka umawmase luka pangiatumane kipawdringai kikai mathariri ka awngane, 10kunumi si swa Iseraylri makanaelre naika wathingale numi: Kikai wacegecege icucubungu numiane ka umawmase ku makadulru mudringai, ngwalai ki nagane ki swa Nazarethe ka Yesu Kirisitu ku taputaluvaivadhane ku puku. Kiapakedrekedre numiane pibelenge ki ziwzika, ai ku Twaumase pasiaelanenga iniane twalai ki wapacai. 11Patharukai ki Yesu, ku Sisiu amianga kai:

Ki kikai lrenege ka cilringa ki daikusange numi

amaninga kwidra makuciaciingalrenga ka karwalai.

12Ku sapalribulane twalai iniane sikathane kela, asi lwiyane ikai ki kiacaebe ki belenge kai kawmasane, ku Twaumase kai patarwamara ku drumane ku nagane, si lri ngukaita iniane kipalribulu.”

13Kai lagiingi sadrele ki Pitiru si Yuhani ka magarange turamuru, la thingale liniane ka kai mwagaku kibulru ka langumawmawmase, la kasamali turamuru, kai lalasu la thingale kai ki tadrusa ka natwapapapalra ki Yesu. 14Ai, kai lalasu ngwavaganenga, asi lwiyane wadrele kwini ki kiapawdringai ka umawmase taelre ki Pitiru si Yuhani acegecege. 15Kai lagiingi la drekasenga liniane pakatwase twalai ki takaigigiane, ala madrekadrekase, 16si iya kai, “Lri pangitumaneta kiecebe liniane? Kai yakai Yerusalrime ka laumawmase wathingale makanaelre liniane aka paiya kikai matiasamali ka pinangu Twaumasane ka puku, lai kaita maka dulru kai ngiamia kwini iya. 17Ai, pakai ku kaika aparuswadravane pelaela ki laumawmase, ala tapakipapawlringau liniane, ani kai pangukainga ku nagane ki Yesu papia ki sanaka umawmase matikai kawriva.”

18Lakamani, kai lalasu wadawlu kwini ki tadrusa, pakipapawlringau liniane adravane ka ngitwatwatumane madha pangukaikainga ki nagane ki Yesu avavaga si ku abulrwane ki umawmase iya. 19Ai, ku Pitiru si Yuhani twabalre liniane, “Icucubungu ki Twaumase, ku kialalra numiane, si kai kilalra ki Twaumase pacengecenge? Ngikakidremedremanga! 20Ku drele nai ku kilalra nai, kai nai lri dulru kai kawriva putaluvaivai.” 21Kai swa gikai la peelanga akucaeme pakipapawlringau, ala pakatwase liniane, asi lwiyane kai maka kiadringai ku atakaiyane si pathavungu liniane, ku mapapangale makanaelre la ngukai kwini tangimiane si drengedrengere ki Twaumase. 22Ikai kai ki pinangu Twaumasane ka puku si kipawdringai kikai umawmase lri ikaainga kau taramasupatele ku caili.

Ku sinzia maramaramau ku kidremedreme si inulrinulri

23Ku Pitiru si Yuhani sa kipakatwase, makakaai siwlri mwa kwini ki lasinzia, la pelaela liniane patuelre ku taiyane ki marudrange ki barakalai si ciwru. 24Sakilalranga kwini lalasu, la masiasilange ku kidremedreme akwadrau inulri ki Twaumase iya kai: “Wabekace belenge, kadaengane, laveke si sanaka manemane ka Tamatama! 25Napangwakaisu ki Siri, arakai ki sasiakawlusu ka cucungulane nai ka Davidi kwidra ngudwini iya kai:

Kai sakamaelanane ani makitu girigiringi?

Kai laumawmase ani urikai ki kaika patengatengane ka kakudhane?

26Kai talialalai kawmasane ngiararukudrunga makanaelre ku akiecebane,

kwidra la maerece ki cekele la makitu irubu taelre,

lri kikaruburu ki Tamatama si kwidra kiapulawlau ka Kirisitu.

27Ala ka tengane ngimia, ku Hirudi si Puntiu Pilatu yakai ki cekele la ngielre ki sakamaelanane ka umawmase si swa Iseraylri, lri kikaruburu ki saniange ka sasiakawlu ka Yesu, kamani ku pilrisu pacegecege ka Kirisitu. 28Kwini lalasu la ngielre, lri pangimia ki pukusu si tagathimanesu ku padulrungasu ku angimiane sanaka manemanenga. 29Tamatama, kai lalasu wakukuludru naiane, kikai kiatubi nai muswane ku adrelanesu, si ku nai, ka sasiakawlusu, nai maka dulru kagarange pelaelaela ku matiakiragai ka vagasu. 30Kiatubi nai muswane tala ku alrimasu si pawdringai ki caemane, la nai maka dulru pangukai ki tinusaniangane ka nagane ki sasiakawlusu ka Yesu kipuawngane ku pinangu Twaumasane ka puku ku matiasamali ka awngane.”

31Kwini lalasu samaka inulri, la ngivelevele kwini taikaiyane lini irubu. La makitu kisuete ki Siri, si pathagili masasigarangane pelaelaela ku vaga ki Twaumase.

Mwarielre ku tacekecekelane

32Ki kikai lasinzia maramaraamau ku la takidremedremane lini, kadrwa ku natangeanga ku ngiatatucanidi ku tacekecekelaneini, mwarielre sanaka manemane. 33Ku nisikawlane la sapukwane akasi ku tasielane ki Tamatama ka Yesu, ku Twaumase la patarumara ku maadrau ku akaesadhane baai liniane ka tangeea. 34Ikai liniane, kadrwa ku kawrame lini sanaka manemane, kwidra la sakadaenganane sadaanane, makitu kilangai patueelre. 35Kwidra kilangai lini si malra ku paisu wabaai ki nisikawlane, la singikaai ku murikaai lini si apavavala.

36Yakai kwidra tangea ka kiatulalake ikai Saipuruse ka swa Lrivi ka sia Yusepe, ku lanisikawlane pasia Barenabase iniane (ku pacugane tarapasapukupukwane amia). 37Kai lasu kialangai ku taluvaale ku kadaenganeini, la malra kwini paisu, si patarumara ki nisikawlane.

Currently Selected:

Nisikawlane 4: NDV

Highlight

Copy