Jɔn 19

1Go Pilato Yecu lar ku dui. 2Ku nai lathkeer kou ne ye gol, ku tɛɛuki enom, ku piɔthki alanh alian ne yekɔu; 3ku yiki lɔ enɔŋ en, ku jamki, Yi Aram, Meleŋ de Judai! ku biɔkki ne kecin. 4Go Pilato bɛɛr lɔ biyic, ku yook keek, Ye ŋɛmka, abɛi enɔŋ week, bak nyic lan cin en awany ca yok enɔŋ en. 5Go Yecu lɔ ke ceŋ gol de kou ku alanh alian ne yekɔu. Go Pilato ke yɔɔk, Ye ŋɛmka raan! 6Na ci bany ke ka ke Nhialic ku atoc ye ŋem, e ke cot jamki, Yi piatka. Go Pilato ke yɔɔk, Ye larka, ku piatka: acin awany ca yok enɔŋ en. 7Go Judai dhuɔk en, Yi wɔ nɔŋ loŋ, ku loŋda ee bi rɔt dhiɛl ne thouic, ne ke yen rɔt cɔk ye Wen de Nhialic. 8Te cii Pilato ye piŋ yejame, go bɛɛr riɔɔc areet; 9ku ber lɔ luaŋ de luɔk, ku thiec Yecu, Ye e yin bɔ eno? Go Yecu cuɔk beer. 10Go Pilato yɔɔk, Ye cii ɣa ye bɛɛr? Kuc ɣɛn ke ɣan nɔŋ riɛr pal an yin, ku rir piat an yin? 11Go Yecu dhuk, Ye kee te cin riɛr tɔ ke yin enɔŋ ɣɛn, te kene e yiɛn yi nhial: yen ran e yin ɣa yin yeneka nɔŋ rɛɛc dit. 12Go Pilato piɔu naŋ bi puɔl etɛɛn: go Judai coot jamki, Yi na pɛl yerane; ke yin cie mɛthe de Kaithar: raan ebɛn ye rɔt cɔk ye melek ee teer ke Kaithar. 13Na ci Pilato ye piŋ yejame, ke bii Yecu bei, ku nyuuc ne thony de luɔk nom te ye cɔɔl Nyiɛny de Kur, ku cɔl Gabatha ne thoŋ de Eberuu. 14Ku juɛr de ret ee tɔ, ku ye thaa de dhetem. Go Judai yɔɔk, Ye ŋɛmka Meleŋduɔn. 15Goki coot, Yi nyaiye, nyaiye, piate. Go Pilato ke thiec, Ye ba Meleŋduɔn piat? Go bany ke ka ke Nhialic dhuk, Yi wɔ cin meleŋ dɛ te cen e Kaithar. 16Go yiɛn keek bik lɔ piat.

Goki Yecu lar: 17go lɔ biyic ke jɔt tiɛm ageerde te cɔl te de Apet, ku cɔl Golgotha ne thoŋ de Eberuu: 18ku lek piat thin, ku kɔc kɔk keerou kene yen, ŋɛk ne baŋe ku ŋɛk ne baŋe, ku Yecu cilic. 19Ku gar Pilato rin, ku tɛɛu ke ne tiɛm ageer nom. Ku gar ee ye, yecu de nadhareth, meled de judai. 20Go Judai juec keerinke ciir: te cene Yecu piat thin ee thiak ke baai: ku ci gɔɔr ne thoŋ de Eberuu, ku thoŋ de Romai, ku thoŋ de Girikii. 21Go bany ke ka ke Nhialic ke Judai Pilato yɔɔk, Yi duk gar, Wu Meleŋ de Judai; gar, wu kee jam, Ye ɣan ye Meleŋ de Judai. 22Go Pilato dhuk, Ye ke ca gɔɔr aca gɔɔr.

23Na ci lathkeer Yecu piat, e ke ler alathke, ku tekki ke ne ŋuan, ŋɛk ke biakde ne keek kedhia; ku alanhden e kɔu eya: ku alanh e kɔu ee cin koc thok, ee cuec nhial gut piny. 24Goki jam ne roth, Yi dukku ret, carku, lan ben ya ke de ŋa: bi kacigɔɔr bik ya yith ci luel,

Ya ka yaake ceŋ aacikke tek,

Ku cɔrki ne alɛthcie.

Keekake acii lathkeer ke loi. 25Ku kaac yi man ne tiɛm ageer de Yecu lɔɔm, kene manlɛne, Mari tiŋ de Kleopath, ku Mari Magdalene. 26Te cii Yecu man ŋem ku kac ranpioce nhiɛr ne yelɔɔm, go man yɔɔk, Ye tiik, ye wendu ŋem! 27Ku ber ranpioce yɔɔk, Ye ye moor ŋem! Ku yethane acii ranpioce ye lar pande.

28Ɣɔn ne yekene cok go Yecu jal nyic ke kaŋ kedhia ci jal thok, bi kecigɔɔr bi ya yic, ku jiɛm, Ye an ci yal. 29Ku tɔ tony thiaŋ ne binegar: goki ponj ci thiɔŋ ne binegar goki luɔt ne kithop nom, ku cookki ne yethok. 30Na ci Yecu ye loom ye binegar, ke jam, Ye kee thok: ku gut enom piny, jɔl thook.

31Go Judai, ne ye Juɛr, kɛlke gup bi nook nhial ne tiɛm ageer kɔu ne akol de thabath (yethabanhe ee ye kol dit), goki Pilato thiec bi ke dhoŋ kuɔl, ku bi ke jat wei. 32Go lathkeer lɔ, ku dhoŋki kuɔl ke ran tueŋ, ku ka ke ran dɛ ci piat kene yen: 33ku yi bik enɔŋ Yecu, goki yɔk ne ci guɔ thou, goki cuɔk dhoŋ kuɔl: 34ku ran toŋ de lathkeer aci e gut lɔɔm ne toŋ, go riɛm kueer bei ku piu nelantoŋtɛi. 35Ku ran ci e ŋem ee ya lek, ku lekde ee yic: ku kanyic ke ci yic luel, bak ya gam eya. 36Keekake aacike loi bi kecigɔɔr bi ya yic, Ya kacin yuɔmden bi dhoŋ. 37Ku ber dɛ ci gɔɔr jam, Ye kabik liec yen man cik thɔr.

38Ɣɔn ne keekake cok go Jothep de Ari mathaya, ee ye ranpioce de Yecu, ne muɔny ne riɔc riɔc en ne Judai, go Pilato thiec bi guɔp de Yecu lar: go Pilato gam en. Go lɔ, ku loom guɔp de Yecu. 39Ku bɔ Nikodemo eya, man e ci kan bɛn enɔŋ Yecu ne wɛɛric, ku bii riɛm ke thumurnai ku aloei cike liap keethiɛrnyiɛny. 40Goki guɔp de Yecu loom, ku dutki ne alanh linon ku wal nyir, ci luɔi de Judai de thiak. 41Ku te e piɛte yen ee nɔŋ genen; ku tɔ raŋ jot ne genenic, cin ran ci kan thiɔk thin. 42Goki Yecu kan thin ne tɔ tɔ Juɛr de Judai: ku ne thiɔk thiɔke raŋe.

Currently Selected:

Jɔn 19: LEKJOT

Highlight

Copy