Jɔn 14

1Duɔka piɔthkuɔn ye cɔk lɔ etuk: we ye Nhialic gam, ku yaka ɣa bɛɛr gam eya. 2Pan de Awa anɔŋic ɣɔn juec ke ceŋ; ne ke liu, ee te lɛk we: an lɔ ba teduɔn lɔ juir. 3Ku na la teduɔn juir, ke an bi bɛɛr bɛn, ku lɔɔm week ne guɔpdie; bak ya tɔ eya te yan tɔ. 4Ku te lar ɣan aye we dhol nyic. 5Go Thoma yɔɔk, Ye Bɛnydit, buk dhol nyic wuude, ke wɔ kuc te leer yin? 6Go Yecu yɔɔk, Ye ɣan ye dhol, ku ɣan ye yic, ku ɣan ye piir: acin ran ye bɛn nenɔŋ Awa, ke ken teek ne anom. 7Ne we ye ɣa nyic, e kee te yaka Awa nyic eya: ku emane ayaka nyic, ku kacak ŋem. 8Go Pilip yɔɔk, Ye Bɛnydit, nyuɔthe wɔ Wuur, yenekee yuku kɔɔr. 9Go Yecu yɔɔk, Ye ciɛŋ wɔ we ete ɣɔn ku kuɔcka ɣa, Pilip? ran ci a ŋem aci Awa ŋem; yeŋo jiɛm yin, Wu nyuɔthe wɔ Wuur? 10Cak ɣa gam ke ɣan ye tɔ ne Awaic, ku Awa ne ɣaic? wel yake lɛk week acaake ye luel ne ke de guɔpdie: ee Awa man ye ceŋ ne ɣaic yenekee luɔide loi. 11Yaka ɣa gam, ke ɣan tɔ ne Awaic, ku Awa ne ɣaic: ka yaka ɣa gam ne ke de yeluɔine. 12We ya yɔɔk neyic, Ya ran ye ɣa gam, abi luɔi ya loi abi ya loi eya; ku kabi kadit ne yekene ya loi; ne lɔ lar ɣan enɔŋ Awa. 13Ku ke dɛ ebɛn ke bak ya thiec ne rincie, aba ya luɔi we, bi Awa bi ya nom ne Wa. 14Na yaka ɣa thiɛc ke dɛ ne rincie, e kabi ya luɔi we. 15Na yaka ɣa nhiar, ke we bi looŋcie ya loi. 16Ku an bi Awa lɔŋ, ku bi we yiɛn Dugel dɛ, bi ya tɔ kene week athɛɛr; 17yenekee Jɔŋdiit de yith. Kɔc ke ka ke piny nom acik leu ne lɔm, acik ye ŋem, ku kacik ye nyic. Ku week, we eka nyic e. Ee ceŋ kene week, ku kabi ya tɔ ne weyic. 18We caa bi nyaŋ wei ci thum; an e lɔ ka bɔ. 19Kɔc ke ka ke piny nom aaci ɣa beer ŋem miak ne ninka; ku we bi ɣa ya ŋem: piir yan piir abi we ya piir. 20Ne ekole abak nyic ke an tɔ ne Awaic, ku taka ne ayic, ku taa ne weyic. 21Ran tɔ ke looŋcie, ku ye ke loi, yenekee ɣa nhiar. Ran ye ɣa nhiar abi Awa ya nhiar, ku nhiar eya, ku kaba nyuɔth rɔt. 22Go Judath yɔɔk (ku kacie Yithkariɔt) Ye Bɛnydit, yeŋo bin rɔt nyuɔth wɔ, ku cii rɔt nyuth kɔc ke ka ke piny nom? 23Go Yecu dhuk, Ye na ye raan ɣa nhiar, e kabi welcie ya loi, ku kabi Awa ya nhiar, ku buku enɔŋ en, ceŋku wɔne yen. 24Ran ce ɣa ye nhiar aci welcie ye loi: keewel piɛŋekeka aacie welcie, kaa wel ke Awa ci ɣa tooc.

25Keekake acake lɛk we ka ŋoot ka tɔ wɔ we. 26Ku Dugel, Jɔŋdiit Lajik, man bii Awa tuɔc ne rincie, kabi we ya piɔc ne kaŋ kedhia, bi we cɔk ye wenhiim ciɛt ne wel cake lɛk we kedhia. 27Dɔɔr anyaŋ we; we yiɛnke dɔɔrdie. Yin yiɛn an e we ace cit yin de kɔc ke ka ke piny nom. Duɔka piɔnduɔn cɔk lɔ tuk, duɔka riɔc. 28We ci jam enhia jam an piŋ, Ya an jiɛl, ku an e lɔ ka bɔ. Ne we nhiar an, ee te cak piɔth lɔyum ne lɔ lar an enɔŋ Awa: Awa kadit ne ɣɛn. 29We ca lɛk ne emane, ke ŋoot, bak gam te cen bɛn. 30An ce beer ben jam wɔ we areet; bɛny de piny nom abɔ, ace mɛt ke ɣa. 31Aluɔi yala, bii kɔc ke ka ke piny nom nyic lan nhiar an Awa. Aluɔi yala, ne loŋ ci Awa lɛk ɣa. Jatka roth, lou.

Currently Selected:

Jɔn 14: LEKJOT

Highlight

Copy