Luk 19

1Go Yecu bɛn ke teek ne Jerikoic. 2Ŋem, raan ee tɔ ye cɔɔl Dhakayo; ku kee ye bɛny de juɛr, ku kee ci bany. 3Go piɔu naŋ ŋem de Yecu lan yen ŋa; go cuɔk ye leu ne duut, ne kee cek en. 4Go riŋ tueŋ, leer ku yith ne ŋaap nom bi ŋem: ne kee ben teek yedhole. 5Na ci Yecu bɛn etedene, ke liec nhial, ku yook, Ye Dhakayo, ban yicok, bar piny; an bi lɔ cool ɣondu ekole. 6Go yecok ban, bii piny, ku loor ne yum de piɔu. 7Na cik ye ŋem, e ke lɔ ŋunŋun, jamki, Yii kee lɔ nyuc kene ran rac. 8Go Dhakayo kɔɔc, ku yɔɔk Bɛnydit, Ye ŋem, Bɛnydit, baŋ toŋ de ceŋdie aya miɔc aŋaaŋ; ku na ca ke de ran dɛ kuɔc loom, e kaya dhuɔk e ke ye yic ŋuan. 9Go Yecu yɔɔk, Ye luak ee bɛn yeɣone ekole, ku ne ke yen wen de Abraɣam eya. 10Wen de raan ee bɔ bi ka eke ci maar bi kɔɔr ku bi ke luɔk.

11Na cik keekake piŋ, ke juɛkic ne parabol, ne kee cen thiɔk ke Jeruthalem, ku ne kee ye kek ye tak yii bi ceŋ de Nhialic dai tuɔl. 12A go jam, Ye bɛny tok ee ci keny pan mec, bi ceŋ lɔ loom, ku bi lɔ dhuk. 13Go aluekke cɔɔl keethiɛr, ku yin ke jinii keethiɛr, ku jiɛm, Ye lui we ke agut te bɛi an. 14Ku kee mɛɛn kɔcke, goki kɔc tuɔc ne yecok, lek yɔɔk, Yii wɔ ce yerane kɔr bi ya bɛnyda. 15Na ɣɔn, aci jal dhuk, ke ci ceŋ lɔ loom, ke jam bi aluɛk eke ci yiɛn weu cɔl en, bi te cik juak ne weu thook nyic. 16Go aluaŋ tueŋ kan bɛn, jiɛm, Ye Bɛny, jinidun waar ee jinii kɔk lɔ bɛi keethiɛr. 17Go yɔɔk, Ye kapiath areet, yin ye aluaŋ piath: ku ke cene yi yok ke yin ye lui apiath ne kadiak, a bin naŋ riɛr de bɛidit keethiɛr. 18Go aluaŋ de rou bɛɛr bɛn, jiɛm, Ye Bɛny, jinidu ee jinii kɔk bei keedhiec. 19Go yɔɔk eya, Ye nɔŋ riɛr de bɛidit keedhiec eya. 20Ku bɔ dɛ, jiɛm, Ye Bɛny, ŋem jinidu eke, ee ca duut alath ku taau: 21ne kee riac an ne yin, ne ke yin ran rir: yin ye ke kɛne taau piny kuany, ku ye tem ne ka kɛneke puur. 22Go yɔɔk, Ye yin ba luk ne welku, yin aluaŋ rac. Yin nyic an ke ɣan ye ran rir, a ya loom ne ke kɛn taau piny, ku ya tɛm ne ka kɛnke puur. 23A ŋo cin weucie tɛɛu ne baŋkiyic, a na ya ca lɔ dhuk, e ke ba thiec lɔɔm ke ne cike juak yic? 24Go kɔc eke kaac tɛɛn yɔɔk, Ye lɔmka jini enɔŋ en, ku yiɛnka ran nɔŋ jinii keethiɛr. 25Goki yɔɔk, Yii Bɛny, kanɔŋ jinii keethiɛr. 26We ya yɔɔk, Ya ran ye naŋ ke dɛ, e kabi ya miɔc; ku ran ye ciɛn ke dɛ, ke ne cak ya kethin tɔ ke ye, e kabi nyaai enɔŋ en. 27Bɛika kɔccie wen ke ater, ye jam yii cik ɣa beer kɔɔr ba ya bɛnyden, bɛieke etene, ku nakka ke ne ɣanom eene.

28Na ci jam yeya, ke lony dhol leer tueŋ, leer Jeruthalem.

29Na ɣɔn, aci thiɔk ke Bathpagi kene Bethani, ne kuur ye cɔɔl kuur e Olip, ke toc kɔcpiocke keerou, 30jiɛm, Ya laka pan tɔ ne wenhiim tueŋ, ku na cak lɔ thin, ke we bi dan akaja yok ne mac, acin ran ci guɔ ya nyuc ne yekɔu: luɔnyka ku bɛika. 31Ku na thiec raan week, Ye yeŋo luɔnyka dau? ke we jam wuɔla, Wuɔ kee Bɛnydit yeneka ŋɛŋ en. 32Go kɔc eke ci tooc goki lɔ yok ne cit luɛlden wen. 33Ana yii ŋootki e ke lony dau, ke kɔc ke dau jam, Yii yeŋo luɔnyka dau? 34Goki jam, Yii kee Bɛnydit yeneka ŋɛŋ en. 35Ku biiki enɔŋ Yecu: ku thiethki alɛthken ne dau kɔu, ku nyuucki Yecu ne yekɔu. 36Ana ye ciɛth, e ke thieth alɛthken dholic. 37Na wen aci lɔ ke coth baai, te lɔ piny ne kuur e Olip thar, ke rem diit de kɔcpiocke gɔc miɛt de piɔu ku lecki ne ror dit ne kadit cike loi cikke ŋem; 38jamki, Yii keewuubi thiei ye Meleŋ bɔ ne rin ke Bɛnydit: ne dɔɔr ye tɔ nhial, ku ne nuɔm ye tɔ nhialic. 39Go kɔc kɔk ke Parithai tɔ ne duutic goki yɔɔk, Yii Bɛny, wai kɔckuk piɔceke. 40Go dhuk, Ye we ya yɔɔk, Ya na bi keekake mim, ke kur aabi coot.

41Na ci thiɔk ke baai, ke ŋem baai, ku dhiɛu, 42jiɛm, Ye na ne nyic ne yekole, ye yiin, kek ka ye ya ka ke dɔɔr! ku emane aa thian ne yinyin. 43Akɔl abi yi yok, akol bik kɔc man yin yi yuɛl piny ne thieŋ dit, aabi yi gɔɔl piny, tiitki yi thin ne biɔk kedhia, 44ku kaabi yi thuɔr piny, agut mithkuk tɔ ne yiyic; ku kacin kuur toŋ bik nyaŋ piny ne kuure nom ne yiyic; ne ke kuc yin kol e nɛɛmdu.

45Go lɔ ne yekaluic, ku gɔɔc kɔc ne ciɛc kɔc eke ye kaŋ ɣaac, 46yook ke, Ye kee gɔɔr, Ya luaŋdie abi ya cɔɔl luaŋ de lɔŋ: ku kacak cɔk ye ɣon de rum.

47Ku ye cool ne weet ne yekaluic ne nyindhia. Go banydit ke ka ke Nhialic ku dugɛɛr kene bany ke kɔc goki kɔɔr bik nɔk: 48goki ke bik loi kuc; ne kee ci kɔc e guɛɛr, piŋki.

Currently Selected:

Luk 19: LEKJOT

Highlight

Copy